ಗರ್ಭಿಣಿಯರ ದಿರಿಸುಗಳು

Team Udayavani, Feb 2, 2018, 2:40 PM IST

ಗರ್ಭಿಣಿಯಾಗುವುದು ಎಂದರೆ ಅದು ಪ್ರತಿಯೊಬ್ಬ ಹೆಣ್ಣಿನ ಜೀವನದ ಸುಂದರ ಸುಖಾನುಭೂತಿ ಮಾತ್ರವಲ್ಲದೆ ಅವಳ ಬದುಕಿನ ಒಂದು ಸುಂದರ ಘಟ್ಟವೂ ಹೌದು. ಗರ್ಭಿಣಿ ಅವಸ್ಥೆಯಲ್ಲಿ ದೈಹಿಕ ಹಾಗೂ ಮಾನಸಿಕವಾಗಿಯೂ ಬದಲಾವಣೆಗಳಾಗುವುದರಿಂದ ಗರ್ಭಿಣಿಯರು ಆರೋಗ್ಯದ ಕಡೆಗೆ ಹೆಚ್ಚಿನ ಮುತುವರ್ಜಿ ವಹಿಸಬೇಕಾಗುತ್ತದೆ. ಪೌಷ್ಟಿಕ ಆಹಾರ ಸೇವನೆ, ಔಷಧೋಪಚಾರ, ವಿಶ್ರಾಂತಿಯ ಆವಶ್ಯಕತೆಯ ಜತೆ ಜತೆಗೆ ಈ ಸಮಯದಲ್ಲಿ ಗರ್ಭಿಣಿಯಾದವಳು ತಾನು ತೊಡುವ ಬಟ್ಟೆಯ ಕಡೆಗೂ ಗಮನಹರಿಸುವುದು ಅಷ್ಟೇ ಮುಖ್ಯವಾಗುತ್ತದೆ.

ಗರ್ಭಿಣಿಯರಲ್ಲಿ ಮಗು ಬೆಳೆಯುತ್ತಿರುವಾಗ ಸಹಜವಾಗಿಯೇ ಗರ್ಭಕೋಶ ಹಿಗ್ಗುತ್ತದೆ. ದೇಹದಲ್ಲಿ ಬದಲಾವಣೆಗಳ ಜೊತೆಗೆ ಹಾರ್ಮೋನ್‌ನಲ್ಲೂ ಬದಲಾವಣೆಗಳಾಗುತ್ತವೆ. ತೂಕವೂ ಜಾಸ್ತಿಯಾಗುತ್ತದೆ. ಉದರದ ಭಾಗ ಹಿಗ್ಗುವುದರಿಂದ ಮೈಮಾಟದಲ್ಲೂ ವ್ಯತ್ಯಾಸವಾಗಿ ಮೊದಲು ತೊಡುತ್ತಿದ್ದ ಉಡುಗೆಗಳೆಲ್ಲ ಬಿಗಿಯಾಗಲಾರಂಭಿಸುತ್ತವೆ. ಆಗ ಆಕೆಗೆ “ನನ್ನ  ಡ್ರೆಸ್ಸುಗಳೆಲ್ಲ ಬಿಗಿಯಾಗುತ್ತಿವೆ, ಯಾವುದನ್ನೂ ಧರಿಸಲಾಗುತ್ತಿಲ್ಲ, ಎಷ್ಟು ಚೆಂದ ಚೆಂದ ಡ್ರೆಸುಗಳು! ಇವನ್ನೆಲ್ಲ ಮೂಲೆಗೆಸೆಯುವುದೇ?’ ಎಂದು ಅನ್ನಿಸುವುದು ಸುಳ್ಳಲ್ಲ. ಪರ್ಯಾಯವಾಗಿ ಆಕೆ ತನಗೆ ಒಗ್ಗುವ ಉಡುಪುಗಳ ಹುಡುಕಾಟಕ್ಕೂ ಶುರುಮಾಡುತ್ತಾಳೆ.

