ಇವು ಸುಡೋದಲ್ಲ, ತಿನ್ನೋ ಪಟಾಕಿ!
ಲಕ್ನೋದ ಮಳಿಗೆಗಳಲ್ಲಿ "ಸಿಹಿ' ಪಟಾಕಿಗಳಿಗೆ ಭರ್ಜರಿ ಬೇಡಿಕೆ
Team Udayavani, Oct 26, 2019, 4:09 AM IST
ಲಕ್ನೋ: ದೀಪಾವಳಿ ಎಂದಾಕ್ಷಣ ನೆನಪಾಗುವುದೇ ದೀಪಗಳು ಹಾಗೂ ಪಟಾಕಿಗಳು. ಆದರೆ, ಉತ್ತರಪ್ರದೇಶದ ಲಕ್ನೋದಲ್ಲಿ ಈ ಬಾರಿಯ ವಿಶೇಷ ಏನು ಗೊತ್ತಾ? ಇಲ್ಲಿ ಸುಡುಮದ್ದುಗಳನ್ನು ಸುಡುವ ಹಾಗಿಲ್ಲ, ಬದಲಿಗೆ ತಿನ್ನಬೇಕು!
ಏಕೆಂದರೆ ಇಲ್ಲಿ ಸುಡುಮದ್ದುಗಳೆಲ್ಲ “ಸಿಹಿ’ಮದ್ದುಗಳಾಗಿ ಪ್ರತ್ಯಕ್ಷವಾಗಿವೆ! ಸುರು ಸುರು ಬತ್ತಿ ಹೋಗಿ ಸಿಹಿಸಿಹಿ ಬತ್ತಿಯಾಗಿಯೂ, ನೆಲಚಕ್ರ ಬರ್ಫಿಯಾಗಿಯೂ, ನಕ್ಷತ್ರ ಕಡ್ಡಿಯು ಚಾಕ್ಲೇಟ್ ಕಡ್ಡಿಯಾಗಿಯೂ ಬದಲಾಗಿದೆ. ಸಿಹಿತಿನಿಸಿನ ಅಂಗಡಿಗಳು ಹಾಗೂ ಬೇಕರಿಗಳಲ್ಲಿ ಇದನ್ನೆಲ್ಲ ನೋಡಿದ ಜನರು, “ಬೇಕರಿಗಳಲ್ಲೂ ಪಟಾಕಿ ಮಾರಲು ಶುರು ಮಾಡಿದರೋ’ ಎಂದು ಪ್ರಶ್ನಿಸುತ್ತಿದ್ದಾರಂತೆ.
ಹೌದು, ಲಕ್ನೋದ ಕೆಲವು ಖಾಸಗಿ ಉದ್ದಿಮೆದಾರರು, ಬೇಕರಿ ಅಂಗಡಿಯವರು, ಸಿಹಿತಿನಿಸಿನ ಮಳಿಗೆಯವರು ಸೇರಿ ಇಂಥದ್ದೊಂದು ಐಡಿಯಾವನ್ನು ಕಾರ್ಯಗತಗೊಳಿಸಿದ್ದಾರೆ. ಪ್ರತಿ ಬಾರಿಯ ಹಬ್ಬಕ್ಕೂ ಒಂದೇ ತೆರನಾದ ಬರ್ಫಿ, ರಸಗುಲ್ಲಾ, ಚಾಕ್ಲೇಟ್ಗಳನ್ನೇ ನೋಡಿ ಬೋರ್ ಆಗಿರುವ ಜನರಿಗೆ ವಿಭಿನ್ನ ಶೈಲಿಯ ತಿನಿಸುಗಳ ಮೂಲಕ ದೀಪಾವಳಿಯ ಖುಷಿ ಕೊಡೋಣ ಎಂದು ನಿರ್ಧರಿಸಿ, ಪಟಾಕಿಗಳನ್ನೇ ಹೋಲುವಂಥ ಸಿಹಿಖಾದ್ಯಗಳನ್ನು ತಯಾರಿಸಿದ್ದಾರೆ. ಈ “ತಿನ್ನುವ ಪಟಾಕಿ’ಗಳಿಗೀಗ ಭಾರೀ ಡಿಮ್ಯಾಂಡ್ ಉಂಟಾಗಿದ್ದು, ಜನರು ಖರೀದಿಗೆ ಮುಗಿಬೀಳುತ್ತಿದ್ದಾರೆ ಎನ್ನುತ್ತಾರೆ ವ್ಯಾಪಾರಿಗಳು.
ಬಿಳಿ ಚಾಕ್ಲೇಟ್ ಮತ್ತು ಟಾಫಿಯಿಂದ ಮಾಡಿದ ಸಟಿ ಬಾಂಬ್, ಚಾಕ್ಲೇಟ್ನಿಂದ ತಯಾರಿಸಿ ಸಿಲ್ವರ್ ಫಾಯಿಲ್ ಸುತ್ತಿರುವ ನಕ್ಷತ್ರ ಕಡ್ಡಿಗಳ ವ್ಯಾಪಾರವಂತೂ ಭರ್ಜರಿಯಾಗಿ ನಡೆಯುತ್ತಿದೆ. ಕಾರ್ಪೊರೇಟ್ ಕಂಪೆನಿಗಳು ಕೂಡ ಇವುಗಳನ್ನೇ ತಮ್ಮ ಉದ್ಯೋಗಿಗಳಿಗೆ ಹಬ್ಬದ ಉಡುಗೊರೆಯಾಗಿ ನೀಡುತ್ತಿವೆ. ಆರೋಗ್ಯದ ದೃಷ್ಟಿಯಿಂದ ಸಕ್ಕರೆ ಅಂಶ ಕಡಿಮೆಯಿರುವ ಖಾದ್ಯಗಳನ್ನೂ ತಯಾರಿಸಿದ್ದೇವೆ ಎನ್ನುತ್ತಾರೆ ವ್ಯಾಪಾರಿಗಳು.
ಟಾಪ್ ನ್ಯೂಸ್
ಈ ವಿಭಾಗದಿಂದ ಇನ್ನಷ್ಟು ಇನ್ನಷ್ಟು ಸುದ್ದಿಗಳು
ಸಲ್ಮಾನ್ ಮನೆ ಬಳಿ ಗುಂಡಿನ ದಾಳಿ: ಲಾರೆನ್ಸ್ ಬಿಷ್ಣೋಯ್ ಸಹೋದರನ ವಿರುದ್ಧ ಲುಕ್ ಔಟ್ ನೋಟಿಸ್
Manipura: ಉಗ್ರರ ದಾಳಿಗೆ ಇಬ್ಬರು CRPF ಯೋಧರು ಹತ… ಉಗ್ರರ ಪತ್ತೆಗೆ ಶೋಧ ಕಾರ್ಯಾಚರಣೆ
Delhi: ಮುಖ್ಯಮಂತ್ರಿ ಸ್ಥಾನಕ್ಕೆ ರಾಜೀನಾಮೆ ನೀಡಲು ಕೇಜ್ರಿವಾಲ್ ಮೀನಮೇಷ: ಹೈಕೋರ್ಟ್ ತರಾಟೆ
Google ಜಾಹೀರಾತಿಗೆ ಬಿಜೆಪಿ ವೆಚ್ಚ ಮಾಡಿದ ಹಣವೆಷ್ಟು ಗೊತ್ತೆ?
Vijay Mallya ಹಸ್ತಾಂತರಕ್ಕೆ ಫ್ರಾನ್ಸ್ನೊಂದಿಗೆ ಭಾರತ ಮಾತುಕತೆ