Pension: ಈ ರಾಜ್ಯದಲ್ಲಿರುವ ಅವಿವಾಹಿತರಿಗೆ ಶೀಘ್ರದಲ್ಲೇ ಸಿಗಲಿದೆಯಂತೆ ಪಿಂಚಣಿ…

Team Udayavani, Jul 3, 2023, 2:08 PM IST

ಹರಿಯಾಣ: ಶೀಘ್ರದಲ್ಲೇ ಈ ರಾಜ್ಯದಲ್ಲಿರುವ ಅವಿವಾಹಿತರಿಗೆ ಪಿಂಚಣಿ ಸಿಗಲಿದೆಯಂತೆ. ಹೌದು ಹರಿಯಾಣದಲ್ಲಿ ಇನ್ನು ಮುಂದೆ 45 ರಿಂದ 60 ವರ್ಷ ವಯಸ್ಸಿನ ಅವಿವಾಹಿತರಿಗೆ ಪಿಂಚಣಿ ಸಿಗುವ ವಿಶ್ವಾಸವನ್ನು ಹರಿಯಾಣದ ಮುಖ್ಯಮಂತ್ರಿ ಮನೋಹರ್ ಲಾಲ್ ಖಟ್ಟರ್ ನೀಡಿದ್ದಾರೆ.

ಇಲ್ಲಿ ನಡೆದ ಸಾರ್ವಜನಿಕ ಸಂವಾದ ಕಾರ್ಯಕ್ರಮದಲ್ಲಿ 60 ವರ್ಷದ ಅವಿವಾಹಿತ ವೃದ್ಧರೊಬ್ಬರು ಇಟ್ಟಿರುವ ಬೇಡಿಕೆಗೆ ಸ್ಪಂದಿಸಿದ ಸಿಎಂ ಮನೋಹರ್ ಲಾಲ್ ಖಟ್ಟರ್ ಮುಂದಿನ ದಿನಗಳಲ್ಲಿ 45 ರಿಂದ 60 ವರ್ಷ ವಯಸ್ಸಿನ ಅವಿವಾಹಿತರಿಗೆ ಪಿಂಚಣಿ ನೀಡುವುದಾಗಿ ಹೇಳಿದ್ದಾರೆ. ಈ ನಿರ್ಧಾರದಿಂದ ಮುಂದಿನ ದಿನಗಳಲ್ಲಿ 45 ರಿಂದ 60 ವರ್ಷ ವಯಸ್ಸಿನ ಅವಿವಾಹಿತ ಪುರುಷರು ಮತ್ತು ಮಹಿಳೆಯರು ಇದರ ಲಾಭವನ್ನು ಪಡೆಯಲಿದ್ದಾರೆ.

ಪಿಂಚಣಿ ಯೋಜನೆಗೆ ಇದೆ ಷರತ್ತು…
ಅಂದಹಾಗೆ ಈ ಪಿಂಚಣಿ ಯೋಜನೆ ಎಲ್ಲರಿಗೂ ಅನ್ವಯಿಸುವುದಿಲ್ಲ ಬದಲಾಗಿ ನಿಮ್ಮ ವಾರ್ಷಿಕ ಆದಾಯ 1.80 ಲಕ್ಷಕ್ಕಿಂತ ಕಡಿಮೆ ಇರುವ ಸ್ನಾತಕೋತ್ತರರಿಗೆ ಮಾತ್ರ ಈ ಪಿಂಚಣಿ ನೀಡಲಾಗುತ್ತದೆ ಎಂದು ಸಿಎಂ ಕಚೇರಿ ಷರತ್ತು ವಿಧಿಸಿದೆ. ಸಿಎಂ ಕಚೇರಿ ಸಿದ್ಧಪಡಿಸಿರುವ ವರದಿ ಪ್ರಕಾರ 1.25 ಲಕ್ಷ ಅವಿವಾಹಿತರಿಗೆ ಈ ಯೋಜನೆಯಿಂದ ಪಿಂಚಣಿ ಸೌಲಭ್ಯ ಸಿಗಲಿದೆ ಎನ್ನಲಾಗಿದೆ.

ಈ ಸಂಬಂಧ ಸಿಎಂ ಈಗಾಗಲೇ ಅಧಿಕಾರಿಗಳ ಜತೆ ಸಭೆ ನಡೆಸಿದ್ದಾರೆ. ಹರಿಯಾಣ ಸರ್ಕಾರ ಈ ಯೋಜನೆಯನ್ನು ಒಂದು ತಿಂಗಳೊಳಗೆ ಜಾರಿಗೆ ತರಲು ಸಿದ್ಧತೆ ನಡೆಸಿದೆ. ಯೋಜನೆಯ ಅನುಷ್ಠಾನವಾದಲ್ಲಿ, ಹರಿಯಾಣ ಅವಿವಾಹಿತರಿಗೆ ಪಿಂಚಣಿ ನೀಡಿರುವ ಮೊದಲ ರಾಜ್ಯವಾಗಲಿದೆ.

2750 ರೂ. ಪಿಂಚಣಿ:
ಪ್ರಸ್ತುತ ಹರ್ಯಾಣದಲ್ಲಿ ವೃದ್ಧಾಪ್ಯ, ವಿಧವೆ ಮತ್ತು ಅಂಗವಿಕಲರಿಗೆ ಪಿಂಚಣಿ ನೀಡಲಾಗುತ್ತಿದೆ. ಹರಿಯಾಣ ಸರ್ಕಾರವು ಕುಬ್ಜ ಜನರಿಗೂ ಹಣಕಾಸಿನ ನೆರವು ನೀಡುತ್ತಿದೆ. ಇದೀಗ ಸರ್ಕಾರದಿಂದ ಅವಿವಾಹಿತರಿಗೆ 2,750 ರೂಪಾಯಿ ಪಿಂಚಣಿ ನೀಡಲು ನಿರ್ಧರಿಸಿದೆ.

ಇದನ್ನೂ ಓದಿ: 8ನೇ ತರಗತಿ ಬಾಲಕಿ ಮೇಲೆ ಅತ್ಯಾಚಾರವೆಸಗಿ ಕೊಲೆ, ಶವವನ್ನು ನದಿಗೆ ಎಸೆದ ರಿಕ್ಷಾ ಚಾಲಕ