ಹಿಂದೆಲ್ಲ ಗರ್ಭಿಣಿಯರು ಸಡಿಲವಾದ ಉಡುಪುಗಳನ್ನೇ ಧರಿಸುವುದಿತ್ತು. ಆದರೀಗ ಕಾಲ ಬದಲಾಗಿದೆ. ಗರ್ಭಿಣಿಯರ ಈ ಸಂದರ್ಭಕ್ಕಾಗಿ ಮಾರುಕಟ್ಟೆಯಲ್ಲಿಯೂ ಈಗ ವೈವಿಧ್ಯಮಯ ಗರ್ಭಿಣಿ ಉಡುಪುಗಳು ದೊರೆಯುತ್ತವೆ. ಸಾಂಪ್ರದಾಯಿಕ ಉಡುಪುಗಳಿಂದ ಹಿಡಿದು ಆಧುನಿಕ ವಿನ್ಯಾಸದ ಡ್ರೆಸ್‌ಗಳವರೆಗೂ ಸಾಕಷ್ಟು ಆಯ್ಕೆಗಳಿರುವುದರಿಂದ ಮುಜುಗರಪಡದೆ ಇಷ್ಟವಾದುದನ್ನು ಖರೀದಿಸಿ ಧರಿಸಿಕೊಂಡು ಹೆಮ್ಮೆಯಿಂದ ಗರ್ಭಾವಸ್ಥೆಯ ಮಧುರ ಕ್ಷಣಗಳನ್ನು ಅನುಭವಿಸಬಹುದು. ಆದರೆ, ಗರ್ಭಿಣಿಯರು ಬಟ್ಟೆಗಳನ್ನು ಖರೀದಿ ಮಾಡುವಾಗಲೂ ಹೆಚ್ಚಿನ ಕಾಳಜಿ ವಹಿಸಬೇಕಾಗುತ್ತದೆ. ತಮ್ಮ ಮೈ-ಮನಕ್ಕೆ ಇಷ್ಟವಾಗುವ ಉಡುಪುಗಳನ್ನೇ ಆಯ್ದುಕೊಂಡರೆ ತಾಯಿ ಹಾಗೂ ಮಗುವಿಗೆ ಉತ್ತಮ. ಗರ್ಭಿಣಿ ಧರಿಸುವ ಉಡುಪು ಎಂದರೆ ಅದು ಆಕೆಯ ದೇಹದ ಜತೆಗೆ ಮನಸ್ಸಿಗೂ ಹಿತಾನುಭವ ನೀಡುವಂತಿರಬೇಕು. ಸಡಿಲವಾದ, ಆರಾಮದಾಯಕ ಬಟ್ಟೆಗಳ ಆಯ್ಕೆ ಹೆಚ್ಚು ಸೂಕ್ತ. ಅಲ್ಲದೆ ಗರ್ಭಿಣಿಯಾದವಳು ಯಾವ ಯಾವ ಕಾಲದಲ್ಲಿ ಎಂತಹ ಉಡುಪುಗಳನ್ನು ಧರಿಸಬೇಕು ಎಂಬ ಬಗ್ಗೆಯೂ ತಿಳಿದುಕೊಳ್ಳುವುದು ಅವಶ್ಯ. ಹೆಚ್ಚಾಗಿ ಗರ್ಭಿಣಿಯರ ಪ್ರಕೃತಿಗೆ ಬೇಸಗೆಕಾಲವು ಅಷ್ಟಾಗಿ ಹೊಂದಿಕೊಳ್ಳುವುದಿಲ್ಲ. ಗರ್ಭಿಣಿ ಹೆಂಗಸರಿಗೆ ದೇಹದ ತಾಪಮಾನದ ಜೊತೆಗೆ ಹೊರಗಿನ ಪ್ರಕೃತಿಯ ತಾಪಮಾನ ಸೇರಿ ಸಹಿಸಿಕೊಳ್ಳಲಾರದಷ್ಟು ಸೆಕೆಯ ಅನುಭವವಾಗಿ ವೇದನೆಯಾಗಬಹುದು. ಆದಷ್ಟು