ಮಹಿಳೆಯರೇ ಆಯೋಜಿಸುವ ಟೆನಿಸ್ಗೆ ಗುಡ್ ಬೈ!
Team Udayavani, Oct 6, 2018, 3:25 AM IST
ಗ್ರ್ಯಾನ್ ಸ್ಲಾಮ್ಗಳಿಗೆ ನೀಡುವಷ್ಟೇ ಮಹತ್ವವನ್ನು ಟೆನಿಸ್ ಋತುವಿನ ಅಂತ್ಯವನ್ನು ಘೋಷಿಸುವ ಮಹಿಳೆಯರೇ ಆಯೋಜಿಸುವ ಡಬ್ಲ್ಯುಟಿಎ ಟೆನಿಸ್ ಫೈನಲ್ಗೆ ನೀಡಬೇಕಿತ್ತು. ಖುದ್ದು ಮಹಿಳಾ ಟೆನಿಸ್ ಸಂಸ್ಥೆ ನಡೆಸುವ ಈ ಟೂರ್ನಿ ಹೆಚ್ಚು ಮೌಲ್ಯಯುತವಾದುದು. ಮಹಿಳಾ ಸಿಂಗಲ್ಸ್ನಲ್ಲಿ ಈ ಹಿಂದೆ 47 ಬಾರಿ, ಡಬಲ್ಸ್ನಲ್ಲಿ 43 ಬಾರಿ ಸ್ಪರ್ಧೆಗಳು ನಡೆದಿವೆ. ಕಳೆದ ವರ್ಷ ಸಿಂಗಲ್ಸ್ನಲ್ಲಿ ಕ್ಯಾರೋಲಿನಾ ವೋಜ್ನಿಯಾಕಿ ಗೆಲುವು ಸಾಧಿಸಿದ್ದರು. ದುರಂತವೆಂದರೆ ಶ್ರೇಷ್ಠರ ನಡುವಿನ ಅಪರೂಪದ ಸ್ಫರ್ಧೆ ನಿರೀಕ್ಷಿಸಿದಷ್ಟು ನ್ಯೂಸ್ ಪ್ರಿಂಟ್ ಅಥವಾ ಏರ್ ಟೈಮ್ನ್ನು ತಿನ್ನುವುದೇ ಇಲ್ಲ!
ಎಂಟು ಶ್ರೇಷ್ಠರ ಸೆಣಸಾಟ!
ಪ್ರಸ್ತುತ ವರ್ಷದ ಕೂಟದಲ್ಲಿ ಅತ್ಯುತ್ತಮವಾಗಿ ಆಡಿದ ವಿಶ್ವದ ಅಗ್ರ 8 ಶ್ರೇಯಾಂಕ ಹೊಂದಿದ ಆಟಗಾರ್ತಿಯರಿಗೆ ಮಾತ್ರ ಅವಕಾಶ. ಈ ಲೆಕ್ಕಕ್ಕೆ ಕಡ್ಡಾಯವಾಗಿ ನಾಲ್ಕು ಗ್ರ್ಯಾನ್ಸ್ಲಾಮ್ ಫಲಿತಾಂಶಗಳನ್ನು ಒಳಗೊಂಡಂತೆ 16 ಟೂರ್ನಿಗಳ ಉತ್ತಮ ಪ್ರದರ್ಶನಗಳನ್ನು ಪರಿಗಣಿಸಲಾಗುತ್ತದೆ. ಅಗ್ರ 20 ಆಟಗಾರ್ತಿಯರಿಗೆ ಹಿಂದಿನ ವರ್ಷದ 5 ಮುಖ್ಯ ಟೂರ್ನಿಗಳ ಫಲಿತಾಂಶದ ಅಂಕಗಳನ್ನು ಸೇರ್ಪಡೆಗೊಳಿಸಿ ಅವರಿಗೆ ಅಷ್ಟರಮಟ್ಟಿಗೆ “ಕುಷನ್ ಕೊಡಲಾಗುತ್ತದೆ. ಒಂದು ನಿರ್ದಿಷ್ಟ ದಿನದಲ್ಲಿ ಅಂಕಗಳ ಸಂಗ್ರಹ ಆಧರಿಸಿ ಅಗ್ರ ಎಂಟನ್ನು ಅಂತಿಮಗೊಳಿಸಲಾಗುತ್ತದೆ. ನಿಜಕ್ಕಾದರೆ, ಈ ಎಂಟರಲ್ಲಿ ಒಬ್ಬರಾಗುವುದೇ ಒಂದು ಹಂಗಾಮ ಗೆದ್ದಂತೆ!
