ಕೋವಿಡ್ ತುರ್ತುಸ್ಥಿತಿ ವಿಸ್ತರಣೆ : ಟೋಕಿಯೊ ಒಲಿಂಪಿಕ್ಸ್ ತಯಾರಿಗೆ ಹಿನ್ನಡೆ
Team Udayavani, May 15, 2021, 7:10 AM IST
ಟೋಕಿಯೊ : ಜಪಾನ್ ಸರಕಾರ ಶುಕ್ರವಾರ ಇನ್ನೂ 3 ಪ್ರಾಂತ್ಯಗಳಿಗೆ “ಕೊರೊನಾ ತುರ್ತು ಸ್ಥಿತಿ’ಯನ್ನು ವಿಸ್ತರಿಸಿದೆ. ಒಲಿಂಪಿಕ್ಸ್ ಆರಂಭಕ್ಕೆ ಕೇವಲ ಎರಡು ತಿಂಗಳಿರುವಾಗ ಈ ನಿರ್ಧಾರ ತೆಗೆದುಕೊಳ್ಳಲಾಗಿದ್ದು, ಪ್ರತಿಷ್ಠಿತ ಕ್ರೀಡಾಕೂಟಕ್ಕೆ ದೊಡ್ಡ ಹಿನ್ನಡೆಯಾಗಿ ಪರಿಣಮಿಸಿದೆ.
ಎ. 25ರಂದು ಮೂರನೇ ಸಲ ಜಪಾನ್ ಕೊರೊನಾ ತುರ್ತು ಪರಿಸ್ಥಿತಿ ಜಾರಿಗೊಳಿಸಿತ್ತು. ಟೋಕಿಯೊ, ಒಸಾಕಾ, ಕೋಟೊ, ಹ್ಯೋಗೊ ಮೊದಲಾದ 6 ಪ್ರಾಂತ್ಯಗಳು ಈ ವ್ಯಾಪ್ತಿಗೆ ಬಂದಿದ್ದವು. ಈಗ ಇದನ್ನು ಇನ್ನೂ 3 ಪ್ರಾಂತ್ಯಗಳಿಗೆ ವಿಸ್ತರಿಸಿದೆ. ಇದು ಮೇ 31ರ ತನಕ ಜಾರಿಯಲ್ಲಿರುತ್ತದೆ.
ಇದರಲ್ಲಿ ಪ್ರಮುಖವಾದುದು, ದೇಶದ ಉತ್ತರ ಭಾಗದ ದ್ವೀಪವಾಗಿರುವ ಹೊಕೈಡೊ. ಇಲ್ಲಿ ಒಲಿಂಪಿಕ್ಸ್ ಮ್ಯಾರಥಾನ್ ರೇಸ್ ನಡೆಯಲಿದೆ. ಉಳಿದೆರಡು ಪ್ರಾಂತ್ಯಗಳೆಂದರೆ ಹಿರೋಶಿಮಾ ಮತ್ತು ಒಕಾಯಾಮ.
ಒಲಿಂಪಿಕ್ಸ್ಗೆ ವಿರೋಧ
ಇದೇ ವೇಳೆ ಜಪಾನ್ನಲ್ಲಿ ಒಲಿಂಪಿಕ್ಸ್ ವಿರೋಧ ಅಭಿಯಾನ ತೀವ್ರಗೊಂಡಿದೆ. ಇದಕ್ಕೆ ಸಹಿ ಹಾಕಿದವರ ಸಂಖ್ಯೆ ಮೇ ಆರಂಭ ದಲ್ಲೇ ಮೂರೂವರೆ ಲಕ್ಷದ ಗಡಿ ದಾಟಿತ್ತು. ಒಲಿಂಪಿಕ್ಸ್ಗೆ ವಿನಿಯೋಗಿಸುವ ಮೊತ್ತವನ್ನು ಕೊರೊನಾದಿಂದ ತೀವ್ರ ಆರ್ಥಿಕ ಅಡಚಣೆಗೆ ಸಿಲುಕಿದವರ ನೆರವಿಗೆ ಬಳಸಬೇಕೆಂದು ಟೋಕಿಯೊ ಗವರ್ನರ್ ಯುರಿಕೊ ಕೊçಕೆ ಅವರಿಗೆ ಮನವಿ ಮಾಡಲಾಗಿದೆ.