ಚೀನಕ್ಕೆ ಪಾಕ್ ಯುವತಿಯರ ಸ್ಮಗ್ಲಿಂಗ್
Team Udayavani, Dec 5, 2019, 1:00 AM IST
ಲಾಹೋರ್: ಚೀನ ತನ್ನ ಪರಮ ಆಪ್ತ ರಾಷ್ಟ್ರವೆಂದು ಪಾಕಿಸ್ಥಾನ ಆಗಾಗ ಹೇಳಿಕೊಳ್ಳುತ್ತದೆ. ಅದೇ ರಾಷ್ಟ್ರಕ್ಕೆ ಪಾಕಿಸ್ಥಾನದ 629 ಯುವತಿಯರನ್ನು ಕಳ್ಳ ಸಾಗಣೆ ಮಾಡುವ ಜಾಲವೊಂದು ಬಯಲಾಗಿದೆ. 2018ರಿಂದಲೇ ಈ ಜಾಲ ಸಕ್ರಿಯವಾಗಿದೆ ಎಂದು ಪಾಕಿಸ್ಥಾನದ ತನಿಖಾ ಸಂಸ್ಥೆಗಳು ಕಂಡುಕೊಂಡಿವೆ.
ಪಾಕಿಸ್ಥಾನ ಸರಕಾರದ ಹಲವಾರು ಪ್ರಮುಖ ಅಧಿಕಾರಿಗಳೇ ಇದರಲ್ಲಿ ಶಾಮೀಲಾಗಿದ್ದಾರೆ. ಅದನ್ನು ಛೇದಿಸಿದರೆ, ಪಾಕಿಸ್ಥಾನ ಮತ್ತು ಚೀನದ ಸ್ನೇಹಕ್ಕೆ ಧಕ್ಕೆಯಾಗುತ್ತದೆ ಎಂಬ ಒತ್ತಡವಿದೆ. ಹೀಗಾಗಿ, ಅವರೂ ಮಾನವ ಕಳ್ಳಸಾಗಾಣಿಕೆಯನ್ನು ಬೆಂಬಲಿಸುವ ಸ್ಥಿತಿ ಉಂಟಾಗಿದೆ ಎಂದು ಗುಪ್ತಚರ ಸಂಸ್ಥೆ ಅಧಿಕಾರಿಗಳು ತಿಳಿಸಿದ್ದಾರೆ.
ಜತೆಗೆ ಇದುವರೆಗೆ ಕಳ್ಳಸಾಗಣೆಗೊಂಡಿರುವ ಮಹಿಳೆಯರ ಪಟ್ಟಿಯನ್ನೂ ಸಲ್ಲಿಕೆ ಮಾಡಲಾಗಿದೆ. ಕಳೆದ ಅಕ್ಟೋಬರ್ನಲ್ಲಿ ಫೈಸಲಾಬಾದ್ ಕೋರ್ಟ್ 31 ಚೀನ ಪೌರರನ್ನು ಮಾನವ ಕಳ್ಳಸಾಗಾಣಿಕೆ ಕುರಿತು ದೋಷ ಸಾಬೀತುಪಡಿಸಲಾಗಿತ್ತು. ಚೀನದಲ್ಲಿ ಒಂದೇ ಮಗು ನೀತಿ ಜಾರಿಗೊಳಿಸಿದ ಬಳಿಕ ಹೆಣ್ಣು ಮಕ್ಕಳ ಸಂಖ್ಯೆ ಗಣನೀಯವಾಗಿ ಇಳಿದಿದೆ.