ಇಲ್ಲಿನ ಮುಸ್ಲಿಮರು ದೇಶ ವಿರೋಧಿಗಳು ಎಂದು ವಿಶ್ವ ಮಟ್ಟದಲ್ಲಿ ಬಿಂಬಿಸಲು ಪಾಕ್ ಯತ್ನ

Team Udayavani, Sep 12, 2019, 8:48 PM IST

ನವದೆಹಲಿ: ಜಮೈತ್-ಉಲೇಮಾ-ಇ-ಹಿಂದ್ ನ ಸಾಮಾನ್ಯ ಸಮಿತಿ ಸಭೆಯು ಇಂದು ನಿರ್ಣಯ ಒಂದನ್ನು ಕೈಗೊಂಡಿದೆ ಮತ್ತು ಅದರ ಪ್ರಕಾರ, ‘ಕಾಶ್ಮೀರವು ಭಾರತದ ಅವಿಭಾಜ್ಯ ಅಂಗ’ ಎಂಬ ಅಂಶವನ್ನು ಸಂಘಟನೆಯು ಪುನರುಚ್ಛರಿಸಿದೆ. ಇಷ್ಟು ಮಾತ್ರವಲ್ಲದೇ ರಾಷ್ಟ್ರೀಯ ನಾಗರಿಕ ನೋಂದಣಿ ಹಾಗೂ ದೇಶದಲ್ಲಿರುವ ವಿದೇಶಿಯರನ್ನು ಗುರುತಿಸುವ ಸರಕಾರದ ನಿಲುವುಗಳನ್ನು ಈ ಸಮಿತಿಯು ಬೆಂಬಲಿಸಿದೆ.

ದೇಶದ ಭದ್ರತೆಯ ದೃಷ್ಟಿಯಿಂದ ಜಮ್ಮು ಕಾಶ್ಮೀರದಲ್ಲಿ 370ನೇ ವಿಧಿಯನ್ನು ರದ್ದುಗೊಳಿಸಿರುವ ಕೇಂದ್ರ ಸರಕಾರದ ಕ್ರಮವನ್ನು ನಿಶ್ಯರ್ಥವಾಗಿ ಬೆಂಬಲಿಸಲು ಈ ಸಮಿತಿಯ ಉನ್ನತ ಮಂಡಳಿ ಸದಸ್ಯರು ನಿರ್ಧರಿಸಿದ್ದಾರೆ.

ಇದೇ ಸಂದರ್ಭದಲ್ಲಿ ಸುದ್ದಿಸಂಸ್ಥೆಯೊಂದಿಗೆ ಮಾತನಾಡಿದ ಜಮೈತ್-ಉಲೇಮಾ-ಇ-ಹಿಂದ್ ನ ಸಾಮಾನ್ಯ ಕಾರ್ಯದರ್ಶಿ ಮೌಲಾನ ಮಹಮ್ಮದ್ ಮದನಿ ಅವರು, ‘ಭಾರತದಲ್ಲಿರುವ ಮುಸ್ಲಿಂ ಸಮುದಾಯ ದೇಶ ವಿರೋಧಿಗಳು ಎಂದು ಅಂತಾರಾಷ್ಟ್ರೀಯ ಮಟ್ಟದಲ್ಲಿ ಬಿಂಬಿಸುವ ವ್ಯವಸ್ಥಿತ ಸಂಚನ್ನು ಪಾಕಿಸ್ಥಾನ ಮಾಡುತ್ತಿದೆ. ಪಾಕಿಸ್ಥಾನದ ಈ ಸಂಚನ್ನು ನಾವು ಖಂಡಿಸುತ್ತೇವೆ ಮತ್ತು ನಮ್ಮ ಅಸ್ತಿತ್ವವನ್ನು ಭಾರತೀಯತೆಯಿಂದ ಬೇರ್ಪಡಿಸುವ ನೆರೆ ರಾಷ್ಟ್ರದ ಸಂಚಿಗೆ ಈ ನೆಲದ ಯಾವ ಮುಸ್ಲಿಂರೂ ಬಲಿಯಾಗುವುದಿಲ್ಲ’ ಎಂದು ಅವರು ದೃಢ ಧ್ವನಿಯಲ್ಲಿ ಹೆಳಿದ್ದಾರೆ.

#WATCH Mahmood Madani, Jamiat Ulema-e-Hind: Kashmir hamara tha, hamara hai, hamara rahega. Jahan Bharat hai wahin hum. pic.twitter.com/mSsrxEYGAm

— ANI (@ANI) September 12, 2019

ಜಮೈತ್-ಉಲೇಮಾ-ಇ-ಹಿಂದ್ ಸಂಘಟನೆಯೂ ಈ ಹಿಂದೆಯೂ ಸಹ 1951 ಮತ್ತು 1963ರಲ್ಲಿ ಕಾಶ್ಮೀರ ಭಾರತದ ಅವಿಭಾಜ್ಯ ಅಂಗ ಎಂಬ ನಿರ್ಣಯವನ್ನು ಹೊರಡಿಸಿತ್ತು ಮತ್ತು ನಾವು ಯಾವಾಗಲೂ ಈ ವಿಚಾರದಲ್ಲಿ ಭಾರತ ಸರಕಾರದ ನಿರ್ಧಾರದ ಪರವಾಗಿಯೇ ಇದ್ದೆವು ಎಂಬುದಕ್ಕೆ ಇದು ಸಾಕ್ಷಿ ಎಂದು ಮಹಮ್ಮದ್ ಅವರು ಇದೇ ಸಂದರ್ಭದಲ್ಲಿ ತಿಳಿಸಿದರು.

ಭಾರತದಲ್ಲಿರುವ ಮುಸ್ಲಿಂ ಪಂಡಿತರನ್ನು ಒಳಗೊಂಡಿರುವ ಪ್ರಮುಖ ಸಂಘಟನೆಗಳಲ್ಲಿ ಜಮೈತ್-ಉಲೇಮಾ-ಇ-ಹಿಂದ್ ಮುಂಚೂಣಿಯಲ್ಲಿರುವುದರಿಂದ ಸಂಘಟನೆ ಇಂದು ನೀಡಿರುವ ಈ ಹೇಳಿಕೆ ಭಾರತ ಮತ್ತು ಪಾಕಿಸ್ಥಾನದ ನಡುವೆ ಕಾಶ್ಮೀರ ವಿಚಾರಕ್ಕೆ ಸಂಬಂಧಿಸಿದಂತೆ ನಡೆಯುತ್ತಿರುವ ಬೆಳವಣಿಗೆಗಳಿಗೆ ಪ್ರಮುಖವಾದುದಾಗಿದೆ.

ದ್ವಿ ರಾಷ್ಟ್ರ ವಿಚಾರಕ್ಕೂ ವಿರೋಧ
ನಾವು ದ್ವಿ ರಾಷ್ಟ್ರ ವಿಚಾರವನ್ನೂ ಸಹ ಬಹಳ ಹಿಂದೆಯೇ ವಿರೋಧಿಸಿದ್ದೇವೆ. ಇದು ನಮ್ಮ ದೇಶ ಮತ್ತು ಈ ದೇಶದ ಸೌರ್ವಭೌಮತೆಯ ಜೊತೆ ಆಟವಾಡಲು ನಾವು ಯಾರಿಗೂ ಅವಕಾಶ ನೀಡುವುದಿಲ್ಲ ಎಂಬ ಮಾತುಗಳನ್ನು ಮೌಲಾನ ಮಹಮ್ಮದ್ ಮದನಿ ಅವರು ಒತ್ತಿ ಹೇಳಿದರು.