ಸಡಿಲವಾದ ಬಟ್ಟೆ ತೊಟ್ಟರೆ ಕೂಲ್‌ ಆಗಿ ಇರಬಹುದು. ಈ ನಿಟ್ಟಿನಲ್ಲಿ ಕಾಟನ್‌ ಬಟ್ಟೆ  ಅಥವಾ ಲೆನಿನ್‌ ಫ್ಯಾಬ್ರಿಕ್‌ ಬಟ್ಟೆಗಳ ಧಾರಣೆ ಹಿತಕರ. ಕಾಟನ್‌ನಲ್ಲೂ ಆದಷ್ಟು ತಿಳಿ ಬಣ್ಣದವುಗಳ ಆಯ್ಕೆ ಉತ್ತಮ. ಇವು ಬೆವರನ್ನು ಹೀರಿಕೊಳ್ಳುವುದರ ಜತೆಗೆ ಮೈಮೇಲೆ ಭಾರವನ್ನು ಉಂಟು ಮಾಡುವುದಿಲ್ಲ. ಉದ್ಯೋಗಸ್ಥ ಗರ್ಭಿಣಿಯರು ಸಡಿಲ, ಶುಭ್ರ ವಸ್ತ್ರ  ಮತ್ತು ಬಿಗಿಯಲ್ಲದ ಪಾದರಕ್ಷೆಗಳನ್ನು ಧರಿಸುವುದು ಹಿತಕರ. ಮಳೆಗಾಲ ಮತ್ತು ಚಳಿಗಾಲದಲ್ಲಿ ಬೆಚ್ಚಗಿರುವಂತೆ ವಸ್ತ್ರಧಾರಣೆ ಮಾಡಬೇಕು. ಯಾವುದೇ ಬಟ್ಟೆ ತೊಟ್ಟರೆ ಅದರ ವೆ‌ುàಲೆ ಜಾಕೆಟ್‌ ಅಥವಾ ಸ್ಟೋಲ್‌ ಧರಿಸಿದರೆ ಬೆಚ್ಚಗಿರುವಂತೆ ಮಾಡುತ್ತದೆ. ಇಡೀ ದಿನವನ್ನು ಆಫೀಸ್‌ನ ಒಳಗೇ ಕುಳಿತು ಕಳೆಯುವವರಾದರೆ ಬಿಗಿಯಾದ ಪ್ಯಾಂಟ್‌ಗಳನ್ನು ಧರಿಸುವ ಬದಲು ಇಲಾಸ್ಟಿಕ್‌ ಇಲ್ಲದ ದಾರದಿಂದ ಕಟ್ಟುವಂತಹ ನಾರ್ಮಲ್‌ ಪ್ಯಾಂಟುಗಳು, ಪಟಿಯಾಲ ಪ್ಯಾಂಟುಗಳನ್ನು ಧರಿಸಬಹುದು. ಸೈಡ್‌ ಕಟ್‌ ಚೂಡಿದಾರ್‌, ಗರ್ಭಿಣಿಯರ ಜೀ®Õ…ನ್ನೂ ಧರಿಸಬಹುದು. ಜೀನ್ಸ್‌ನ ಮೇಲೆ ಕಾಟನ್‌ ಕುರ್ತಾ, ಬಿಗಿಯಲ್ಲದ ಟೀಶರ್ಟ್‌ ಧರಿಸಬಹುದು. ಗರ್ಭಿಣಿಯರ ಜೀನ್ಸ್‌ ಅವರ ಅಂದ ಹೆಚ್ಚಿ ಸುವ ಜೊತೆಗೆ ಆರಾಮ ನೀಡುತ್ತದೆ. ಮನೆಯಲ್ಲಿ ಇರುವ ನೈಟಿ, ನೈಟ್‌ ಡ್ರೆಸ್ಸುಗಳು, ಪೈಜಾಮಾಗಳು, ಲೈನಿಂಗ್‌ ಇಲ್ಲದ ಸಡಿಲ ಕುರ್ತಾಗಳನ್ನು ಧರಿಸುವುದು ಹಿತಕರ.

