ಲಾಕ್‌ಡೌನ್‌ ಕರೆ ಧಿಕ್ಕರಿಸಿದವರಿಗೆ ಲಾಠಿ ಬಿಸಿ!

Team Udayavani, Mar 25, 2020, 4:42 AM IST

ಉಡುಪಿ: ನಗರದಲ್ಲಿ ಮಂಗಳವಾರ ಹೊಟೇಲ್‌ಗ‌ಳು, ಮಾಲ್‌ಗ‌ಳು, ಚಿತ್ರಮಂದಿರಗಳು ಬಂದ್‌ ಆಗಿದ್ದವು.
ಕೆಎಸ್‌ಆರ್‌ಟಿಸಿ, ಖಾಸಗಿ ಬಸ್‌ ಓಡಾಟ ಸ್ಥಗಿತವಾಗಿತ್ತು. ಮೆಡಿಕಲ್‌, ದಿನಸಿ ಅಂಗಡಿ, ತರಕಾರಿ ಸಂತೆ, ಹಣ್ಣುಹಂಪಲು, ಮೀನು ಮಾರುಕಟ್ಟೆ ವ್ಯಾಪಾರಕ್ಕೆ ಮುಕ್ತವಾಗಿತ್ತು. ಜನರಿಲ್ಲದೆ ಸರಕಾರಿ ಕಚೇರಿ, ಬಸ್‌ ನಿಲ್ದಾಣ ಬಿಕೋ ಎನ್ನುತ್ತಿತ್ತು. ಈ ನಡುವೆಯೂ ಕರೆ ಧಿಕ್ಕರಿಸಿ ಅನಗತ್ಯ ಓಡಾಟ ನಡೆಸಿದ‌ ಜನರಿಗೆ ಪೊಲೀಸರು ಲಾಠಿ ಬೀಸಿದರು. ಆತಂಕದ ನಡುವೆಯೂ ದಿನಸಿ ಸಾಮಾನು ಖರೀದಿಗೆ ಜನರು ಸರದಿಯಂತೆ ಆಗಮಿಸಿದರು. ಇದು ಲಾಕ್‌ಡೌನ್‌ ದಿನವಾದ ಮಂಗಳವಾರ ಉಡುಪಿ ನಗರದಲ್ಲಿ ಕಂಡು ಬಂದ ಚಿತ್ರಣ.

ಕೋವಿಡ್-19 ಸೋಂಕು ಹರಡುವುದನ್ನು ತಡೆಗಟ್ಟಲು ಮುಂಜಾಗರೂಕತಾ ಕ್ರಮವಾಗಿ ಮಾ. 31ರ ವರೆಗೆ ಸರಕಾರ ಕರೆ ನೀಡಿದ್ದ ಲಾಕ್‌ ಡೌನ್‌ಗೆ ಉಡುಪಿ ನಗರದ ಜನತೆ ಸ್ಪಂದಿಸಿದ್ದರೂ, ಕರೆ ಧಿಕ್ಕರಿಸಿ ನಗರದಲ್ಲಿ ಅನೇಕ ವಾಹನಗಳಲ್ಲಿ ಓಡಾಡುತ್ತಿರುವುದು, ಸಾರ್ವಜನಿಕ ಸ್ಥಳಗಳು, ಬಸ್‌ನಿಲ್ದಾಣಗಳ ಮುಂದೆ ಜನ ನಿಂತಿರುವ ದೃಶ್ಯಗಳು ಕಂಡುಬಂದವು. ಅಂತಹವರನ್ನು ಗಸ್ತು ನಿರತ ಪೊಲೀಸರು ಸ್ಥಳದಿಂದ ತೆರಳುವಂತೆ ಸೂಚಿಸಿದರು.