ಸ್ಪರ್ಧೆಯು ರೌಂಡ್ ರಾಬಿನ್ ಮಾದರಿಯಲ್ಲಿ ನಡೆಯುತ್ತದೆ. 8 ಆಟಗಾರ್ತಿಯರನ್ನು 2 ಗುಂಪುಗಳಾಗಿ ವಿಂಗಡಿಸಲಾಗುತ್ತದೆ. ಗುಂಪಿನಲ್ಲಿ ತಲಾ ಮೂರು ಪಂದ್ಯಗಳನ್ನಾಡುವ ಆಟಗಾರ್ತಿಯರಲ್ಲಿ ಮೊದಲ ಎರಡು ಸ್ಥಾನ ಪಡೆದವರು ಸೆಮಿಫೈನಲ್ಗೆ ಅರ್ಹತೆ ಪಡೆಯುತ್ತಾರೆ. ಈ ಗುಂಪಿನ ಅಗ್ರ ಸ್ಥಾನಿ ಆ ಗುಂಪಿನ ದ್ವಿತೀಯ ಕ್ರಮಾಂಕದವರನ್ನು ಉಪಾಂತ್ಯದಲ್ಲಿ ಸೆಣಸುತ್ತಾರೆ. ಉಳಿದ ಫೈನಲ್ ಸ್ಥಾನಕ್ಕೂ ಇದೇ ಸೂತ್ರ. ಉಪಾಂತ್ಯದಿಂದ ಸ್ಪರ್ಧೆ ನಾಕೌಟ್. ಹಾಗಾಗಿ ಅತ್ಯುತ್ತಮ ಆಟಗಾರ್ತಿ ಬಹುಮಾನ ಪಡೆಯುತ್ತಾರೆ. ಕೂಟದ ಕೊನೆಯ ಸ್ಪರ್ಧೆ ಸಿಂಗಾಪುರದ ಕಲ್ಲಾಂಗ್ನಲ್ಲಿ ನಡೆಯಲಿದೆ.
ವಲಸಿಗ ಡಬ್ಲ್ಯುಟಿಎ ಟೂರ್ನಿ!
ಈ ಟೂರ್ನಿ ಇಂಗ್ಲೆಂಡ್ನಲ್ಲೇ ನೆಲಸಿರುವ ವಿಂಬಲ್ಡನ್, ರೊಲ್ಯಾಂಡ್ ಗ್ಯಾರಸ್ಗೆ ಮೀಸಲಾಗಿರುವ ಫ್ರೆಂಚ್ ಓಪನ್ನಂತಲ್ಲ. ನಗರಗಳಿಂದ ನಗರಕ್ಕೆ ತನ್ನ ವಾಸ್ತವ್ಯ ಬದಲಿಸುತ್ತದೆ. ಆ ಎಣಿಕೆಯಲ್ಲಿ ಸಿಂಗಾಪುರ 9ನೇ ನಗರ. ಒಂದು ನಗರ ಪರಮಾವಧಿ ಐದು ವರ್ಷ ಆತಿಥ್ಯ ವಹಿಸಬಹುದು. 2014ರಿಂದ ಆರಂಭವಾಗಿ ಇದು ಸಿಂಗಾಪೂರ್ಗೆ ಐದನೇ ಸಂಚಿಕೆ. ಅಕ್ಟೋಬರ್ 21ರಿಂದ 27ರವರೆಗೆ ನಡೆಯಲಿದೆ. 1972ರಲ್ಲಿ ಜಾರಿಗೆ ಬಂದ ಡಬ್ಲ್ಯುಟಿಎ ಟೂರ್ ಫೈನಲ್ ಟೂರ್ನಿಯಲ್ಲಿ ರುಚಿಗೇನೂ ಕೊರತೆಯಿಲ್ಲ. ಆದರೂ ಜನಪ್ರಿಯತೆ ಆ ಮಟ್ಟಿಗೆ ಸಿಕ್ಕಿಲ್ಲ.
