ಹೊಸ ದಾಖಲೆ ಬರೆದ ‘ಬಾಗ್ಲು ತೆಗಿ ಮೇರಿ ಜಾನ್’ ಹಾಡು

Team Udayavani, Feb 4, 2022, 4:27 PM IST

ನವರಸನಾಯಕ ಜಗ್ಗೇಶ್‌ ನಟನೆಯ ಪ್ಯಾನ್‌ ಇಂಡಿಯಾ ಸಿನಿಮಾ ತೋತಾಪುರಿ ಇದೀಗ ಬಹುಭಾಷಿಗರ ಗಮನ ಸೆಳೆಯುವಲ್ಲಿ ಯಶಸ್ವಿಯಾಗಿದೆ. ಇತ್ತೀಚೆಗೆ ಬಿಡುಗಡೆಯಾದ ಈ ಚಿತ್ರದ “ಬಾಗ್ಲು ತೆಗಿ ಮೇರಿ ಜಾನ್‌’ ಹಾಡು ಮಿಲಿಯನ್‌ಗೂ ಅಧಿಕ ಹಿಟ್‌ ದಾಖಲಿಸಿ, ಸದ್ಯ ಎಲ್ಲೆಡೆ ವೈರಲ್‌ ಆಗಿದೆ. ಕನ್ನಡ ಮಾತ್ರವಲ್ಲದೇ ಹಿಂದಿ, ತಮಿಳು, ತೆಲುಗು ಭಾಷಿಕರ ಬಾಯಲ್ಲಿ ಈ ಹಾಡು ನಲಿದಾಡುತ್ತಿವೆ ಎಂಬುದು ಹೊಸ ವಿಷಯ.

ಹಾಡು ಬಿಡುಗಡೆಯಾದ ದಿನದಿಂದಲೂ ಕರ್ನಾಟಕ ರಾಜ್ಯದ ಮೂಲೆ ಮೂಲೆಗಳಲ್ಲೂ ಸಖತ್‌ ಸದ್ದು ಮಾಡುತ್ತಿದೆ. ಕಾಲೇಜು, ಪಾರ್ಕ್‌, ಹೋಟೆಲ್‌, ಸಭೆ-ಸಮಾರಂಭಗಳಲ್ಲಿ “ಬಾಗ್ಲು ತೆಗಿ ಮೇರಿ ಜಾನ್‌’ ಹಾಡಿನದ್ದೇ ಸೌಂಡು. ಇನ್ನು ಸಾಮಾಜಿಕ ಜಾಲತಾಣಗಳಲ್ಲೂ ಸಾಕಷ್ಟು ವೈರಲ್‌ ಆಗುವುದರ ಜೊತೆಗೆ ರೀಲ್ಸ್‌, ಯೂ ಟ್ಯೂಬ್‌ ಶಾಟ್ಸ್‌ ಹಾಗೂ ಸ್ಟೋರಿಸ್‌ ರೂಪದಲ್ಲೂ ಹಾಡು ಹರಿದಾಡುತ್ತಿದೆ.

ನಿರ್ದೇಶಕ ವಿಜಯಪ್ರಸಾದ್‌ ಅವರೇ ಸಾಹಿತ್ಯ ರಚಿಸಿರುವ ಈ ಹಾಡಿಗೆ ಅನೂಪ್‌ ಸೀಳಿನ್‌ ಸಂಗೀತವಿದೆ. ವಿಶೇಷವೆಂದರೆ ಮಹಿಳೆಯರು ಹೆಚ್ಚಾಗಿ ಮಕ್ಕಳು ಈ ಹಾಡಿಗೆ ನೃತ್ಯ ಮಾಡಿ ಸಂಭ್ರಮಿಸುತ್ತಿದ್ದು, ಈಗಾಗಲೇ ಸೋಶಿಯಲ್‌ ಮೀಡಿಯಾದಲ್ಲಿ ಹರಿದಾಡುತ್ತಿದೆ. ಜಗ್ಗೇಶ್‌ ಮ್ಯಾನರಿಸಂ ಹಾಗೂ ಅದಿತಿ ಡಾನ್ಸ್‌ ಸ್ಟೆಪ್‌ಗಳನ್ನು ಹೋಲುವಂತೆ ಸಾಕಷ್ಟು ವಿಡಿಯೋಗಳನ್ನು ಸೆಲೆಬ್ರಿಟಿಗಳೂ ಅಪ್ಲೊ ಮಾಡುತ್ತಿರೋದು ವಿಶೇಷ. ಈ ಹಾಡಿಗೆ ನೃತ್ಯ ಸಂಯೋಜನೆ ಮಾಡಿದ್ದು, ಮೋಹನ್‌ ಬಿ ಕೆರೆ ಸ್ಟುಡಿಯೋ ದಲ್ಲಿ ನೂರಾರು ಡ್ಯಾನರ್ ಹಾಗೂ ಪ್ರಮುಖ ಕಲಾವಿದರ ಮಧ್ಯೆ ಈ ಹಾಡು ಚಿತ್ರಿತವಾಗಿದೆ.

ಇದನ್ನೂ ಓದಿ:ಸಿನಿಮಾ ಮಂದಿಗೆ ಸಂತಸ ನೀಡಿದ ಸರ್ಕಾರ: ಚಲನಚಿತ್ರ ಮಂದಿರಗಳಲ್ಲಿ ಶೇ.100 ಪ್ರೇಕ್ಷರಿಗೆ ಅವಕಾಶ

ಲಕ್ಷಾಂತರ ಹಿಟ್ಸ್‌ ಆಗಿರುವ ಈ ಹಾಡನ್ನು ಮೋನಿಫಿಕ್ಸ್‌ ಆಡಿಯೋ ಯೂ ಟ್ಯೂಬ್‌ ಚಾನೆಲ್‌ನಲ್ಲಿ ಬಿಡುಗಡೆ ಮಾಡಲಾಗಿದೆ. ಕೆ.ಎ.ಸುರೇಶ್‌ ಈ ಚಿತ್ರದ ನಿರ್ಮಾಪಕರು. ಈ ಚಿತ್ರ ಎರಡು ಭಾಗಗಳಾಗಿ ಐದು ಭಾಷೆಗಳಲ್ಲಿ ತೆರೆಕಾಣಲಿದೆ. ಚಿತ್ರದ ತಾರಾಬಳಗದಲ್ಲಿ ಡಾಲಿ ಧನಂಜಯ್, ಸುಮನ್‌ ರಂಗನಾಥ್‌, ದತ್ತಣ್ಣ, ವೀಣಾ ಸುಂದರ್‌, ಹೇಮಾದತ್‌ ಸೇರಿದಂತೆ ಮೊದಲಾದವರಿದ್ದಾರೆ