ಚೀನದ ಹೊಸ ವಾಣಿಜ್ಯ ರಾಕೆಟ್‌

Team Udayavani, Oct 22, 2019, 6:00 AM IST

ಬೀಜಿಂಗ್‌: ವಾಣಿಜ್ಯ ಉದ್ದೇಶಗಳಿಗಾಗಿ ಹಾರಿಬಿಡುವ ಉಪಗ್ರಹಗಳ ಉಡಾವಣೆಯು ಹೊಸ ಮಾರುಕಟ್ಟೆಯನ್ನು ಸೃಷ್ಟಿಸಿರುವ ಹಿನ್ನೆಲೆಯಲ್ಲಿ, ಚೀನ, ಹೊಸ ತಲೆಮಾರಿನ ರಾಕೆಟ್‌ಗಳ ಶ್ರೇಣಿಯೊಂದನ್ನು ಪರಿಚಯಿಸಿದೆ. ಈ ಮೂಲಕ, ಈ ಕ್ಷೇತ್ರದಲ್ಲಿ ಈಗಾಗಲೇ ಹೆಸರು ಮಾಡಿರುವ ಭಾರತದ ಇಸ್ರೋಗೆ ಚೀನ ಪ್ರತಿಸ್ಪರ್ಧೆಯೊಡ್ಡಿದೆ. ಹೊಸ ರಾಕೆಟ್‌ಗಳ ಸಮೂಹಕ್ಕೆ ‘ಸ್ಮಾರ್ಟ್‌ ಡ್ರಾಗನ್‌’ (ಎಸ್‌.ಡಿ.) ಎಂದು ಹೆಸರಿಡಲಾಗಿದ್ದು, ಸುಮಾರು 1.5 ಟನ್‌ ತೂಕವನ್ನು ಇವು ಬಾಹ್ಯಾಕಾಶಕ್ಕೆ ಹೊತ್ತೂಯ್ಯಬಲ್ಲವು ಎಂದು ಚೀನ ಹೇಳಿದೆ. ಚೀನ ಅಕಾಡೆಮಿ ಆಫ್ ಲಾಂಚ್‌ ಟೆಕ್ನಾಲಜಿ ಸಂಸ್ಥೆಯ ‘ಚೀನ ರಾಕೆಟ್‌’ ಎಂಬ ವಿಭಾಗವು ಈ ರಾಕೆಟ್‌ಗಳನ್ನು ತಯಾರಿಸಿದೆ.

ಅಂದಹಾಗೆ, ಚಂದ್ರನ ಅಧ್ಯಯನ ಸೇರಿದಂತೆ ನಾನಾ ರೀತಿಯ ಬಾಹ್ಯಾಕಾಶ ಯೋಜನೆಗಳನ್ನು ಹೊಂದಿರುವ ಚೀನ, 2022ರಲ್ಲಿ ಮಂಗಳ ಗ್ರಹದ ಅಧ್ಯಯನ ನಡೆಸಲು ನಿರ್ಧರಿಸಿದೆ. ಅದಕ್ಕೆ ಬೇಕಾದ ಬಜೆಟ್‌ ಅನ್ನು ವಿಶ್ವದ ಇತರ ಸಣ್ಣ-ಪುಟ್ಟ ರಾಷ್ಟ್ರಗಳ ಉಪಗ್ರಹಗಳ ಉಡಾವಣೆ ಕೈಗೊಳ್ಳುವ ಮೂಲಕ ಸಂಪಾದಿಸಲು ನಿರ್ಧರಿಸಿದೆ. ಹಾಗಾಗಿ, “ಸ್ಮಾರ್ಟ್‌ ಡ್ರಾಗನ್‌’ ಸಿದ್ಧಪಡಿಸಿದೆ ಎನ್ನಲಾಗಿದೆ.