ಇಲ್ಲಿ ಮಾಸ್ಕ್ ಹಾಕದಿದ್ರೆ 5 ಸಾವಿರ, ಕೈತೊಳೆಯಲು ಸೋಪ್ ಇಡದಿದ್ರೆ 1 ಸಾವಿರ ದಂಡ!

Team Udayavani, Apr 30, 2020, 6:38 PM IST

ಸಾಂದರ್ಭಿಕ ಚಿತ್ರವನ್ನು ಬಳಸಲಾಗಿದೆ – Representative Image Used

ತಿರುವನಂತಪುರ: ಮನೆಯಿಂದ ಮಾಸ್ಕ್ ಇಲ್ಲದೆ ಹೊರಗಡೆ ಬಂದರೆ 5000ರೂ. ದಂಡ ಕಟ್ಟಬೇಕು. ಅಂಗಡಿಗಳಲ್ಲಿ ಕೈ ಶುಚಿ ಮಾಡಿಕೊಳ್ಳಲು ಸೋಪು ಇಟ್ಟಿಲ್ಲ ಅಂದರೆ 1000ರೂ. ದಂಡ ಪಾವತಿ ಮಾಡಬೇಕು. ಗಾಬರಿಯಾಗಬೇಡಿ. ಇದು ನಮ್ಮಲ್ಲಿ ಅಲ್ಲ, ವಯನಾಡಲ್ಲಿ.

ಅಲ್ಲಿನ ಪೊಲೀಸ್‌ ವರಿಷ್ಠಾಧಿಕಾರಿ ಆರ್‌. ಇಲಾಂಗೋ ಸಾರ್ವಜನಿಕರಿಗೆ ಈ ದಂಡದ ಬಗ್ಗೆ ಬುಧವಾರ ಪ್ರಕಟಣೆ ನೀಡಿದ್ದಾರೆ.  ಕಾಂಗ್ರೆಸ್‌ ಪಕ್ಷದ ಮಾಜಿ ಅಧ್ಯಕ್ಷ ರಾಹುಲ್‌ ಗಾಂಧಿ ಕಳೆದ ಲೋಕಸಭಾ ಚುನಾವಣೆಯಲ್ಲಿ ಸ್ಪರ್ಧಿಸಿದ್ದ ಈ ವಯನಾಡ್‌, ಪ್ರಸ್ತುತ ಹಸಿರು ವಲಯದಲ್ಲಿದೆ.

ಈ ತನಕ ಒಂದೇ ಒಂದು ಕೋವಿಡ್ ಪಾಸಿಟಿವ್‌ ಪ್ರಕರಣಗಳು ದಾಖಲಾಗಿಲ್ಲ. ಆದರೆ, 842 ಮಂದಿಯ ಮೇಲೆ ನಿಗಾವಹಿಸಿದ್ದು, 9 ಮಂದಿಯನ್ನು ಆಸ್ಪತ್ರೆಯಲ್ಲಿ ಇರಿಸಲಾಗಿದೆ.

ಈ ನಡುವೆ ಇಲ್ಲಿನ ಸಂಸದ ಹಾಗೂ ಕಾಂಗ್ರೆಸ್ ಪಕ್ಷದ ವರಿಷ್ಠ ರಾಹುಲ್‌ ಗಾಂಧಿ ಅವರು ಮಂಗಳವಾರದಂದು ವಯನಾಡಿನ ಜನರ ಜೊತೆ ಮಾತಕತೆ ನಡೆಸಿ, ಕೋವಿಡ್ ಸೋಂಕು ನಿರ್ಮೂಲನಕ್ಕೆ ಅಗತ್ಯವಿರುವ ಎಲ್ಲಾ ನೆರವುಗಳನ್ನು ಒದಗಿಸಿಕೊಡುವುದಾಗಿ ತನ್ನ ಕ್ಷೇತ್ರದ ಜನರಿಗೆ ಧೈರ್ಯ ತುಂಬಿದ್ದಾರೆ.