ಪಾಕ್ ತಂಡದ ವಿರುದ್ಧ ಕ್ರಮ: ಪ್ರಧಾನಿಗೆ ಕಮ್ರಾನ್ ಮನವಿ
Team Udayavani, Jun 22, 2019, 5:52 AM IST
ಕರಾಚಿ: ವಿಶ್ವಕಪ್ ಕ್ರಿಕೆಟ್ ಕೂಟದಲ್ಲಿ ಕಳಪೆ ನಿರ್ವಹಣೆ ನೀಡಿರುವ ಪಾಕಿಸ್ಥಾನ ವಿರುದ್ಧ ವ್ಯಾಪಕ ಆಕ್ರೋಶ ವ್ಯಕ್ತವಾಗುತ್ತಿದೆ. ಇದರ ಬೆನ್ನಲ್ಲೇ ಮಾಜಿ ಕ್ರಿಕೆಟಿಗ ಕಮ್ರಾನ್ ಅಕ್ಮಲ್, ಪಾಕಿಸ್ಥಾನ ತಂಡದ ಮೇಲೆ ಕಠಿನ ಕ್ರಮ ತೆಗೆದುಕೊಳ್ಳುವಂತೆ ಪ್ರಧಾನಿ ಇಮ್ರಾನ್ ಖಾನ್ ಅವರನ್ನು ಒತ್ತಾಯಿಸಿದ್ದಾರೆ.
“ಪ್ರಸಕ್ತ ಕೂಟದಲ್ಲಿ ಪಾಕಿಸ್ಥಾನ ಆತಿಥೇಯ ಇಂಗ್ಲೆಂಡ್ ವಿರುದ್ಧವಷ್ಟೇ ಗೆದ್ದಿದೆ. ತಂಡದ ಬ್ಯಾಟಿಂಗ್, ಫೀಲ್ಡಿಂಗ್ ಅತ್ಯಂತ ದುರ್ಬಲವಾಗಿದೆ. ಈ ತಂಡದ ವಿರುದ್ಧ ಸೂಕ್ತ ಕ್ರಮ ಅಗತ್ಯವಿದೆ. ಮುಂದಿನ ದಿನಗಳಲ್ಲಿ ಪಾಕಿಸ್ಥಾನ ಕ್ರಿಕೆಟಿನ ಉಳಿವಿಗಾಗಿ ಸಮರ್ಥ ಆಟಗಾರರನ್ನು ಆಯ್ಕೆ ಮಾಡಬೇಕಿದೆ. ಪ್ರತಿಭಾವಂತರಿಗೆ ಅವಕಾಶ ನೀಡಿದರೆ ಪಾಕ್ ತಂಡ ಉತ್ತಮ ಮಟ್ಟಕ್ಕೆ ಏರಲಿದೆ’ ಎಂದು ಪಿಸಿಬಿ ಪ್ಯಾಟ್ರನ್ ಕೂಡ ಆಗಿರುವ ಇಮ್ರಾನ್ ಖಾನ್ ಅವರಿಗೆ ಮನವಿ ಮಾಡಿದ್ದಾರೆ.