Jamakhandi ಐಬಿಯಲ್ಲಿ ಪಾರ್ಟಿ: ಐವರು ಅಧಿಕಾರಿಗಳ ಅಮಾನತು

Team Udayavani, May 25, 2024, 10:13 PM IST

ಬಾಗಲಕೋಟೆ: ಜಮಖಂಡಿಯ ಸರಕಾರಿ ಅತಿಥಿ ಗೃಹದಲ್ಲಿ ಗುತ್ತಿಗೆದಾರರೊಂದಿಗೆ ಮದ್ಯ ಸೇವನೆ ಪಾರ್ಟಿ ಮಾಡಿದ್ದ ಐವರು ಹಿರಿಯ ಮತ್ತು ಕಿರಿಯ ಅಧಿಕಾರಿಗಳನ್ನು ಜಿಲ್ಲಾ ಚುನಾವಣಾಧಿ ಕಾರಿಯೂ ಆಗಿರುವ ಜಿಲ್ಲಾಧಿಕಾರಿ ಜಾನಕಿ ಕೆ.ಎಂ. ಅಮಾನತುಗೊಳಿಸಿ ಆದೇಶಿಸಿದ್ದಾರೆ.

ಜಮಖಂಡಿ ಉಪವಿಭಾಗದ ಪಂಚಾಯತ್‌ ರಾಜ್‌ ಎಂಜನಿಯರಿಂಗ್‌ ವಿಭಾಗದ ಸಹಾಯಕ ಅಭಿಯಂತ ರಾಮಪ್ಪ ರಾಠೊಡ್‌, ಸಹಾಯಕ ಕಾರ್ಯ ನಿರ್ವಾಹಕ ಅಭಿಯಂತ ಎಸ್‌.ಎಂ. ನಾಯಕ, ಕಿರಿಯ ಅಭಿಯಂತ ಗಜಾನನ ಪಾಟೀಲ್‌, ಸಹಾಯಕ ಅಭಿಯಂತ ಜಗದೀಶ ನಾಡಗೌಡರ ಹಾಗೂ ಜಮಖಂಡಿ ಲೋಕೋಪಯೋಗಿ ಇಲಾಖೆಯ ಕಿರಿಯ ಅಭಿಯಂತ ಎಸ್‌.ಆರ್‌. ಜಂಬಗಿ ಅಮಾನತುಗೊಂಡವರು.

ಚುನಾವಣೆ ನೀತಿ ಸಂಹಿತೆ ಜಾರಿಯಲ್ಲಿದ್ದರೂ ಈ ಅಧಿಕಾರಿಗಳು, ಕೆಲವು ಗುತ್ತಿಗೆದಾರರೊಂದಿಗೆ ಜಮಖಂಡಿ ಲೋಕೋಪಯೋಗಿ ಇಲಾಖೆ ಅಧೀನದಲ್ಲಿರುವ ಪ್ರವಾಸಿ ಮಂದಿರ(ರಮಾ ನಿವಾಸ-ಐಬಿ)ದಲ್ಲಿ ಮದ್ಯ ಸೇವಿಸಿದ್ದರು. ಇದನ್ನು ಸಾರ್ವಜನಿಕರೊಬ್ಬರು ವೀಡಿಯೋ ಮಾಡಿ, ಸಾಮಾಜಿಕ ಜಾಲತಾಣದಲ್ಲಿ ಹರಿಬಿಡುವ ಜತೆಗೆ ಹಿರಿಯ ಅಧಿಕಾರಿಗಳ ವಾಟ್ಸ್‌ ಆ್ಯಪ್‌ಗೂ ಕಳುಹಿಸಿದ್ದರು.