ವಿದ್ಯುತ್‌ ಬಳಸದೇ ನೀರು ಪೂರೈಕೆ!

Team Udayavani, Nov 25, 2019, 4:50 AM IST

ಗ್ರಾಮೀಣ ಪ್ರದೇಶಗಳಲ್ಲಿ ವಿದ್ಯುತ್‌ ಪೂರೈಕೆ ನಿಯಮಿತವಾಗಿ ಇರುವುದಿಲ್ಲ. ಬೆಳೆಗಳಿಗೆ ಸಕಾಲದಲ್ಲಿ ನೀರು ಪೂರೈಸಲು ಆಗುವುದಿಲ್ಲ. ಇಂಥ ಸಮಯದಲ್ಲಿ ನೆರವಾಗುವ ನಿಟ್ಟಿನಲ್ಲಿ ಈ ನೀರೆತ್ತುವ ಯಂತ್ರವನ್ನು ರೂಪಿಸಲಾಗಿದೆ. ಸರಳವಾಗಿರುವ ಈ ಯಂತ್ರವನ್ನು ಚಾಲೂ ಮಾಡಲು ವಿದ್ಯುತ್‌ ಅಗತ್ಯವಿಲ್ಲ. 2 ಎಕರೆ ವಿಸ್ತೀರ್ಣದ ಒಳಗಿನ ಹೊಲ  ಗದ್ದೆ ಹೊಂದಿರುವವರು ಈ ಯಂತ್ರವನ್ನು ಉಪಯೋಗಿಸಿ, ತೆರೆದ ಬಾವಿ, ಕೊಳವೆ ಬಾವಿಯಿಂದ ನೀರನ್ನು ಎತ್ತಬಹುದು. ಗ್ರಾಮೀಣ ಪ್ರದೇಶಗಳಲ್ಲಿ ಮಾತ್ರವಲ್ಲದೆ, ನಗರಪ್ರದೇಶಗಳ ಜನರೂ ಇದನ್ನು ಬಳಸಿಕೊಳ್ಳಬಹುದು. ಬೆಳಿಗ್ಗೆ ವಿದ್ಯುತ್‌ ಕೈಕೊಟ್ಟಂಥ ಸಂದರ್ಭಗಳಲ್ಲಿ, ತುರ್ತು ಇದ್ದಾಗ ಈ ಉಪಕರಣವನ್ನು ಬಳಸಿ ತಾತ್ಕಾಲಿಕ ಅಗತ್ಯಗಳಿಗೆ ನೀರನ್ನು ಪಡೆದುಕೊಳ್ಳಬಹುದು.

ಈ ಯಂತ್ರ, ನೆಲದಿಂದ 100 ಅಡಿ ಆಳದಿಂದ ನೀರನ್ನು ಮೇಲೆತ್ತುತ್ತದೆ. ನೆಲಮಟ್ಟದಲ್ಲಿ ಸುಮಾರು 750 ಅಡಿ ದೂರದವರೆಗೂ ನೀರನ್ನು ಪಂಪ್‌ ಮಾಡಬಹುದು. ಸಣ್ಣಪುಟ್ಟ ಕೈತೋಟವಿದ್ದರೆ ಹನಿ ನೀರಾವರಿ ವ್ಯವಸ್ಥೆಯನ್ನು ಅಳವಡಿಸಿಕೊಳ್ಳಬಹುದು. ಮಹಡಿ ಮನೆಗಳಲ್ಲಾದರೆ ಮೂರನೇ ಅಂತಸ್ತಿನವರೆಗೂ ನೀರು ಪಂಪ್‌ ಮಾಡಬಹುದು.

ಯಂತ್ರದ ಕಾರ್ಯಾಚರಣೆ
ಈ ಯಂತ್ರದಲ್ಲಿ ಪೆಡಲ್‌ಗ‌ಳನ್ನು ಅಳವಡಿಸಲಾಗಿದೆ. ಸೈಕಲ್‌ ತುಳಿಯುವ ಮಾದರಿಯಲ್ಲಿಯೇ ಈ ಯಂತ್ರದಲ್ಲಿರುವ ಪೆಡಲ್‌ಗ‌ಳನ್ನು ತುಳಿದರೆ ಸಾಕು, ನೀರು ಪೂರೈಕೆಯಾಗುತ್ತದೆ. ಈ ನೀರೆತ್ತುವ ಯಂತ್ರವನ್ನು ಬಳಸುವುದರಿಂದ ವ್ಯಾಯಾಮವೂ ಆಗುತ್ತದೆ ಎನ್ನುವುದು ಹೆಗ್ಗಳಿಕೆ. ಹ್ಯಾಂಡ್‌ ಪಂಪ್‌ ಕಾರ್ಯಾಚರಿಸುವ ಮಾದರಿಯಲ್ಲಿಯೇ ಈ ಯಂತ್ರವೂ ಕೆಲಸ ಮಾಡುತ್ತದೆ. ಈ ಪೆಡಲ್‌ಗ‌ಳನ್ನು ನಿರಾಯಾಸವಾಗಿ ತುಳಿಯುವಂತೆ ವಿನ್ಯಾಸಗೊಳಿಸಲಾಗಿದೆ. ಅರ್ಧ ಗಂಟೆ ಪೆಡಲ್‌ ಮಾಡಿದರೆ ಮೂರು ಸಾವಿರ ಲೀಟರ್‌ ನೀರು ಪೂರೈಕೆಯಾಗುತ್ತದೆ ಎನ್ನಲಾಗಿದೆ! ಈ ಉಪಕರಣ “ಜೈಲಮ್‌’ ಎನ್ನುವ ಹೆಸರಿನಲ್ಲಿ ದೊರೆಯುತ್ತಿದೆ.
ಸಂಪರ್ಕ: 9448334131

 -ಕುಮಾರ ರೈತ