ಸ್ವರ ಭಾಸ್ಕರ ತಾರಸ್ಥಾಯಿ

Team Udayavani, Feb 8, 2019, 12:30 AM IST

ಸ್ವರ ಭಾಸ್ಕರ ಬಾಲಿವುಡ್‌ನ‌ ದಿಟ್ಟ ಧ್ವನಿ ಎಂದೇ ಪರಿಚಿತೆ. ಯಾವುದೇ ವಿಷಯದ ಬಗ್ಗೆ ನಿರ್ಬಿಢೆಯಿಂದ ಮಾತನಾಡಬಲ್ಲ ಸ್ವರ ಈ ಕಾರಣಕ್ಕಾಗಿಯೇ ಬಾಲಿವುಡ್‌ನ‌ಲ್ಲಿ ಸ್ನೇಹಿತರಿಗಿಂತಲೂ ಹೆಚ್ಚು ವೈರಿಗಳನ್ನು ಹೊಂದಿದ್ದಾಳೆ. ಅನೇಕ ವೇಳೆ ಅವಳ ಹೇಳಿಕೆ ರಾಷ್ಟ್ರಮಟ್ಟದಲ್ಲಿ ಸುದ್ದಿ ಮಾಡಿದ್ದೂ ಇದೆ. ಸರಕಾರದವರನ್ನು ಕೆರಳಿಸಿದ ಹೇಳಿಕೆ ನೀಡಿದರೂ ಯಾರಿಗೂ ಅಂಜದೆ ತಾನು ಮಾಡಿದ್ದೇ ಸರಿ ಎನ್ನುವಂತೆ ಇದ್ದಾಳೆ ಸ್ವರ. ಚಿತ್ರರಂಗಕ್ಕೆ ಬಂದು ಹತ್ತು ವರ್ಷಗಳೇ ಆದರೂ ಇನ್ನೂ ಸ್ವರ ಆರಕ್ಕೇರದ ಮೂರಕ್ಕಿಳಿಯದ ಸ್ಥಿತಿಯಲ್ಲೇ ಇದ್ದಾಳೆ. ಇದಕ್ಕೆ ಕಾರಣ ಆಕೆಯ ಡೋಂಟ್‌ಕೇರ್‌ ಧೋರಣೆ ಮತ್ತು ಬಿಚ್ಚುನುಡಿ ಎನ್ನುವುದು ಬಲ್ಲವರ ಅಭಿಪ್ರಾಯ. ಚಿತ್ರರಂಗದ ಎಲ್ಲವನ್ನೂ ಸರಿದೂಗಿಸಿಕೊಂಡು ಹೋಗುವ ಸ್ವಭಾವ ಸ್ವರಳದ್ದಲ್ಲ. ಹೀಗಾಗಿ ಯಾರೂ ಅವಳನ್ನು ಹುಡುಕಿಕೊಂಡು ಬಂದು ಅವಕಾಶ ಕೊಡುವುದಿಲ್ಲ. ಹೀಗಾಗಿಯೇ ಹತ್ತು ವರ್ಷಗಳಲ್ಲಿ ಸ್ವರ ನಟಿಸಿದ್ದು ಬೆರಳೆಣಿಕೆಯ ಚಿತ್ರಗಳಲ್ಲಿ. 

ಅದೂ ನಾಯಕಿಯ ಗೆಳತಿ, ಅಕ್ಕ ಹೀಗೆ ಪೋಷಕ ಪಾತ್ರಗಳಲ್ಲಿ. ಇಂಥ ಪಾತ್ರಗಳಲ್ಲೂ ತನ್ನ ಛಾಪು ಮೂಡಿಸುವ ಪ್ರತಿಭಾವಂತೆ ಸ್ವರ. ಅವಳ ತಂದೆ ನೌಕಾಪಡೆಯ ಅಧಿಕಾರಿ. ತಾಯಿ ಗೃಹಿಣಿ, ಹುಟ್ಟಿದ್ದು, ಬೆಳೆದದ್ದು ,  ಕಲಿತದ್ದೆಲ್ಲ ದಿಲ್ಲಿಯಲ್ಲಿ. ಹೀಗಾಗಿ ಮೂಲತಃ ದಕ್ಷಿಣದವಳಾದರೂ ಸ್ವರ ಉತ್ತರ ಭಾರತೀಯಳೆಂದೇ ಗುರುತಿಸಲ್ಪಡುತ್ತಾಳೆ. ಇದೀಗ ಸ್ವರ ಸಹೋದರನ ಜತೆಗೆ ಸೇರಿ ಸಿನೆಮಾ ನಿರ್ಮಾಣ ಕಂಪೆನಿ ಸ್ಥಾಪಿಸಿದ್ದಾಳೆ. ಹಾಗೆಂದು ಇದು ಮಾಮೂಲಿ ಮಸಾಲೆ ಚಿತ್ರಗಳನ್ನು ತಯಾರಿಸುವ ಕಂಪೆನಿಯಲ್ಲ. ತಾಜಾ, ಹೊಸತನವಲ್ಲ ಕತೆಗಳಿಗೆ ಅವಕಾಶ ನೀಡುವ ಸಲುವಾಗಿಯೇ ಪ್ರೊಡಕ್ಷನ್‌ ಬ್ಯಾನರ್‌ ಪ್ರಾರಂಭಿಸಿದ್ದೇನೆ ಎಂದು ಸ್ವರ ಹೇಳಿಕೊಂಡಿದ್ದಾಳೆ.