ಫುಟ್‌ಬೋರ್ಡ್‌ನಲ್ಲಿ ನೇತಾಡುವ ಪರಿಪಾಠ ನಿಲ್ಲಲಿ

Team Udayavani, Jan 27, 2019, 7:37 AM IST

ಸಾರ್ವಜನಿಕರ ಉಪಯೋಗಕ್ಕಿರುವ ವಾಹನಗಳು ಸಹಿತ ಪ್ರತಿಯೊಂದು ವಾಹನಗಳಿಗೂ ಸಂಚಾರಿ ನಿಯಮಗಳು ಅನ್ವಯಿಸುತ್ತವೆ. ಆ ನಿಯಮ ಪಾಲನೆ ಚಾಲಕರ ಕರ್ತವ್ಯ ಕೂಡ. ಆದರೆ ನಗರದಲ್ಲಿ ಓಡಾಟ ನಡೆಸುವ ಸಿಟಿ ಬಸ್‌ಗಳು ಈ ನಿಯಮಗಳನ್ನು ಪಾಲಿಸುತ್ತಿವೆಯಾ?

ಒಂದು ಬಸ್‌ನಲ್ಲಿ ಸಾಮರ್ಥ್ಯಕ್ಕಿಂತ ಹೆಚ್ಚು ಮಂದಿಯನ್ನು ಕರೆದೊಯ್ಯಬಾರದು ಎಂಬ ನಿಯಮವಿದ್ದರೂ, ಆ ನಿಯಮವನ್ನು ಗಾಳಿಗೆ ತೂರುವುದೇ ಹೆಚ್ಚಾಗುತ್ತಿದೆ. ಸೀಟು ಭರ್ತಿಯಾದ ಮೇಲೆ ಕೇವಲ ಬಸ್‌ನೊಳಗಡೆ
ಮಾತ್ರವಲ್ಲದೆ, ಬಸ್‌ನ ಫುಟ್‌ ಬೋರ್ಡ್‌ನಲ್ಲಿ ನೇತಾಡಿಕೊಂಡೇ ಹೋಗಬೇಕಾದ ಅನಿವಾರ್ಯತೆಯಲ್ಲಿ ಪ್ರಯಾಣಿಕರಿದ್ದಾರೆ. ಇಷ್ಟು ಮಂದಿಯನ್ನು ಬಸ್‌ನಲ್ಲಿ ಕರೆದೊಯ್ಯಬಾರದೆಂಬ ನಿಯಮವನ್ನು ಬಸ್‌ ನಿರ್ವಾಹಕ-ಚಾಲಕರು ಪಾಲಿಸದಿರುವುದೇ ಇದಕ್ಕೆ ಕಾರಣ.

ನಗರದಲ್ಲಿ ಸುಮಾರು 300ಕ್ಕೂ ಹೆಚ್ಚು ಸಿಟಿಬಸ್‌ಗಳು ಓಡಾಟ ನಡೆಸುತ್ತಿವೆ. ಈ ಎಲ್ಲ ಬಸ್‌ಗಳಲ್ಲಿ ಪೀಕ್‌ ಅವರ್‌ಗಳಲ್ಲಿ ಪ್ರಯಾಣಿಕರ ಸಂಖ್ಯೆಯೂ ಹೆಚ್ಚಿರುತ್ತದೆ. ವಿಶೇಷವಾಗಿ ವಿದ್ಯಾರ್ಥಿಗಳು ಶಾಲೆಗೆ ತೆರಳುವಾಗ ಮತ್ತು ಶಾಲೆಯಿಂದ ಹಿಂದಿರುವಾಗ ಬಸ್‌ನಲ್ಲಿ ನಿಲ್ಲಲು ಜಾಗವಿಲ್ಲವೆಂದು ಫುಟ್‌ಬೋರ್ಡ್‌ ನಲ್ಲೇ ಅಪಾಯಕಾರಿಯಾಗಿ ನೇತಾಡಿಕೊಂಡು ಸಾಗುತ್ತಾರೆ. ಬಸ್‌ ವೇಗವಾಗಿರುವುದರಿಂದ ತಿರುವುಗಳಲ್ಲಿ ಭಾರ ಒಂದೇ ಕಡೆಗೆ ಬಂದು ಬೀಳುವ ಸಂದರ್ಭವೂ ಇರುತ್ತದೆ.

ಈ ಬಗ್ಗೆ ಸಾರಿಗೆ ಇಲಾಖೆಯೂ ಕ್ರಮ ವಹಿಸಲು ಈ ಹಿಂದೆ ನಿರ್ಧರಿಸಿತ್ತು. ಅದಕ್ಕಾಗಿ ವಿಶೇಷ ತಂಡ ರಚನೆ ಮಾಡಿ ಕಾರ್ಯಾಚರಣೆಯನ್ನೂ ನಡೆಸಿತ್ತು. ಆದರೆ ಎಲ್ಲವೂ ಆರಂಭದಲ್ಲಿ ಮಾತ್ರ ಎನ್ನುವಂತಾಗಿದೆ. ಬಸ್‌ನ ಫುಟ್‌ಬೋರ್ಡ್‌ನಲ್ಲಿ ನೇತಾಡುವುದು ನಿರಾತಂಕವಾಗಿಯೇ ಮುಂದುವರಿದಿದೆ. ಕೆಲವೊಮ್ಮೆ ಬಸ್‌ನಲ್ಲಿ ಸೀಟು ಇದ್ದು, ನಿರ್ವಾಹಕರು ಕುಳಿತುಕೊಳ್ಳಲು ಹೇಳಿದರೂ, ಕೆಲ ವಿದ್ಯಾರ್ಥಿಗಳು ಫುಟ್‌ಬೋರ್ಡ್‌ನಲ್ಲೇ ನೇತಾಡುತ್ತಾರೆ. ಅಪಾಯಕಾರಿಯಾಗಿರುವ ಇಂತಹ ಚಟುವಟಿಕೆಗಳನ್ನು ಸಾರಿಗೆ ಇಲಾಖೆ ಗಂಭೀರವಾಗಿ ಪರಿಗಣಿಸಿ ಕಾರ್ಯಾಚರಣೆಗಿಳಿಯಬೇಕು.

  ಧನ್ಯಾ ಬಾಳೆಕಜೆ