ಲಾಂಛನ: ಗ್ಲೌವ್ಸ್ ಬದಲು ಬ್ಯಾಟ್ಗೆ ಹಾಕಬಹುದು!
Team Udayavani, Jun 10, 2019, 6:00 AM IST
ಹೊಸದಿಲ್ಲಿ: ಎಂ.ಎಸ್. ಧೋನಿ ಅರೆ ಸೇನಾಪಡೆಯ ಲಾಂಛನವನ್ನು ಗ್ಲೌವ್ಸ್ನಲ್ಲಿ ಧರಿಸಿ ವಿಶ್ವಕಪ್ ಆಡಿದ್ದು ಸಾಕಷ್ಟು ವಿವಾದಕ್ಕೆ ಕಾರಣವಾಗಿತ್ತು. ಆಸ್ಟ್ರೇಲಿಯ ವಿರುದ್ಧದ ಪಂದ್ಯದ ವೇಳೆ ಧೋನಿ ಈ ಲಾಂಛನವನ್ನು ತೆಗೆದಿದ್ದಾರೆ. ಈ ವೇಳೆ ಮಾಜಿ ಕ್ರಿಕೆಟಿಗ ವೀರೇಂದ್ರ ಸೆಹವಾಗ್ ಅವರು ಧೋನಿಗೆ ಅಮೂಲ್ಯ ಸಲಹೆಯೊಂದನ್ನು ನೀಡಿದ್ದಾರೆ. ‘ಗ್ಲೌವ್ಸ್ನಲ್ಲಿ ಧರಿಸಲಿಕ್ಕೆ ಐಸಿಸಿ ಅನುಮತಿ ಇಲ್ಲವಾದರೆ, ಇದನ್ನು ಬ್ಯಾಟ್ನಲ್ಲಿ ಹಾಕಿಕೊಳ್ಳಲಿ. ಬ್ಯಾಟ್ನಲ್ಲಿ ಎರಡು ಚಿಹ್ನೆ ಹಾಕಿಕೊಳ್ಳಲಿಕ್ಕೆ ಅನುಮತಿಯಿದೆ. ಒಂದು ಬ್ಯಾಟ್ ಉತ್ಪಾದಿಸಿದ ಕಂಪೆನಿಯದ್ದು. ಇನ್ನೊಂದು ನಮಗೆ ಇಷ್ಟ ಬಂದ ಯಾವುದಾದರೂ ಒಂದು. ಇದಕ್ಕೆ ಮುಂಚಿತವಾಗಿ ಐಸಿಸಿಯಿಂದ ಅನುಮತಿ ಪಡೆದಿರಬೇಕು…’ ಎಂದು ಸೆಹವಾಗ್ ಹೇಳಿದ್ದಾರೆ.