ಟೀಶರ್ಟ್‌-ಕುರ್ತಾ-ಪಲಾಝೊ
ಈಗ ಹೇಳಿಕೇಳಿ ಫ್ಯಾಶನ್‌ ಯುಗ. ಹಿಂದಿನ ಕಾಲದ ಗರ್ಭಿಯರಂತೆ ಸೀರೆ, ಚೂಡಿದಾರನ್ನೇ ಹಾಕಿ ಹೊರಗೆ ಹೋಗಬೇಕೆಂದಿಲ್ಲ. ಗರ್ಭಿಣಿಯರಿಗಾಗಿಯೇ ಆಧುನಿಕ ವಿನ್ಯಾಸದ ಟಾಪ್‌, ಟೀಶರ್ಟ್‌, ಮಿಡಿ, ಮ್ಯಾಕ್ಸಿ, ತ್ರಿಫೋಥ್‌ ಡ್ರೆಸ್‌ಗಳು ಸಿಗುತ್ತವೆ. ಉಡುಪುಗಳಲ್ಲೇ ಆರಾಮದಾಯಕ ಉಡುಪು ಎಂದರೆ ಟೀಶರ್ಟ್‌. ಹೆಣ್ಣುಮಕ್ಕಳು ಹೆಚ್ಚಾಗಿ ಟೀಶರ್ಟ್‌ನ್ನು ಇಷ್ಟಪಡುತ್ತಾರೆ. ಟೀಶರ್ಟ್‌ ಎಲ್ಲ ಕಾಲಕ್ಕೂ ಒಗ್ಗುವ, ಲಘುವಾಗಿರುವ ಜತೆಗೆ ತಾಪಮಾನವನ್ನು ತಡೆಯುವ ಆರಾಮದಾಯಕ ಉಡುಪು. ಉಷ್ಣಾಂಶವನ್ನು ತಡೆಯಲು ನೆರವಾಗುವುದರೊಂದಿಗೆ ಟೀಶರ್ಟ್‌ ಸೌಂದರ್ಯವನ್ನೂ ಹೆಚ್ಚು ಮಾಡುತ್ತದೆ. ಗರ್ಭಿಣಿಯರು ತುಸು ಸಡಿಲವಾದ ಟೀಶರ್ಟ್‌ ಆಯ್ದುಕೊಳ್ಳಬಹುದು. ಅಲ್ಲದೆ ಟೀಶರ್ಟ್‌ ನಲ್ಲೂ ಈಗ ಸಡಿಲವಾಗಿರುವ ಟೀಶರ್ಟ್‌ ಮಾದರಿಯ ಹಲವಾರು ನಮೂನೆಯ ಆಕರ್ಷಕ ಟಾಪ್‌ಗ್ಳೂ ಗರ್ಭಿಣಿಯರಿಗಾಗಿ ಲಭ್ಯವಿವೆ. ಗರ್ಭಿಣಿಯರಿಗೆ ಪಲಾಝೊ ಪ್ಯಾಂಟ್‌ ಸಹ ಅತ್ಯುತ್ತಮ ಉಡುಗೆ. ಇದು ಗರ್ಭಿಣಿಯರ ಲುಕ್‌ ಬದಲಿಸುವ ಜೊತೆಗೆ ಆರಾಮವೆನಿಸುತ್ತದೆ. ಪಲಾಝೊ ಮೇಲೆ ಟೀಶರ್ಟ್‌ ಅಥವಾ ಕುರ್ತಾವನ್ನೂ ಹಾಕಬಹುದು.

ಸೀರೆ-ಚೂಡಿದಾರ್‌-ಮ್ಯಾಕ್ಸಿಗಳು
ಮದುವೆ, ಉಪನಯನದಂತಹ ಸಮಾರಂಭಗಳಲ್ಲಿ ಸಾಂಪ್ರದಾಯಿಕ ರೇಶ್ಮೆ ಸೀರೆ, ಜರಿಯ ಸೀರೆಗಳನ್ನು ಉಡುವುದು ನಮ್ಮ ಸಂಪ್ರದಾಯ. ಗರ್ಭಿಣಿಯರಿಗೆ ಜರಿಯ ಸೀರೆಗಳು ಭಾರವೆನಿಸಿದರೆ ತೆಳುವಾದ, ಹಗುರವಾದ, ಸಪೂರ ಬಾರ್ಡರ್‌ನ ಸೀರೆಗಳನ್ನು , ಹಗುರವಾದ ಕಾಟನ್‌ ಸೀರೆಗಳನ್ನು ಧರಿಸಬಹುದು. ಇನ್ನು ಸೀರೆ ಉಡಲು ಕಷ್ಟವೆನಿಸಿದರೆೆ ಸಾಂಪ್ರದಾಯಿಕವಾಗಿ ಕಾಣಿಸಿಕೊಳ್ಳಲು ಸಲ್ವಾರನ್ನು ಆಯ್ಕೆ ಮಾಡಿಕೊಳ್ಳಬಹುದು. ಸಲ್ವಾರ್‌ನಲ್ಲಿ ಅಂಬ್ರೆಲ್ಲಾ , ಅನಾರ್ಕಲಿಗಳು ಗರ್ಭಿಣಿಯರಿಗೆ ಆಕರ್ಷಕ ಲುಕ್‌ ನೀಡುತ್ತದೆ. ಇವು ಸಾಕಷ್ಟು ಉದ್ದ ಹಾಗೂ ಸಡಿಲವಾಗಿರುದರಿಂದ ಆರಾಮದಾಯಕ. ಆಧುನಿಕ ಮನೋಭಾವದವರು ಲಾಂಗ್‌ ಮ್ಯಾಕ್ಸಿ ಡ್ರೆಸ್‌ನೂ° ಆರಿಸಿಕೊಳ್ಳಬಹುದು. ಉದ್ದದ ನಿಲುವಂಗಿ ರೂಪದ ಮ್ಯಾಕ್ಸಿಗಳು ಚೆಂದ ಕಾಣಿಸುತ್ತವೆ. ತೆಳು ಇಲಾಸ್ಟಿಕ್‌ ಹೊಂದಿರುವ ಮಿಡಿಗಳನ್ನು ಆಯ್ಕೆಮಾಡಿ ಧರಿಸಬಹುದು.  

