ಭಲೇ ಮಜಾ ಕೊಡುವ ವಿಆರ್‌ ಗೇಮ್ಸ್‌

Team Udayavani, May 11, 2018, 3:52 PM IST

ಇಡೀ ಜಗತ್ತು ಈಗ ಕಲ್ಪನೆಗಳಲ್ಲೇ ತೇಲುವ ಕಾಲ. ಕಂಪ್ಯೂಟರ್‌ ಗೇಮಿಂಗ್‌ ಅಂತೂ ದಶಕಗಳಷ್ಟು ಮುಂದೆ ಹೋಗಿದ್ದು, ಚಿತ್ರವಿಚಿತ್ರ ಆಟಗಳು ಯುವ ಜನತೆಯನ್ನು, ಮಕ್ಕಳನ್ನು ಆವರಿಸಿಕೊಂಡಿದೆ. ಇದರಲ್ಲಿ ಅತಿ ಹೆಚ್ಚು ಹೆಸರು ಮಾಡಿರುವುದು ವರ್ಚುವಲ್‌ ರಿಯಾಲಿಟಿ ಗೇಮಿಂಗ್‌ ಅರ್ಥಾತ್‌ ಕಲ್ಪನಾ ವಾಸ್ತವದ ಆಟಗಳು! ಇಲ್ಲಿ 3ಡಿ ತಂತ್ರಜ್ಞಾನದ ನೆರವಿನಿಂದ ಆಟಗಳನ್ನು ಆಡಲಾಗುತ್ತದೆ. ವರ್ಚುವಲ್‌ ಪರಿಸರಗಳನ್ನು ಸಾಫ್ಟ್ವೇರ್‌ ನೆರವಿನಿಂದ, ಕಂಪ್ಯೂಟರ್‌ ಗ್ರಾಫಿಕ್ಸ್‌ಗಳ ಮೂಲಕ ಉಂಟುಮಾಡಿ 360 ಕೋನದಲ್ಲಿ ತೋರಿಸಿ ಆಟ ಆಡಲಾಗುತ್ತದೆ. ಜಗತ್ತಿನಾದ್ಯಂತ ಇಂತಹ ಆಟಗಳ ಮೇಲೆ ಜನ ಮುಗಿಬಿದ್ದಿದ್ದಾರೆ!

ವಿಆರ್‌ ಗೇಮ್‌ ಎಂಬ ಮಾಯಾಲೋಕ
ವಿಆರ್‌ ಗೇಮ್‌ ಅಂದರೆ ಭಲೇ ಮಜಾ! ಈ ವಿಆರ್‌ ಗೇಮ್‌ ಆಡಲು ಒಂದು ಹೆಡ್‌ಮೌಂಟೆಡ್‌ ಡಿಸ್‌ಪ್ಲೇ ಅನ್ನು ತಲೆಗೆ ಹಾಕಿಕೊಳ್ಳಬೇಕು. ಇದು ಕಣ್ಣಿಗೂ ತಲೆಗೂ ಆವರಿಸಿಕೊಳ್ಳುತ್ತದೆ. ಮೊಬೈಲ್‌, ಕಂಪ್ಯೂಟರ್‌ ಮೂಲಕ ಗೇಮ್‌ ಚಾಲೂ ಮಾಡಿ ಜಾಯ್‌ ಸ್ಟಿಕ್‌ ಮೂಲಕ ಆಟ ಆಡಲಾಗುತ್ತದೆ. ಇದು 3ಡಿ ಕಾಣುತ್ತಾದ್ದರಿಂದ 360 ಕೋನದಲ್ಲಿ ಆಟಗಾರನಿಗೆ ಹೊಸ ಪ್ರಪಂಚಕ್ಕೆ ಕೊಂಡೊಯ್ಯುತ್ತದೆ. ಅಷ್ಟಕ್ಕೇ ಆಟಗಾರ ವಾಸ್ತವ ಮರೆತೇ ಬಿಡುವಂತೆ ಆಗುತ್ತದೆ! 

