ಮುಂದಿನ 5 ವರ್ಷದ ನೀಲನಕ್ಷೆ

ಬಂದ್‌ ಆಗಬಹುದು ಈ ವಾಹನಗಳು
ದೇಶದಲ್ಲಿ ವಾಯುಮಾಲಿನ್ಯ ಪ್ರಮಾಣ ಅಪಾಯಕಾರಿ ಮಟ್ಟ ಮುಟ್ಟುತ್ತಿರುವುದರಿಂದ, ಸರ್ಕಾರ 2000ನೇ ಇಸವಿಗೂ ಮೊದಲು ನೋಂದಣಿಯಾದ ವಾಹನಗಳ ಬಳಕೆಯನ್ನು ನಿಷೇಧಿಸಬಹುದು.

ಆನಂದ್‌ ಮಹಿಂದ್ರಾ ಅಶಾವಾದ
ಮಹಿಂದ್ರಾ ಆ್ಯಂಡ್‌ ಮಹಿಂದ್ರಾ ಸಮೂಹದ ಮುಖ್ಯಸ್ಥ ಆನಂದ್‌ ಮಹಿಂದ್ರಾ ಅವರು ವಾಹನಗಳ ಮೇಲಿನ ಜಿಎಸ್‌ಟಿ ತಗ್ಗಿಸುವುದರಿಂದ ಅರ್ಥವ್ಯವಸ್ಥೆಗೆ ಲಾಭವಾಗಬಹುದು ಎಂದು ಅಭಿಪ್ರಾಯಪಟ್ಟಿದ್ದಾರೆ. ‘ಚಿಕ್ಕ ಕಂಪನಿಗಳು ಮತ್ತು ಉದ್ಯೋಗಗಳ ಮೇಲೆ ಆಟೋ ಇಂಡಸ್ಟ್ರಿಯ ಪ್ರಭಾವ ವ್ಯಪಕವಾಗಿದೆ. ಇದು ದೇಶದಲ್ಲಿ ಅತಿ ಹೆಚ್ಚು ಉದ್ಯೋಗ ನಿರ್ಮಿಸುವ ಮೂರನೇ ಅತಿದೊಡ್ಡ ವಲಯವಾಗಿದೆ. ವಾಹನಗಳ ಮೇಲಿನ ಜಿಎಸ್‌ಟಿ ಕಡಿತದಿಂದಾಗಿ, ಈ ವಲಯ ಸುಧಾರಿಸಿಕೊಳ್ಳುತ್ತದೆ’ ಎನ್ನುತ್ತಾರೆ ಮಹಿಂದ್ರಾ. ಪ್ರಸಕ್ತ ವಾಹನಗಳ ಮೇಲೆ 28 ಪರ್ಸೆಂಟ್ ಜಿಎಸ್‌ಟಿ ಅನ್ವಯವಾಗುತ್ತಿದೆ, ಇದರಿಂದಾಗಿ ಕಳೆದ 11 ತಿಂಗಳಿಂದ ವಾಹನ ಖರೀದಿ ಪ್ರಮಾಣ ಬಹಳ ತಗ್ಗಿದ್ದು, ಸರ್ಕಾರ ಜಿಎಸ್‌ಟಿಯನ್ನು 18 ಪ್ರತಿಶತಕ್ಕೆ ಇಳಿಸಬಹುದಾದ ಸಾಧ್ಯತೆ ಇದೆ.

ಬಗೆಹರಿಯುವುದೇ ರೈತರ ಸಮಸ್ಯೆ?
ದೇಶದ ರೈತರಿಗೆ ಪ್ರತಿ ವರ್ಷ ಆರು ಸಾವಿರ ರೂಪಾಯಿ ಮತ್ತು ಪೆನ್ಶನ್‌ ಘೋಷಣೆಯ ನಂತರ ಮೋದಿ ಸರ್ಕಾರ, ಕಿಸಾನ್‌ ಕ್ರೆಡಿಟ್ ಕಾರ್ಡ್‌ನ ಮೇಲೆ ಬಡ್ಡಿ ಮುಕ್ತ ಸಾಲ ನೀಡಬಹುದು ಎಂಬ ನಿರೀಕ್ಷೆ ಇದೆ. ಇದಷ್ಟೇ ಅಲ್ಲದೇ, ಕೃಷಿ ವಲಯಕ್ಕಾಗಿಯೇ ವಿತ್ತ ಸಚಿವಾಲಯ 12 ಸೂತ್ರಗಳ ಕಾರ್ಯಕ್ರಮದ ಪ್ರಸ್ತಾವವನ್ನೂ ತಯ್ನಾರು ಮಾಡಿಕೊಂಡಿದೆ. ದೇಶದ ರೈತರನ್ನು ಗಮನದಲ್ಲಿಟ್ಟುಕೊಂಡೇ ಮೋದಿ ಸರ್ಕಾರ ಪ್ರಧಾನಮಂತ್ರಿ ಕಿಸಾನ್‌ ಸಮ್ಮಾನ್‌ ನಿಧಿ, ಪ್ರಧಾನಮಂತ್ರಿ ಶ್ರಮ ಮಾನಧನ ಪೆನ್ಶನ್‌ ಯೋಜನೆಯಂಥ ಜನಪ್ರಿಯ ಯೋಜನೆಗಳನ್ನು ಘೋಷಿಸಿದೆ. ಈಗ ಮೋದಿ 2.0 ಸರ್ಕಾರ ದೇಶದ ರೈತರ ಸಂಕಷ್ಟಗಳನ್ನು ಪರಿಹರಿಸಲು ಅನೇಕ ಯೋಜನೆಗಳನ್ನು ಘೋಷಿಸಬಹುದು. ಪರಿಣತರ ಪ್ರಕಾರ, ಈ ಬಾರಿ ರೈತರ ಸಹಾಯಕ್ಕಾಗಿ ಕೇಂದ್ರ ಸರ್ಕಾರ 30 ಪ್ರತಿಶತ ಹೆಚ್ಚು ಹಣವನ್ನು ಮೀಸಲಿರಿಸಲಿದೆ. ಅಷ್ಟೇ ಅಲ್ಲ, ರೈತರಿಗಾಗಿ ಫ್ಲ್ಯಾಗ್‌ಶಿಪ್‌ ಯೋಜನೆಗಳನ್ನೂ ಆರಂಭಿಸಬಹುದು. ಇದರೊಟ್ಟಿಗೆ, ಕನಿಷ್ಠ ಬೆಂಬಲ ಬೆಲೆಯಲ್ಲಿ ಹೆಚ್ಚಳ, ಸಾಲದ ಸುಳಿಯಿಂದ ಕಂಗೆಟ್ಟಿರುವ ರೈತರಿಗೆ ಬಡ್ಡಿ ದರದಲ್ಲಿ ಇಳಿಕೆ, ಸಹಾಯಧನ ಹಾಗೂ ಗೊಬ್ಬರದ ಮೇಲೂ ಸಬ್ಸಿಡಿ ನೀಡಬಹುದು.