ಮೋಡವಿಲ್ಲದ ಶುಭ್ರ ಆಕಾಶ ಕಣೋ…

Team Udayavani, Aug 20, 2019, 5:29 AM IST

ಪ್ರೀತಿ ಅನ್ನೋದು ಆಳವಾದ ಸಮುದ್ರ ಕಣೋ. ಕೆರೆ, ಬಾವಿ, ನದಿಗಳ ನೀರು ಬತ್ತಬಹುದು, ಆದರೆ, ಸಮುದ್ರದ ನೀರು ಎಂದೂ ಬತ್ತಲ್ಲ; ಬತ್ತಿದ ಬಗ್ಗೆ ಮಾಹಿತಿಯೂ ಇಲ್ಲ ಬಿಡು. ಅಂಥ‌ ಸಮುದ್ರದ ಆಳದ ಪ್ರೀತಿ ನಿನ್ನದು. ನೀರು ಬಂದು ಸೇರಿದಂತೆಲ್ಲಾ ನಿನ್ನ ಪ್ರೀತಿಯೂ ಹೆಚ್ಚುತ್ತಲೇ ಹೋಗುತ್ತದೆ. ಅದು ಅಪರಿಮಿತ; ಸಾಟಿಯಿಲ್ಲದ್ದು. ಜನ ತಮಗೆ ಬೇಕಾದ ವಿಷಯಗಳ ಈಡೇರಿಕೆಗಾಗಿ ಪೂಜೆ, ಹರಕೆ ಮಾಡುವುದು ವಾಡಿಕೆ. ನೀನು, ನಿನ್ನ ಪ್ರೀತಿ ಫ‌ಲಿಸಲಿ, ಎಲ್ಲವೂ ಸಾಂಗವಾಗಿ ಸಾಗಲಿ ಎಂದು ದೇವರಿಗೆ ನಡೆದುಕೊಂಡು ಹರಕೆ ಹೊತ್ತಿದ್ದೆಯಲ್ಲಾ? ಅದು ಅಪೂರ್ವ. ಜಗತ್ತಿನಲ್ಲಿ ಎಷ್ಟೋ ಕೆಲಸಗಳು ಆಗದಿದ್ದಾಗ, ಪ್ರಾರ್ಥನೆ ಎಂಬ ಧ್ಯಾನ ಅಭೂತಪೂರ್ವವಾದ ವಿಸ್ಮಯಗಳನ್ನು ಮಾಡುತ್ತದೆ ಎಂದು ಕೇಳಿದ್ದೆ.

ಅದು ನಿಜವಾಯಿತು ನೋಡು. ದೇವರು ನಿನ್ನ ಪ್ರಾರ್ಥನೆಯನ್ನು ಕೇಳಲೇಬೇಕು. ನೀನು ಅಂದುಕೊಂಡಿದ್ದು ಈಡೇರಲೇಬೇಕು. ಯಾಕಂದ್ರೆ ದೈವೀಶಕ್ತಿಯಂಥ ಪವಿತ್ರತೆ ಪ್ರೀತಿಯಲ್ಲಿ ಇದೆ. ನಿನ್ನ ಜೀವನದ ಸಂಪೂರ್ಣ ಏರಿಳಿತಗಳನ್ನು ಕಂಡಿದ್ದೇನೆ. ನಿನ್ನಯ ಸುಖ ದುಃಖಗಳೂ ಗೊತ್ತು. ಎಲ್ಲವನ್ನೂ ತಾಳ್ಮೆಯಿಂದ ಎದುರಿಸುವ ಭಾವ ನಿನ್ನದು. ನನ್ನ ಪಾಲಿನ ಪ್ರೀತಿಯನ್ನು ಧಾರೆ ಎರೆದದ್ದಕ್ಕೆ ಪ್ರಮಾಣ ಬೇಕಿಲ್ಲ. ಮನಸ್ಸಿನ ಮುಗ್ಧತೆಯ ದ್ಯೋತಕದಂತೆ ಪ್ರೀತಿಯನ್ನು ತೋರಿದ್ದು ದೈವ. ನಿನ್ನ ಪ್ರಾರ್ಥನೆಯನ್ನು ದೇವರು ಆಲಿಸಲೇಬೇಕು.

ಪ್ರೀತಿ ತನ್ನೊಳಗೆ ಎಲ್ಲ ಶಕ್ತಿಯನ್ನೂ ಇಟ್ಟುಕೊಂಡು ಎಲ್ಲವನ್ನೂ ನಿಯಂತ್ರಿಸುವ ಅನುಪಮ ವರದಾನ. ಇಂಥದ್ದೇ ಪ್ರೀತಿಯನ್ನು ಅನುಭವಿಸುವ ನಸೀಬು ವಿರಳ.ಅದು ಕಪ್ಪು ಮೋಡಗಳಿಲ್ಲದ ಸುಂದರ ಆಕಾಶದಂತೆ…

ಮಾಲಾ ಮ. ಅಕ್ಕಿಶೆಟ್ಟಿ