ಮನೆಯಲ್ಲಿಯೇ ಉಳಿದ ನಾಗರಿಕರು
ಲಾಕ್‌ಡೌನ್‌ ಕರೆ ಪರಿಣಾಮ ಜನರು ಮನೆಯಿಂದ ಹೊರಬಾರದೆ ಮನೆಯೊಳ ಗಡೆಯೇ ಉಳಿದುಕೊಂಡರು. ನಗರದ ವಿವಿಧ ರಸ್ತೆಗಳಲ್ಲಿ ವಾಹನಗಳ ಸಂಚಾರ ಕಡಿಮೆಯಿತ್ತು. ಕೆಎಸ್‌ಆರ್‌ಟಿಸಿ, ಖಾಸಗಿ ಬಸ್‌ಗಳು ಸಂಚಾರ ಸ್ಥಗಿತಗೊಳಿಸಿದ್ದವು. ಖಾಸಗಿ ಬಾಡಿಗೆ ವಾಹನಗಳ ಓಡಾಟವಿರಲಿಲ್ಲ. ಹೊಟೇಲ್‌ಗ‌ಳು ಬಂದ್‌ ಆಗಿದ್ದರೂ ಕೆಲವು ಕಡೆಗಳಲ್ಲಿ ಪಾರ್ಸೆಲ್‌ ನೀಡಲಾಗುತ್ತಿತ್ತು. ಇಲೆಕ್ಟ್ರಾನಿಕ್‌ ಅಂಗಡಿಗಳು, ಶೋರೂಂಗಳು ಬಾಗಿಲು ಮುಚ್ಚಿದ್ದವು. ದಿನಸಿ ಅಂಗಡಿ, ಹಣ್ಣು ಹಂಪಲು ಅಂಗಡಿಗಳಲ್ಲಿ ಗ್ರಾಹಕರ ಸಂಖ್ಯೆ ಕಡಿಮೆಯಿತ್ತು. ಮನೆ ಬಿಟ್ಟು ಹೊರಬರದಂತೆ ಎಚ್ಚರಿಕೆ ನೀಡಿದ ಹಿನ್ನೆಲೆಯಲ್ಲಿ ಜನರು ಮನೆ ಬಿಟ್ಟು ಹೊರಗಡೆ ಬರಲು ಮನಸ್ಸು ಮಾಡಿರಲಿಲ್ಲ. ಅಗತ್ಯ ದಿನಸಿ ಸಾಮಗ್ರಿಗಳನ್ನು ಕೊಂಡುಕೊಳ್ಳಲು ಜನರು ಆತಂಕದ ನಡುವೆಯೂ ದಿನಸಿ ಅಂಗಡಿ ಕಡೆಗಳಿಗೆ ಆಗಮಿಸಿದ್ದರು.

ಹೆತ್ತವರಿಗೆ ಮಕ್ಕಳ ನಿಯಂತ್ರಣ ಕಷ್ಟ
ಇನ್ನು ಶಾಲಾ ಕಾಲೇಜುಗಳಿಗೆ ರಜೆಯನ್ನು ಘೋಷಣೆ ಮಾಡಿರುವುದರಿಂದ ಕೊರೊನಾ ಭಯವೂ ಇರುವುದರಿಂದ ಮಕ್ಕಳನ್ನು ಆಟವಾಡಲು ಹೊರಗಡೆ ಕಳುಹಿಸಲಿಕ್ಕೆ ಹೆತ್ತವರು ಭಯಪಡುತ್ತಿದ್ದರು. ಮನೆಗಳಲ್ಲಿ ಮಕ್ಕಳಿಗೆ ಮನೆಯೊಳಗೆ ಇರುವಂತೆ ತಿಳಿಹೇಳಲಾಗುತ್ತಿದೆ. ಸದ್ಯ ಯಾವುದೇ ಬೇಸಗೆ ಶಿಬಿರಗಳು, ಡಾನ್ಸ್‌ ತರಗತಿಗಳು ಎಲ್ಲವೂ ನಿಷಿದ್ಧ. ಸಂಜೆ ಹೊತ್ತು ಕಾಲಕಳೆಯಲು ಪಾರ್ಕ್‌ಗೆ
ಹೋಗಲು ಅವಕಾಶವಿಲ್ಲ. ಇದರಿಂದಾಗಿ ಅನಿವಾರ್ಯವಾಗಿ ಮಕ್ಕಳು ಮನೆಯಲ್ಲೇ ಇರುವಂತೆ ನೋಡಿಕೊಳ್ಳುತ್ತಿದ್ದೇವೆ ಎನ್ನುತ್ತಾರೆ ಉದ್ಯಾವರದ ಗೃಹಿಣಿ ಜಯಲಕ್ಷ್ಮೀ.

