ಹೆಸರಿನ ಪತ್ತೆ
Team Udayavani, Oct 24, 2019, 3:20 AM IST
ಜಾದೂ ಮಾಡುವವರು ವಸ್ತುಗಳನ್ನು ನಾಪತ್ತೆ ಮಾಡುವುದು. ಮತ್ತೆ ಅವುಗಳನ್ನು ಕರೆತಂದು ತೋರಿಸುವುದು ಎಲ್ಲವೂ ಮಾಮೂಲು. ಆದರೆ, ವಸ್ತುಗಳನ್ನು ಬಿಟ್ಟು ಬೇರೇನು ಜಾದು ಮಾಡಬಹುದು?ಚಿಂತೆ ಬೇಡ. ಅದಕ್ಕೂ ಒಂದು ಐಡಿಯಾ ಇದೆ. ನಿಮ್ಮ ಮನದೊಳಗಿನ ಹೆಸರಗುಳನ್ನೇ ಪತ್ತೆ ಮಾಡಿದರೆ ಹೇಗೆ? ಹೌದು, ಇದೂ ಕೂಡ ಜಾದುವಿನ ಒಂದು ಭಾಗ. ಅದನ್ನು ಹೇಗೆ ಮಾಡಬೇಕು ಅಂದರೆ…
ಆರು ಕಾರ್ಡುಗಳ ಮೇಲೆ ಆರು ಹೆಸರುಗಳನ್ನು ಬರೆದಿರುತ್ತದೆ. ಪ್ರೇಕ್ಷಕರಲ್ಲೊಬ್ಬರನ್ನು ಕರೆದು ಯಾವುದಾದರೂ ಹೆಸರನ್ನು ನೆನಪಿಟ್ಟುಕೊಳ್ಳುವಂತೆ ಹೇಳಿ. ನಂತರ, ಅವರಿಗೆ ಕಣ್ಣು ಮುಚ್ಚಿಕೊಳ್ಳಲು ಹೇಳಿ. ನೀವು ಒಂದೊಂದೇ ಕಾರ್ಡಿನ ಮೇಲೆ ನಿಮ್ಮ ಮಂತ್ರದಂಡದಿಂದ ಕುಟ್ಟುತ್ತಿದ್ದಂತೆ ಅವರು ಆರಿಸಿಕೊಂಡ ಹೆಸರಿನ ಒಂದೊಂದು ಅಕ್ಷರವನ್ನು ಮನಸ್ಸಿನಲ್ಲಿ ಹೇಳಿಕೊಳ್ಳಬೇಕು.
ಕೊನೆಯ ಅಕ್ಷರ ಬಂದಾಗ ಅವರು “ಹೂಂ’ ಎಂದು ಹೇಳಬೇಕು. ನೀವು ಒಂದು ಕಾರ್ಡ್ಅನ್ನು ಅವರ ಮುಂದೆ ಹಿಡಿದು ಕಣ್ತೆರೆದು ನೋಡಲು ಹೇಳಿ. ನೀವು ಆರಿಸಿದ ಕಾರ್ಡ್ ಅವರು ಆಯ್ಕೆ ಮಾಡಿದ ಹೆಸರಿನದ್ದಾಗಿರುತ್ತದೆ.
ಇದರ ರಹಸ್ಯ ಇಷ್ಟೆ
ಅರೆ, ನೀವು ಹೇಳಿದಷ್ಟು ಸುಲಭವೇ ಇದು? ಅಂತ ಕೇಳಬಹುದು. ನಿಜಕ್ಕೂ ಇದು ಸಲೀಸೆ. ಅದು ಹೇಗೆ ಮಾಡಬೇಕೆಂದು ಇಲ್ಲಿ ಹೇಳುತ್ತಿದ್ದೇನೆ ಕೇಳಿ. ಕಾರ್ಡುಗಳ ಮೇಲೆ ಈ ರೀತಿ ಅಕ್ಷರಗಳಿರುವ ಹೆಸರುಗಳನ್ನೇ ಬರೆಯಬೇಕು. ಅದಾವುದೆಂದರೆ ಜಯಾ, ಮಾಲಾ, ಶಶಿಧರ, ಕುಸುಮಾಕರ, ಜಯಪ್ರಕಾಶ, ಭುವನಮನೋಹರಿ ಎಂದು ಹೆಸರುಗಳನ್ನು ಬರೆದು ಸಾಲಾಗಿ ಇಡಬೇಕು. ಮಂತ್ರದಂಡದ ಮೊದಲ ಪೆಟ್ಟನ್ನು ಯಾವುದಾದರೂ ಒಂದು ಕಾರ್ಡಿನ ಮೇಲೆ ಹಾಕಬೇಕು. ನಂತರದ ಪೆಟ್ಟುಗಳನ್ನು ಮೇಲಿನ ಕ್ರಮದಂತೆ ಸಾಲಾಗಿ ಇಟ್ಟ ಕಾರ್ಡುಗಳ ಮೇಲೆಯೇ ಹಾಕಬೇಕು. ಒಂದೊಂದೇ ಅಕ್ಷರ ಜಾಸ್ತಿಯಾಗುವುದರಿಂದ ಆತ ‘ಹೂಂ’ ಎಂದು ಹೇಳುವಾಗ ಆತನ ಆಯ್ಕೆಯ ಕಾರ್ಡನ್ನೇ ಕುಟ್ಟಿರುತ್ತೀರಿ.
ಆಗ ನೋಡಿ ಹೆಸರು ಮಾಯವಾಗುತ್ತದೆ. ಚಪ್ಪಾಳೆಗಳ ಸುರಿಮಳೆ ಹರಿಯುತ್ತದೆ.
ಉದಯ್ ಜಾದೂಗಾರ್