ಹುಚ್ಚಿಗೆ ಕಿಚ್ಚು!
ಈಗಿನ ಮಕ್ಕಳು, ಯುವಕರಂತೂ ವಿಆರ್‌ ಗೇಮ್ಸ್‌ ಅಂದೆ ಹುಚ್ಚು ಹಿಡಿವಂತೆ ಆಡುತ್ತಾರೆ. ಒಂದು ಬಾರಿ ಆಟದೊಳಗೆ ಹೊಕ್ಕರೆ ಸಾಕು, ಹೊರಬರುವದೇ ಬೇಡವೆನ್ನುವಷ್ಟು ಸ್ಟಿಮ್ಯುಲೇಟರ್‌ ವರ್ಲ್ಡ್ ಹುಚ್ಚು ಹಿಡಿಸುತ್ತದೆ. ಅಡ್ವೆಂಚರ್‌, ರೇಸ್‌, ಶೂಟಿಂಗ್‌, ಸ್ಪೇಸ್‌ ಫ್ಲೈಯಿಂಗ್‌, ವಾರ್‌ ಗೇಮ್ಸ್‌, ಇತ್ಯಾದಿ ನೂರಾರು ಗೇಮ್ಸ್‌ಗಳು ಅತಿಪ್ರಿಯವಾಗಿವೆ.

ವಿಶಿಷ್ಟ ಅನುಭವ
ವಿಆರ್‌ ಗೇಮ್ಸ್‌ ಸ್ಟಿಮ್ಯುಲೇಟೆಡ್‌ ಪ್ರಪಂಚದ ಪರಿಸರವನ್ನು ಆಟಗಾರರಿಗೆ ಒದಗಿಸುತ್ತದೆ. ಸ್ಪರ್ಶ ಸಂವೇದನೆ, ಪರಿಸರದ ಅನುಭವ ನೀಡುವುದಕ್ಕಾಗಿ ಇದರಲ್ಲಿ ವಿಶಿಷ್ಟ, ಅತ್ಯಾಧುನಿಕ ಜಾಯ್‌ಸ್ಟಿಕ್‌ ಸಾಧನಗಳನ್ನು ವಿಆರ್‌ ಗೇಮ್ಸ್‌ ಸಾಧನ ಹೊಂದಿರುತ್ತದೆ. ಇದರಿಂದ ಆಟವಾಡುವ ವ್ಯಕ್ತಿಗೆ ದೃಶ್ಯ, ಸ್ಪರ್ಶ, ಧ್ವನಿ, ಸಂವೇದನೆಗಳನ್ನು ಸೆನ್ಸರ್‌ಗಳ ಮೂಲಕ ನೀಡುತ್ತದೆ. ಇದು ವಾಸ್ತವ ಜಗತ್ತಿನಿಂದಲೂ ರಸವತ್ತಾದ ಅನುಭವ ನೀಡುವುದರಿಂದ ಹೆಚ್ಚಿನವರು ಇದರ ಗೀಳು ಶುರು ಮಾಡಿಕೊಳ್ಳುತ್ತಾರೆ.

ವಿಆರ್‌ ಗೇಮ್‌ ಹೆಡ್‌ಸೆಟ್‌
ಮಾರುಕಟ್ಟೆಯಲ್ಲಿ ಎಚ್‌ಟಿಸಿ ವೈವ್‌, ಆಕ್ಯುಲಸ್‌ ರಿಫ್ಟ್, ಮೈಕ್ರೋಸಾಫ್ಟ್ ಹಾಲೋಲೆನ್ಸ್‌, ಸ್ಯಾಮ್ಸಂಗ್‌ ವಿಆರ್‌, ಸೋನಿ ಪ್ಲೇಸ್ಟೇಷನ್‌ ವಿಆರ್‌ ಮತ್ತು ಗೂಗಲ್‌ ಕಾರ್ಡೋಬೋರ್ಡ್‌ ವಿಆರ್‌ ಗೇಮ್ಸ್‌ ಹೆಡ್‌ಸೆಟ್‌ಗಳನ್ನು ಹೊಂದಿವೆ. ಇವುಗಳಲ್ಲಿ ಹೆಚ್ಚಿನವು ಸಂವೇದಕ ನಿಯಂತ್ರಕಗಳನ್ನು ಮತ್ತು ಹೆಡ್‌ಸೆಟ್‌ನೊಂದಿಗೆ ಕೆಲಸ ಮಾಡುತ್ತವೆ. ಇದರೊಂದಿಗೆ ಸ್ಮಾರ್ಟ್‌ ಫೋನ್‌ಗಳ ಆ್ಯಪ್‌ ಮೂಲಕ ವಿಆರ್‌ ಹಾಕಿಕೊಂಡೂ ಆಟಗಳನ್ನು ಆಡಬಹುದು. 3ಡಿ ಸಿನೆಮಾಗಳನ್ನೂ ನೋಡಬಹುದು.