ಚೀನಾದವರು ಜಾಣರು, ತಮ್ಮ ಒಂದು ಪ್ರತಿಷ್ಠಿತ ಚೀನಾ ಓಪನ್ ಅನ್ನು ಡಬ್ಲ್ಯುಟಿಎ ಓಪನ್ನ ಡೆಡ್ಲೈನ್ ವಾರದಲ್ಲಿ ಬೀಜಿಂಗ್ನಲ್ಲಿ ಆಡಲು ಜಾಗ ಮಾಡಿಕೊಂಡಿದ್ದಾರೆ. ಈವರೆಗೆ ಸಿಮೋನೆ ಹಾಲೆಪ್, ಏಂಜೆಲಿಕ್ ಕೆರ್ಬರ್ ಹಾಗೂ ನಿಯೋಮಿ ಒಸಕಾ ಮಾತ್ರ ಟಾಪ್ 8ರಲ್ಲಿ ಒಬ್ಬರಾಗುವುದನ್ನು ಖಚಿತಪಡಿಸಿಕೊಂಡು ಟೂರ್ನಿಯಲ್ಲಿ ಪಾಲ್ಗೊಳ್ಳಲು ಹಸಿರು ನಿಶಾನೆ ಪಡೆದಿದ್ದಾರೆ. ಅನುಕ್ರಮವಾಗಿ ಇವರು ಫ್ರೆಂಚ್, ವಿಂಬಲ್ಡನ್ ಹಾಗೂ ಯುಎಸ್ ಓಪನ್ ಸ್ಲಾಮ್ ಚಾಂಪಿಯನ್ಗಳು. ಉಳಿದಂತೆ ಇರುವ 5 ಸ್ಥಾನಕ್ಕೆ 17 ಜನ ಸ್ಪರ್ಧೆಯಲ್ಲಿದ್ದಾರೆ. ಗಣಿತದ ಅನುಪಾತ, ಪ್ರಮೇಯಗಳ ಪ್ರಕಾರ ಇರುವ ಅವಕಾಶವನ್ನು ಬಳಸಿಕೊಳ್ಳಲು ಇಂತವರು ಚೀನಾ ಓಪನ್ನಲ್ಲಿ ಆಡಲು ಉತ್ಸುಕತೆ ತೋರುತ್ತಾರೆ. ಇದರಿಂದ ತಾನೇ ತಾನಾಗಿ ಟೂರ್ನಿಯ ಸ್ಟಾರ್ ವ್ಯಾಲ್ಯೂ ಹೆಚ್ಚುತ್ತದಲ್ಲವೇ? ಇಲ್ಲಿಯೇ ಚೀನಾದವರ ಜಾಣ್ಮೆ ಗಮನ ಸೆಳೆಯುತ್ತದೆ. ಅಷ್ಟಕ್ಕೂ ಡಬ್ಲ್ಯುಟಿಎ ಫೈನಲ್ ಟೂರ್ನಿ ಬರುವ ವರ್ಷದಿಂದ ಚೀನಾದ ಶೆಂಗ್ಜೆನ್ನಲ್ಲಿಯೇ ನಡೆಯಲಿದೆ!
ಹುಳಿ ಉಪ್ಪು ಖಾರ ಕಡಿಮೆ!