ಲಾಠಿ ಬೀಸಿ ಓಡಿಸಿದ ಪೊಲೀಸರು
ಮಾ.31ರ ವರೆಗೆ ಅಗತ್ಯ ಸಂದರ್ಭ ಹೊರತುಪಡಿಸಿ ಯಾರೂ ಮನೆ ಬಿಟ್ಟು ಹೊರ ಬಾರದಂತೆ ಜಿಲ್ಲಾಡಳಿತ, ಪೊಲೀಸ್‌ ಇಲಾಖೆ ಹಾಗೂ ವಿವಿಧ ಇಲಾಖೆಗಳು ಸಾರ್ವಜನಿಕರಲ್ಲಿ ಮನವಿ ಮಾಡಿವೆ. ಆದರೂ ಕೂಡ ಮಂಗಳವಾರ ಕೆಲವರು ಮನೆ ಬಿಟ್ಟು ಹೊರಗೆ ಓಡಾಡುತ್ತಿದ್ದರು. ಬಸ್‌ ನಿಲ್ದಾಣಗಳಲ್ಲಿ ಕೆಲವರು ನಿಂತುಕೊಂಡಿದ್ದರು. ಪೊಲೀಸರು ಗಸ್ತು ತಿರುಗುತ್ತಿದ್ದರು. ಕೆಎಸ್‌ಆರ್‌ಟಿಸಿ, ಮಣಿಪಾಲದಲ್ಲಿ ವಾಹನಗಳಲ್ಲಿ ತೆರಳುತ್ತಿದ್ದವರನ್ನು ಪೊಲೀಸರು ತಡೆದು ವಿಚಾರಿಸುತ್ತಿದ್ದರು. ಅನಗತ್ಯವಾಗಿ ತಿರುಗಾಡುತ್ತಿದ್ದವರಿಗೆ ಎಚ್ಚರಿಕೆ ನೀಡಿ ಸ್ಥಳದಿಂದ ತೆರಳುವಂತೆ ತಿಳಿಸುತ್ತಿದ್ದರು. ಕೆಎಸ್‌ಆರ್‌ಟಿಸಿ ಬಸ್‌ ನಿಲ್ದಾಣ ಸಹಿತ ಸಾರ್ವಜನಿಕ ಸ್ಥಳಗಳಲ್ಲಿ ಕಾರಣವಿಲ್ಲದೆ ನಿಂತಿದ್ದ ವ್ಯಕ್ತಿಗಳನ್ನು ಪೊಲೀಸರು ಲಾಠಿ ಬೀಸಿ ಅಲ್ಲಿಂದ ತೆಳುವಂತೆ ಸೂಚಿಸಿದರು.

ಮುನ್ನೆಚ್ಚರಿಕೆ ಅಗತ್ಯ
ಕೋವಿಡ್-19 ನಿಯಂತ್ರಣ ಬರುವವರೆಗೂ ಇಂತಹ ಪರಿಸ್ಥಿತಿಯಲ್ಲಿ ಜೀವನ ಸಾಗಿಸುವುದು ಅನಿವಾರ್ಯ. ಸೋಂಕಿನಿಂದ ತಮ್ಮನ್ನು ರಕ್ಷಣೆ ಮಾಡುವುದರ ಜತೆಗೆ ಇತರರಿಗೆ ಹರಡದಂತೆ ಜನರು ಎಚ್ಚರಿಕೆಯನ್ನು ವಹಿಸಬೇಕಿದೆ. ಮಾರ್ಚ್‌ 31ರ ತನಕ ನಿರ್ಬಂಧ ಜಾರಿಯಲ್ಲಿದ್ದು ಸೋಂಕು ನಿಯಂತ್ರಣಕ್ಕೆ ಸರಕಾರ ಹಾಗೂ ಆರೋಗ್ಯ ಇಲಾಖೆ ಸಾಕಷ್ಟು ಕ್ರಮಗಳನ್ನು ಕೈಗೊಳ್ಳುತ್ತಿದೆ. ಸದ್ಯ ಜಿಲ್ಲೆಯಲ್ಲಿ ಸೋಂಕಿತ ಪ್ರಕರಣ ದೃಢಪಡದೆ ಇದ್ದರೂ ಮುನ್ನೆಚ್ಚರಿಕೆ ವಹಿಸುವುದು ಅತ್ಯವಶ್ಯಕ. ಹೀಗಾಗಿ ಮನೆಯಲ್ಲಿಯೇ ಉಳಿದುಕೊಳ್ಳಲು ನಿರ್ಧರಿಸಿದ್ದಾಗಿ ನಾಗರಿಕರು ಅಭಿಪ್ರಾಯ ವ್ಯಕ್ತಪಡಿಸುತ್ತಾರೆ.