ಭರ್ಜರಿ ಬೆಲೆ
ವಿಆರ್‌ ಹೆಡ್‌ಸೆಟ್‌ಗಳು 60 ಸಾವಿರ ರೂ.ಗಳಿಂದ ಹಿಡಿದು, 2, 3 ಸಾವಿರ ರೂ. ವರೆಗೆ ಇವೆ. ಸ್ಮಾರ್ಟ್‌ ಫೋನ್‌ ಜತೆ ಬಳಕೆ ಮಾಡಬಲ್ಲ ಹೆಡ್‌ಸೆಟ್‌ ಗಳು ಕಡಿಮೆ ಬೆಲೆಗೆ ಲಭ್ಯವಿದ್ದು, ಸುಮಾರು 900 ರೂ.ಗಳಿಗೆ ಲಭ್ಯ. ಆದರೆ ಸ್ಪರ್ಶ ಸಂವೇದನೆ ನೀಡಬಲ್ಲ ಜಾಯ್‌ಸ್ಟಿಕ್‌ಗಳು ಬೇಕಾದರೆ ದುಬಾರಿ ಬೆಲೆ ತೆರಲೇ ಬೇಕು!

ಪ್ರಸಿದ್ಧ ವಿಆರ್‌ ಗೇಮ್ಸ್‌ ಯಾವುದು?
 ಕ್ಲೌಡ್  ಲ್ಯಾಂಡ್‌, ದ ಬ್ರೊಕವೆನ್‌ ಎಕ್ಸ್‌ ಪರಿಮೆಂಟ್‌, ಟಿಲ್ಟ್ ಬ್ರಶ್‌, ಬ್ಯಾಟ್‌ಮೆನ್‌ ಆರ್ಯಾಂ  ವಿಆರ್‌, ದ ಲಾಸ್ಟ್‌ ಸೋಲ್‌, ರೋಬೋ ರೀ ಕಾಲ್‌, ದ ಲ್ಯಾಬ್‌, ಹೀಗೆ ಹಲವಾರು ಗೇಮ್‌ಗಳಿದ್ದು ಕೆಲವು ಫ್ರೀ ಆಗಿದ್ದರೆ ಇನ್ನು ಕೆಲವು ಹಣ ಕೊಟ್ಟು ಖರೀದಿಸಬೇಕು. 

ಧನಾತ್ಮಕ ಅಂಶ 
· ಮನೋರಂಜನೆ
· ಶಿಕ್ಷಣ, ಹೊಸ ವಿಚಾರಗಳ ಅರಿವು
· ವರ್ಚುವಲ್‌ ರಿಯಾಲಿಟಿ ಥೆರಪಿ
· ವೈದ್ಯಕೀಯ ತರಬೇತಿ

ಋಣಾತ್ಮಕ ಅಂಶ 
· ಕ್ರೂರತೆಗೆ ಕಾರಣ
· ಮಕ್ಕಳ ಮನಸ್ಸಿನ ಮೇಲೆ ಪರಿಣಾಮ
· ಅಧಿಕ ಸಮಯ ಕಾಲ ಹರಣ (ಚಟ)
· ಆರೋಗ್ಯಕ್ಕೆ ನಕಾರಾತ್ಮಕ ಪರಿಣಾಮ

 ಭರತ್‌ರಾಜ್‌ ಕರ್ತಡ್ಕ