ವರ್ಷಾಂತ್ಯದ ಟೂರ್ನಿಗೆ ಕೆಲವು ನಕಾರಾತ್ಮಕ ಗುಣಗಳೂ ಇರುತ್ತವೆ. ಜನವರಿಯಿಂದ ನಿರಂತರವಾಗಿ ಆಡುತ್ತಿರುವ ಆಟಗಾರ್ತಿಯರಿಗೆ ನಾಲ್ಕೂ ಗ್ರಾನ್ಸ್ಲಾಂಗಳು ಮುಗಿದ ನಂತರ ಒಂದು ಪ್ರಮಾಣದ ಸೋಮಾರಿತನ ಮೂಡುತ್ತದೆ. ಹತ್ತಿಕ್ಕಿಕೊಂಡ ಸಣ್ಣಪುಟ್ಟ ಗಾಯಗಳು ಈಗ ತಮ್ಮ ಪ್ರತಾಪ ತೋರಿಸಲಾರಂಭಿಸುತ್ತವೆ. ಹತ್ತಿರವಾಗುತ್ತಿರುವ ಕ್ರಿಸ್ಮಸ್ ಸಂಭ್ರಮ, ಯುರೋಪ್ ದೇಶಗಳಲ್ಲಿ ಹೆಚ್ಚು ಚಳಿ ಆಟಗಾರರನ್ನು ಅಕ್ಷರಶಃ ಮುದುಡಿಸುತ್ತದೆ. ಹಾಗಾಗೇ ಹಲವು ಪ್ರಮುಖ ಆಟಗಾರ್ತಿಯವರು ಇಲ್ಲಿ ಆಡದಿದ್ದರೆ ತೀರಾ ಅಚ್ಚರಿಯೇನೂ ಆಗುವುದಿಲ್ಲ.
ಈ ಬಾರಿ 11ನೇ ಶ್ರೇಯಾಂಕದ ಅಮೆರಿಕಾದ ಸೆರೆನಾ ವಿಲಿಯಮ್ಸ್ ಗಾಯದ ಕಾರಣವೊಡ್ಡಿ ಬೀಜಿಂಗ್ನಲ್ಲಿ ಆಡುತ್ತಿಲ್ಲ. ಗಾಯ ನಿಜವಿರಬಹುದು, ಇದರಿಂದ ಸೆರೆನಾ ಡಬ್ಲ್ಯುಟಿಎ ಫೈನಲ್ಸ್ ಆಡುವುದಿಲ್ಲ ಎಂಬುದು ಖಚಿತಗೊಳ್ಳುತ್ತದೆ. ಹಾಲೆಪ್ ಗಾಯಾಳುವಾಗಿರುವುದರಿಂದ ಅಂಕಣಕ್ಕಿಳಿಯುವುದೇ ಅನಿಶ್ಚಿತ. ಆಸ್ಟ್ರೇಲಿಯನ್ ಓಪನ್ ಗೆದ್ದ ವೋಜ್ನಿಯಾಕಿಯವರಿಗೆ ಕೂಡ ಪಾಲ್ಗೊಳ್ಳುವಿಕೆ ಗ್ಯಾರಂಟಿಯಾಗಿಲ್ಲ. ಈ ಸ್ಪರ್ಧೆಗೆ ಹೆಚ್ಚಿನ ಡಬ್ಲ್ಯುಟಿಎ ಪಾಯಿಂಟ್ಗಳನ್ನು ಪುರುಷರ ಎಟಿಪಿ ಸ್ಪರ್ಧೆಯಲ್ಲಿಟ್ಟಂತೆ ಇಡುವುದರಿಂದ ಹೆಚ್ಚು ಆಕರ್ಷಣೀಯಗೊಳಿಸಬಹುದು.
ಎಟಿಪಿ ಹೆಜ್ಜೆಗಳ ಅನುಸರಣೆ!
ಇದೇ ರೀತಿ ಪುರುಷರ ವಿಭಾಗದಲ್ಲಿಯೂ ಪ್ರತಿ ವರ್ಷ ಎಟಿಪಿ ಟೂರ್ ಫೈನಲ್ಸ್ ನಡೆಯುತ್ತದೆ. ಈ ವರ್ಷದ ಸ್ಪರ್ಧೆ ಲಂಡನ್ನಲ್ಲಿ ನವೆಂಬರ್ 11ರಿಂದ 18ರವರೆಗೆ ನಡೆಯಲಿದೆ. ಪ್ರತಿ ಸುತ್ತಿನ ಜಯಕ್ಕೆ ಗರಿಷ್ಠ ಶ್ರೇಯಾಂಕ ಪಾಯಿಂಟ್, ಅಗ್ರ ಎಂಟರ ಆಯ್ಕೆಗೆ ವಿನೂತನ ಕ್ರಮಗಳ ಮೂಲಕ ಎಟಿಪಿ ಪ್ರಾಯೋಜಕತ್ವದಲ್ಲಿ ನಡೆಯುವ ಸ್ಪರ್ಧೆಗೆ ಹೆಚ್ಚಿನ ಆಯಾಮಗಳನ್ನು ಸೃಷ್ಟಿಸಿದೆ. ಅತ್ತ ನೋಡುವುದಾದರೆ, ಅಲ್ಲಿ ರಫೆಲ್ ನಡಾಲ್ ಹಾಗೂ ನೋವಾಕ್ ಜೋಕೋವಿಚ್ ಮಾತ್ರವೇ ಈವರೆಗೆ ಪಾಲ್ಗೊಳ್ಳುವ ರಹದಾರಿ ಪಡೆದಿದ್ದಾರೆ.
