ISRO; ಸೆಪ್ಟಂಬರ್‌ನಲ್ಲಿ ನಭಕ್ಕೆ ‘ವ್ಯೋಮಮಿತ್ರ’

Team Udayavani, Feb 6, 2024, 6:20 AM IST

ಹೊಸದಿಲ್ಲಿ: ಪ್ರಸಕ್ತ ವರ್ಷದ ಸೆಪ್ಟೆಂಬರ್‌ನಲ್ಲಿ ಇಸ್ರೋದ “ವ್ಯೋಮಮಿತ್ರ’ ಮಹಿಳಾ ರೋಬೋ ಗಗನ ಯಾತ್ರಿ ಬಾಹ್ಯಾಕಾಶ ಯಾನ ಕೈಗೊಳ್ಳಲಿದೆ. ಈ ಬಗ್ಗೆ ಕೇಂದ್ರ ಸಚಿವ ಡಾ.ಜಿತೇಂದ್ರ ಸಿಂಗ್‌ ಘೋಷಣೆ ಮಾಡಿದ್ದಾರೆ.

ಇಸ್ರೋ “ಗಗನಯಾನ’ ಯೋಜನೆಯ ಭಾಗವಾಗಿ ಈ ಯೋಜನೆ ಕೈಗೆತ್ತಿಕೊಳ್ಳಲಾಗುತ್ತದೆ ಎಂದು ಹೇಳಿದ್ದಾರೆ. ಮಾನಸಹಿತ “ಗಗನಯಾನ’ ಯೋಜನೆಯು 2025 ರಲ್ಲಿ ಆರಂಭವಾಗಲಿದೆ. ಮೊದಲು ಮೂವರು ಗಗನಯಾತ್ರಿಗಳು ಏಳು ದಿನಗಳ ಕಾಲ ಬಾಹ್ಯಾಕಾಶಕ್ಕೆ ತೆರಳಲಿದ್ದಾರೆ. ಅಲ್ಲಿ ಅವರು ಬಾಹ್ಯಾಕಾಶ ಪರಿಣಾಮಗಳನ್ನು ಅನುಭವಿಸಿ, ಶೂನ್ಯ ಗುರುತ್ವಾಕರ್ಷಣೆಯ ಪ್ರಯೋಗಗಳನ್ನು ಮಾಡಲಿದ್ದಾರೆ’ ಎಂದರು.

“ಬಾಹ್ಯಾಕಾಶ ವಾತಾವರಣದಲ್ಲಿ ಮಾನವ ಕಾರ್ಯಚಟುವಟಿಕೆಗಳನ್ನು ಅನುಕರಿಸಲು ಮತ್ತು ಜೀವನಾಧಾರಕ ವ್ಯವಸ್ಥೆಯೊಂದಿಗೆ ಸಂವಹನ ನಡೆಸಲು “ವ್ಯೋಮಮಿತ್ರ’ ಯೋಜನೆಯನ್ನು ವಿನ್ಯಾಸಗೊಳಿಸಲಾಗಿದೆ’ ಎಂದು ಜಿತೇಂದ್ರ ಸಿಂಗ್‌ ಹೇಳಿದ್ದಾರೆ.