ನಿನ್ನ ಜಪ ಮಾಡೋದೇ ಈಗ ಫ‌ುಲ್‌ಟೈಂ ಕೆಲಸ 

Team Udayavani, Mar 19, 2019, 12:30 AM IST

ನಾನೂ ಒಂದು ದಿನ ಪ್ರೀತಿಯಲ್ಲಿ ಬೀಳ್ತೀನಿ ಅಂತ ಊಹಿಸಿಯೂ ಇರಲಿಲ್ಲ. ಫ್ರೆಂಡ್ಸ್‌ ಗ್ಯಾಂಗ್‌ನಲ್ಲಿ ಯಾರಾದರೂ ಲವ್ವಲ್ಲಿ ಬಿದ್ದಿದ್ದರೆ, ಅವರ ಕಾಲೆಳೆಯುತ್ತಾ ಮಜಾ ಮಾಡಿಕೊಂಡಿದ್ದವನು ನಾನು. ಆದರೆ, ಮನದ ಮೂಲೆಯಲ್ಲೆಲ್ಲೋ “ನನಗೂ ಒಬ್ಬಳು ಗೆಳತಿ ಇದ್ದಿದ್ದರೆ’ ಅನ್ನೋ ಆಸೆ ಇದ್ದದ್ದು ಸುಳ್ಳಲ್ಲ. ಅಪರಿಚಿತರಾಗಿದ್ದ ನಾವು ದೇವರ ದಯೆಯಿಂದ ಪರಿಚಿತರಾದೆವು. ಆ ಪರಿಚಯ ಸ್ನೇಹಕ್ಕೆ ತಿರುಗಿ, ಸ್ನೇಹ ಪ್ರೀತಿಯಾಗುತ್ತದೆ ಅಂತ ಇಬ್ಬರಿಗೂ ಗೊತ್ತಿರಲಿಲ್ಲ. 

ಖಾಲಿ ಇದ್ದ ನನ್ನ ಹೃದಯಕ್ಕೆ ಈಗ ಹೊಸ ಕೆಲಸವೊಂದು ಸಿಕ್ಕಿದೆ. ಅದೇನಂತ ಕೇಳಿದ್ಯಾ? ನಿನ್ನ ನೋಡುವುದು, ನಿನ್ನ ಬಗ್ಗೆ ಯೋಚಿಸುವುದು, ನಿನ್ನನ್ನು ಕೇರ್‌ ಮಾಡುವುದು, ನಿನ್ನೊಂದಿಗೆ ಮಾತಾಡುವುದು… ದಿನವಿಡೀ ಪುರುಸೊತ್ತಿಲ್ಲದೆ ಮಾಡುವ ಕೆಲಸವದು. ಮೊದಮೊದಲು ಹಗಲು ಮಾತ್ರ ದುಡಿಯುತ್ತಿದ್ದ ಹೃದಯ ರಾತ್ರಿಯೂ ನಿನ್ನದೇ ಜಪ ಮಾಡುತ್ತಿದೆಯಂತೆ. ನಿದ್ದೆಯಲ್ಲೂ ನಿನ್ನ ಹೆಸರು ಕನವರಿಸುತ್ತಿದ್ದೆ ಅಂತ ರೂಮ್‌ಮೇಟ್‌ ಹೇಳುತ್ತಿದ್ದ! 

ಈಗ ಹೃದಯದ ಖುಷಿಗೆ ಎಣೆಯೇ ಇಲ್ಲವಾಗಿದೆ. ನನಗೂ ಒಬ್ಬಳು ಜೊತೆಗಾತಿ ಸಿಕ್ಕಿದ್ದಾಳೆ. ನನ್ನ ಭಾವನೆಗಳನ್ನು ಹಂಚಿಕೊಳ್ಳಲು, ನನ್ನದೇ ಇದು ಜೀವ ಎಂದು ಹೇಳಿಕೊಳ್ಳಲು ಅದಕ್ಕೀಗ ಸಂತಸ. ಇಷ್ಟು ದಿನ ಖಾಲಿ ಇದ್ದ ಹೃದಯಕ್ಕೆ ಬಿಡುವಿಲ್ಲದ ಕೆಲಸವೊಂದು ಸಿಕ್ಕಿದೆ. ಈ ಕೆಲಸ ಕಾಯಂ ಆಗಲಿ ಅಂತಷ್ಟೇ ಬೇಡಿಕೆ. 

ಪವನ್‌ಕುಮಾರ್‌ ಎಂ., ರಿಪ್ಪನ್‌ಪೇಟೆ