ಹೈಹೀಲ್ಸ್‌ ಬೇಡ
ಆರೋಗ್ಯದ ದೃಷ್ಟಿಯಿಂದ ಗರ್ಭಿಣಿಯರಿಗೆ ಹೈಹೀಲ್ಡ್‌ ಚಪ್ಪಲಿಗಳ ಉಪಯೋಗ ಹಿತಕರವಲ್ಲ. ಹೈ ಹೀಲ್ಸ್‌ ಶೂ ಅಥವಾ ಸ್ಯಾಂಡಲ್ಸ್‌ ಹಾಕಿದರೆ ಸ್ಟೈಲ್‌ ಆಗಿ ಕಾಣಿಸುತ್ತದೆ ನಿಜ, ಆದರೆ ಗರ್ಭಿಣಿಯರು ಹೈಹೀಲ್ಸ್‌ ಹಾಕಿಕೊಂಡು ನಡೆಯುವಾಗ ಬ್ಯಾಲೆನ್ಸ್‌ ಮಾಡಲು ಕಷ್ಟವಾಗಬಹುದು. ಹೈಹೀಲ್ಸ್‌ ಹಾಕಿಕೊಂಡಾಗ ದೇಹದ ಎಲ್ಲ ಭಾರವು ಪಾದಗಳ ಮೇಲೆ ಬೀಳುತ್ತದೆ. ಜತೆಗೆ ಬೆನ್ನು ಮತ್ತು ಮೊಣಕಾಲಿನ ಮೇಲೂ ಜಾಸ್ತಿ ಒತ್ತಡ ಬೀಳುತ್ತದೆ. ಅಲ್ಲದೆ ಅಧಿಕ ಸಮಯ ಧರಿಸಿದಾಗ ಪಾದ ಮತ್ತು ಸೊಂಟ ನೋವೂ ಬರಬಹುದು. ಈ ಎಲ್ಲ ಅಪಾಯಗಳನ್ನು ತಪ್ಪಿಸಲು ಗರ್ಭಿಣಿಯರಿಗಾಗಿಯೇ ಮಾರುಕಟ್ಟೆಯಲ್ಲಿ ಫ್ಯಾಷನ್‌ ಚಪ್ಪಲಿ ದೊರೆಯುತ್ತದೆ. ಆದಷ್ಟು ಕಡಿಮೆ ಹೀಲ್ಸ್‌ ಇರುವ, ಬಿಗಿಯಲ್ಲದ ಸ್ಯಾಂಡಲ್ಸ್‌ಗಳ ಆಯ್ಕೆ ಉತ್ತಮ. ಸ್ಯಾಂಡಲ್ಸ್‌ನಲ್ಲಿ ಅದರಲ್ಲೂ ಬೆಲ್ಟ್ ಅಥವಾ ಲೇಸ್‌ ಇರುವಂಥ ಸ್ಯಾಂಡಲ್ಸ್‌ , ಮಡಚುವ ಚಪ್ಪಲಿಗಳು ಉತ್ತಮ.

ಸ್ವಾತೀ