ಡಿ-ಎಲ್ ನಿಯಮಕ್ಕೆ ತುಂಬಿತು 28 ವರ್ಷ
ದಕ್ಷಿಣ ಆಫ್ರಿಕಾಕ್ಕೆ ಲಭಿಸಿತ್ತು ಒಂದು ಎಸೆತದಿಂದ 22 ರನ್ ಗುರಿ!
Team Udayavani, Mar 23, 2020, 7:00 AM IST
ಸಿಡ್ನಿ: ಇಂದಿಗೂ ಕ್ರಿಕೆಟಿನ ಅರ್ಥವಾಗದ ನಿಯಮವೆಂದರೆ “ಡಕ್ವರ್ತ್-ಲೂಯಿಸ್’ ಅಥವಾ ಮಳೆ ನಿಯಮ. ಅಂತಾರಾಷ್ಟ್ರೀಯ ಕ್ರಿಕೆಟ್ನಲ್ಲಿ ಇದನ್ನು ಮೊದಲ ಸಲ ಜಾರಿಗೊಳಿಸಿ ಮಾರ್ಚ್ 22ಕ್ಕೆ 28 ವರ್ಷ ತುಂಬಿತು. ಇದಕ್ಕೆ ಮೊದಲ ಬಲಿಯಾದ ತಂಡ, ಪ್ರಥಮ ಬಾರಿಗೆ ವಿಶ್ವಕಪ್ ಆಡಲಿಳಿದ ದಕ್ಷಿಣ ಆಫ್ರಿಕಾ!
ಅದು 1992ರ ವಿಶ್ವಕಪ್ ಪಂದ್ಯಾವಳಿಯ 2ನೇ ಸೆಮಿಫೈನಲ್. ಸಿಡ್ನಿಯಲ್ಲಿ ಇಂಗ್ಲೆಂಡ್-ದಕ್ಷಿಣ ಆಫ್ರಿಕಾ ಹೋರಾಟಕ್ಕಿಳಿದಿದ್ದವು. ಮೊದಲು ಬ್ಯಾಟಿಂಗ್ ನಡೆಸಿದ ಇಂಗ್ಲೆಂಡ್ 45 ಓವರ್ಗಳಲ್ಲಿ 6 ವಿಕೆಟಿಗೆ 256 ರನ್ ಮಾಡಿತ್ತು. ಅಮೋಘ ಚೇಸಿಂಗ್ ನಡೆಸಿದ ದಕ್ಷಿಣ ಆಫ್ರಿಕಾ ಗೆಲುವಿನ ಅಂಚಿಗೆ ಬಂದಿತ್ತು. 4 ವಿಕೆಟ್ ನೆರವಿನಿಂದ ಕೊನೆಯ 13 ಎಸೆತಗಳಲ್ಲಿ 22 ತೆಗೆಯುವ ಸುಲಭ ಟಾರ್ಗೆಟ್ ಎದುರಿತ್ತು.
ಎಲ್ಲರಿಗೂ ಶಾಕ್!
ಈ ಹೊತ್ತಿಗೆ ಸರಿಯಾಗಿ ಮಳೆ ಸುರಿಯಿತು. ಪಂದ್ಯ ಸ್ಥಗಿತಗೊಂಡಿತು. ಆಗ ಯಾರಿಗೂ ಮಳೆ ನಿಯಮದ ತಿಳಿವಳಿಕೆ ಇರಲಿಲ್ಲ. ದಕ್ಷಿಣ ಆಫ್ರಿಕಾ ಇಲ್ಲಿಂದಲೇ ಆಟ ಮುಂದುವರಿಸಿ ಗೆದ್ದು ಬರುತ್ತದೆಂದೇ ಎಲ್ಲರೂ ಭಾವಿಸಿದ್ದರು. ಆದರೆ ಅಲ್ಲಿ ಸಂಭವಿಸಿದ್ದೇ ಬೇರೆ. ಸಿಡ್ನಿ ಅಂಗಳದ ದೈತ್ಯ ಸ್ಕೋರ್ಬೋರ್ಡ್ “ಒಂದು ಎಸೆತದಿಂದ 22 ರನ್’ ಎಂಬ ಮರು ನಿಗದಿತ ಗುರಿಯನ್ನು ಬಿತ್ತರಿಸಿದಾಗ ಎಲ್ಲರಿಗೂ ಶಾಕ್!
ಇಂಗ್ಲೆಂಡ್ ಇನ್ನಿಂಗ್ಸ್ ವೇಳೆ ಓವರ್ ಗತಿಯನ್ನು ಕಾಯ್ದುಕೊಳ್ಳದಿದ್ದುದು, ಮಳೆ ಯಿಂದ ಸಂಭವಿಸಿದ ನಷ್ಟವನ್ನೆಲ್ಲ ಪರಿಗಣಿಸಿ ನೂತನ ನಿಯಮದಂತೆ ಗುರಿಯನ್ನು
ಮರು ನಿಗದಿಗೊಳಿಸಲಾಗಿತ್ತು.
ನಾಟೌಟ್ ಬ್ಯಾಟ್ಸ್ಮನ್ಗಳಾಗಿದ್ದ ಬ್ರಿಯಾನ್ ಮೆಕ್ಮಿಲನ್ (21) ಮತ್ತು ಡೇವಿಡ್ ರಿಚರ್ಡ್ಸನ್ (13) ತೀವ್ರ ಹತಾಶೆಯಿಂದ ವಾಪಸ್ ಕ್ರೀಸಿಗೆ ಬರುತ್ತಿದ್ದ ದೃಶ್ಯಾವಳಿ ಇಂದಿಗೂ ಕಣ್ಣಿಗೆ ಕಟ್ಟಿದಂತಿದೆ. ಡಕ್ವರ್ತ್-ಲೂಯಿಸ್ ನಿಯಮ ಈಗಲೂ ಕ್ರಿಕೆಟ್ ಪ್ರೇಮಿಗಳನ್ನು ಅಣಕಿಸುತ್ತಲೇ ಇದೆ!