ರೌಂಡ್ ರಾಬಿನ್ ಸ್ಪರ್ಧೆ ಮತ್ತು ಸತತ ಮೂರು ದಿನದ ಪಂದ್ಯಗಳು ದಣಿದ ದೇಹಗಳಿಗೆ ಸುಲಭದ ತುತ್ತಲ್ಲ. ಇದೇ ಕಾರಣಕ್ಕೆ ಎರಡು ಪಂದ್ಯ ಗೆದ್ದ ಆಟಗಾರ್ತಿ ಮೂರನೇ ಪಂದ್ಯಕ್ಕೆ ರಿಲ್ಯಾಕ್ಸ್ ಆಗಬಹುದು. ತಮ್ಮ ಎದುರಾಳಿ ಯಾರಾಗಬೇಕು ಎಂಬುದನ್ನು ನಿರ್ಧರಿಸಲು ಆಟದ ಮಟ್ಟದಲ್ಲಿಯೇ ವೆತ್ಯಾಸ ಮಾಡಿಕೊಳ್ಳಬಹುದು. ಎದುರು ಗುಂಪಿನ ಟಾಪ್ 2 ಆಟಗಾರ್ತಿಯ ಎದುರು ಆಡಬಾರದು ಎಂದು ತಮ್ಮ ಗುಂಪಲ್ಲಿ ಒಂದು ಪಂದ್ಯ ಕೈಚೆಲ್ಲಿ ಗುಂಪಿನ ದ್ವಿತೀಯ ಸ್ಥಾನ ಪಡೆಯಬಹುದು. ಬಹುಷಃ ಮಹಿಳಾ ವಿಭಾಗದಲ್ಲಿಯೂ ಈ ಸ್ಪರ್ಧೆಗೆ ಇನ್ನಷ್ಟು ಒಗ್ಗರಣೆಯನ್ನು ಬೆರೆಸುವ ಅಗತ್ಯವಿದೆ.
ಗುರು ಸಾಗರ
ಟಾಪ್ ನ್ಯೂಸ್
ಈ ವಿಭಾಗದಿಂದ ಇನ್ನಷ್ಟು ಇನ್ನಷ್ಟು ಸುದ್ದಿಗಳು
MUST WATCH
ಹೊಸ ಸೇರ್ಪಡೆ
Kadaba: ಬಿಳಿನೆಲೆ ಮತದಾನ ಕೇಂದ್ರದಲ್ಲಿ ಕಾಂಗ್ರೆಸ್-ಬಿಜೆಪಿ ಕಾರ್ಯಕರ್ತರ ಮಾತಿನ ಚಕಮಕಿ
EVM, VVPAT ಮತಗಳ ಹೋಲಿಕೆ- ಎಲ್ಲಾ ಅರ್ಜಿ ವಜಾಗೊಳಿಸಿದ ಸುಪ್ರೀಂಕೋರ್ಟ್…ಆದರೆ…
Belthangady: ದಿಬ್ಬಣದಲ್ಲೇ ಮತಗಟ್ಟೆಗೆ ಬಂದು ಮತ ಚಲಾಯಿಸಿದ ವಧು
LS Polls: ಚಿಕ್ಕಮಗಳೂರು… ವಿದೇಶದಿಂದ ಬಂದು ಮತದಾನ ಮಾಡಿ ಮಾದರಿಯಾದ ದಂಪತಿ…
Lok Sabha Election: ಉಡುಪಿ ಚಿಕ್ಕಮಗಳೂರಿನಲ್ಲಿ 29.03 % ಮತದಾನ…