ಪ್ರಶ್ನಿಸದೆ ಒಪ್ಪಿದ್ದರೆ…
Team Udayavani, Dec 3, 2019, 12:42 PM IST
ಗಣಿತ ಸಮ್ಮೇಳನಗಳಲ್ಲಿ ಗಂಭೀರವಾದ ಉಪನ್ಯಾಸವಾದ ಮೇಲೆ ಪ್ರಶ್ನೋತ್ತರ ನಡೆಯುವುದು ರೂಢಿ. ಉಪನ್ಯಾಸದ ತಲೆಬುಡ ಅರ್ಥವಾಗದವರು ಕೂಡ ಆಗ ತಮಗೆಲ್ಲ ಅರ್ಥವಾಗಿದೆ ಎಂದು ತೋರಿಸಿಕೊಳ್ಳಲು ಇಲ್ಲಸಲ್ಲದ ಪ್ರಶ್ನೆಗಳನ್ನು ಕೇಳುವುದುಂಟು. ಆಗೆಲ್ಲ ಅವರು ಆಯ್ಲರ್ ಇಲ್ಲವೇ ಗೌಸ್ನ ಹೆಸರು ಎಳೆದು ತರುವುದು ಮಾಮೂಲು. ಇದನ್ನು ಆಯ್ಲರನ 34ನೇ ಸಂಪುಟದ 80ನೇ ಪ್ರಮೇಯದಲ್ಲಿ ನೋಡಿದ್ದೇನಲ್ಲ ಎಂದು ಪ್ರಶ್ನೆ ಕೇಳುವವನು ಹೇಳಿದರೂ, ಅವನು ಆಯ್ಲರನ ಯಾವ ಸಂಪುಟವನ್ನಾದರೂ ಪೂರ್ತಿಯಾಗಿ ಓದಿರುವುದುಅನುಮಾನವೇ.
ಒಟ್ಟಿನಲ್ಲಿ, ನೆರೆದವರ ಮುಂದೆ ತಾನು ಮಹಾಪುರುಷನಾಗಬೇಕೆಂಬ ದರ್ದು ಇಲ್ಲಿ ಎದ್ದು ಕಾಣುತ್ತದೆ. ಲೂಯಿ ನಿರೆನ್ಬರ್ಗ್ ಎಂಬ ಗಣಿತಜ್ಞ ಪ್ರಸ್ತುತಪಡಿಸಿದ ಗಣಿತದ ಉಪನ್ಯಾಸವೊಂದು ಮುಗಿದ ಮೇಲೆ ಪ್ರಶ್ನೋತ್ತರ ಏರ್ಪಡಿಸಲಾಗಿತ್ತು. ಆಗ ಎದುರಿನ ಸಾಲಲ್ಲಿ ಕುಳಿತಿದ್ದ ಒಬ್ಬ ಮಹನೀಯರು ಎದ್ದು ನಿಂತು ನೀವು ಹೇಳಿದ ವಿಚಾರವನ್ನು ಗೌಸ್ ತನ್ನ ಪುಸ್ತಕದಲ್ಲಿ ಆಗಲೇ ಹೇಳಿಬಿಟ್ಟಿದ್ದಾನಲ್ಲ? ಎಂದರು. ಲೂಯಿ ತುಸುವೂ ತಡವರಿಸದೆ, ಹೌದು. ನಾನೂ ಅದನ್ನುಓದಿದ್ದೇನೆ. ಮಾತ್ರವಲ್ಲ. ಅದರ ತಪ್ಪುಗಳನ್ನೂ ಕಂಡುಹಿಡಿದಿದ್ದೇನೆ. ಆತ ಬರೆದದ್ದನ್ನು ಪ್ರಶ್ನಿಸದೆ ನಂಬಿಬಿಟ್ಟಿದ್ದರೆ, ನಾನೂ ಇಂದು ಮೂರ್ಖರ ಸಾಲಿಗೆ ಸೇರಿಬಿಡುತ್ತಿದ್ದೆ ಎಂದರು.