“ಭಾರತೀಯರು,ಚೀನೀಯರು ಎಸೆವ ತ್ಯಾಜ್ಯ ಲಾಸ್‌ ಏಂಜಲೀಸ್‌ಗೆ ಬರ್ತಿದೆ’

Team Udayavani, Nov 13, 2019, 7:17 PM IST

ನ್ಯೂಯಾರ್ಕ್‌: ಭಾರತ, ಚೀನ, ರಷ್ಯಾದಂತಹ ದೇಶಗಳು ಸಮುದ್ರಕ್ಕೆಸೆವ ತ್ಯಾಜ್ಯಗಳು ಲಾಸ್‌ ಏಂಜಲೀಸ್‌ ಕಡೆಗೆ ಬರುತ್ತಿವೆ. ಅಲ್ಲಿ ತ್ಯಾಜ್ಯ ನಿಯಂತ್ರಣಕ್ಕೆ ಅವರು ಏನನ್ನೂ ಮಾಡುತ್ತಿಲ್ಲ ಎಂದು ಅಮೆರಿಕದ ಅಧ್ಯಕ್ಷ ಡೊನಾಲ್ಡ್‌ ಟ್ರಂಪ್‌ ದೂರಿದ್ದಾರೆ.

ಹವಾಮಾನ ಬದಲಾವಣೆ ಒಂದು ಸಂಕೀರ್ಣ ವಿಚಾರವಾಗಿದ್ದು, ನಾನು ಈ ಬಗ್ಗೆ ಚಿಂತಿತನಾಗಿದ್ದೇನೆ ಮತ್ತು ನಾನೂ ಹಲವು ವಿಧದಲ್ಲಿ ಓರ್ವ ಪರಿಸರವಾದಿಯಾಗಿದ್ದೇನೆ ಎಂದು ಹೇಳಿದ್ದಾರೆ.

ನ್ಯೂಯಾರ್ಕ್‌ ಅರ್ಥಶಾಸ್ತ್ರ ಕ್ಲಬ್‌ ವತಿಯಿಂದ ನಡೆದ ಕಾರ್ಯಕ್ರಮದಲ್ಲಿ ಮಾತನಾಡುತ್ತ, ಹವಾಮಾನದ ಬಗ್ಗೆ ಹೆಚ್ಚು ಚಿಂತಿತನಾಗಿದ್ದೇನೆ. ನಾನು ಅತ್ಯಂತ ಶುದ್ಧ ಗಾಳಿ-ನೀರು ಜಗತ್ತಿನಲ್ಲಿರಬೇಕೆಂದು ಬಯಸುತ್ತೇನೆ ಎಂದು ಹೇಳಿದ್ದಾರೆ.

ಇದೇ ವೇಳೆ ಪ್ಯಾರಿಸ್‌ ಹವಾಮಾನ ಒಪ್ಪಂದ ಅಮೆರಿಕ ಪಾಲಿಗೆ ದುರಂತವಾಗಿದೆ. ಬೇರೆಲ್ಲ ದೇಶಗಳ ಬಗ್ಗೆ ಅದೇನೂ ಮಾಡಿಲ್ಲ. ಭಾರತದಂತೆ ನಾವು ಕೂಡ ಅಭಿವೃದ್ಧಿ ಹೊಂದುತ್ತಿರುವ ದೇಶವಾಗಿದೆ ಎಂದು ಪ್ರತಿಪಾದಿಸಿದ್ದಾರೆ.

ಅಚ್ಚರಿಯ ವಿಚಾರವೆಂದರೆ, ಈ ಮೊದಲು ಹವಾಮಾನ ಬದಲಾವಣೆ, ಜಾಗತಿಕ ತಾಪಮಾನ ಎಂದೇ ಇಲ್ಲ ಎಂದು ಹೇಳುತ್ತಿದ್ದ ಟ್ರಂಪ್‌ ಇದೀಗ ಬೇರೆ ದೇಶಗಳನ್ನು ಇದಕ್ಕೆ ದೂಷಿಸುತ್ತಿದ್ದಾರೆ. ಜಗತ್ತಿನಲ್ಲೇ ಅತ್ಯಧಿಕ ಇಂಗಾಲ ಹೊರಸೂಸುವ ದೇಶಗಳಲ್ಲಿ ಅಮೆರಿಕ ಮುಂಚೂಣಿಯಲ್ಲಿದೆ.


ಈ ವಿಭಾಗದಿಂದ ಇನ್ನಷ್ಟು

ಹೊಸ ಸೇರ್ಪಡೆ