ಕದ್ದಿದ್ದಕ್ಕಾಗಿ ಕ್ಷಮಾಪಣೆ ಪತ್ರ ಬರೆದ ಕಳ್ಳ!

Team Udayavani, Mar 9, 2017, 9:26 AM IST

ನಿಮ್ಮ ಯಾವುದಾದರೂ ವಸ್ತುವನ್ನು ಕದ್ದ ಕಳ್ಳನಿಂದ ಕ್ಷಮೆ ಅಥವಾ ಹಣವನ್ನು ನಿರೀಕ್ಷಿಸಲು ಸಾಧ್ಯವೇ? ಕಳ್ಳ ತಾನೇ ಕದ್ದದ್ದು ಎಂದು ಒಪ್ಪಿಕೊಳ್ಳುವುದು ಎಲ್ಲಾದರೂ ಉಂಟೇ? ಅಮೆರಿಕದ ಮಹಿಳೆ ಕ್ರಿಸ್ಸಿ ಈ ವಿಚಾರದಲ್ಲಿ ತಮಗೆ ಆದ ಅನುಭವವನ್ನು ಫೇಸ್‌ ಬುಕ್ಕಿನಲ್ಲಿ ಬರೆದಿದ್ದಾರೆ.

ಅವರ ಮನೆಯ ಎದುರಿಗೆ ನೇತುಹಾಕಿದ್ದ ಅಲಂಕಾರಿಕ ವಿಂಡ್‌ ಚೇನ್‌ ಕಳುವಾಗಿತ್ತು.ಇದಾದ ಹಲವು ದಿನಗಳ ಬಳಿಕ ಆಕೆಯ ಮನೆಗೆ ಕ್ಷಮಾಪಣೆ ಟಿಪ್ಪಣಿ ಮತ್ತು 5 ಡಾಲರ್‌ ಹಣವನ್ನು ಓರ್ವ ಹುಡುಗ ಕಳಿಸಿದ್ದ. ಆ ಟಿಪ್ಪಣಿಯಲ್ಲಿ ಹೀಗೆ ಬರೆಯಲಾಗಿತ್ತು. “ನನ್ನ ತಾಯಿ ತೀರಿಕೊಂಡರು. ಅವರಿಗೆ ಚಿಟ್ಟೆಗಳೆಂದರೆ ತುಂಬಾ ಇಷ್ಟ. ನಿಮ್ಮ ಮನೆಯ ವಿಂಡ್‌ ಚೆನ್‌ ಕದ್ದು ನಮ್ಮ ಕಿಟಕಿಗೆ ನೇತು ಹಾಕಿದೆವು. ನಿಮಗೆ ಹಣ ಮಾತ್ರ ಹಿಂದಿರುಗಿಸಲು ಸಾಧ್ಯ- ಜೇಕ್‌’ ಎಂದು ಬರೆದಿತ್ತು. ಸದ್ಯ ಕ್ರಿಸ್ಸಿ ಆ ಹುಡುಗನಿಗಾಗಿ ಹುಡುಕಾಡುತ್ತಿದ್ದಾರೆ. ಕದ್ದಿದ್ದಕ್ಕೆ ಶಿಕ್ಷೆ ನೀಡಲು ಅಲ್ಲ. ಬದಲಾಗಿ ಪ್ರೀತಿಯಿಂದ ಆತನಿಗೆ ಉಡುಗೊರೆ ಕೊಟ್ಟು ಕಳಿಸಲು.