ವಾರದ ನೆಲೆಯಲ್ಲಿ 6 ವಾರಗಳಲ್ಲೇ ಮೊದಲ ಪತನ ಕಂಡ ಮುಂಬಯಿ ಶೇರು

Team Udayavani, Mar 3, 2017, 5:54 PM IST

ಮುಂಬಯಿ : ಕಳೆದ ಆರು ವಾರಗಳಲ್ಲೇ ಮೊದಲ ಬಾರಿಗೆ ವಾರದ ನೆಲೆಯಲ್ಲಿ  ಪತನ ಕಂಡಿರುವ ಮುಂಬಯಿ ಶೇರು ಪೇಟೆ ಇಂದು ಶುಕ್ರವಾರದ ವಹಿವಾಟನ್ನು 7.34 ಅಂಕಗಳ ಅಲ್ಪ ನಷ್ಟದೊಂದಿಗೆ 28,716.21 ಅಂಕಗಳ ಮಟ್ಟದಲ್ಲಿ ಕೊನೆಗೊಳಿಸಿತು.

ಇದೇ ರೀತಿ ರಾಷ್ಟ್ರೀಯ ಶೇರು ಮಾರುಕಟ್ಟೆಯ ನಿಫ್ಟಿ ಸೂಚ್ಯಂಕ ಕೂಡ 2.20 ಅಲ್ಪ ಅಂಕಗಳ ನಷ್ಟದೊಂದಿಗೆ ದಿನದ ವಹಿವಾಟನ್ನು 8,897.55 ಅಂಕಗಳ ಮಟ್ಟದಲ್ಲಿ ಸಮಾಪನಗೊಳಿಸಿತು.

ವಾರದಲ್ಲಿ ನೆಲೆಯಲ್ಲಿ ಅವಲೋಕಿಸಿದಾಗ ಸೆನ್ಸೆಕ್ಸ್‌ ಅನುಭವಿಸಿರುವ ನಷ್ಟ 60.52 ಅಂಕ. ಇದೇ ರೀತಿ ನಿಫ್ಟಿ ದಾಖಲಿಸಿರುವ ವಾರದ ನೆಲೆಯಲ್ಲಿನ ನಷ್ಟ 41.95 ಅಂಕ. 

ಅಮೆರಿಕದ ಪೆಡರಲ್‌ ರಿಸರ್ವ್‌ ಬ್ಯಾಂಕ್‌ ಈ ತಿಂಗಳಾಂತ್ಯದಲ್ಲಿ ತನ್ನ ಬಡ್ಡಿ ದರ ಕುರಿತಾದ ಪ್ರಕಟನೆಯನ್ನು ಮಾಡಲಿರುವುದರಿಂದ ವಿಶ್ವಾದ್ಯಂತದ ಶೇರು ಮಾರುಕಟ್ಟೆಗಳ ದೃಷ್ಟಿ ಇದೀಗ ಅಲ್ಲಿಗೆ ನೆಟ್ಟಿದೆ. 

ಇಂದಿನ ವಹಿವಾಟಿನಲ್ಲಿ ಎಚ್‌ ಡಿ ಎಫ್ ಸಿ ಶೇರು ಶೇ.1.89ರ ಕುಸಿತವನ್ನು ಕಂಡರೆ ಏಶ್ಯನ್‌ ಪೇಂಟ್ಸ್‌ ಶೇರು ಶೇ.1.34ರ ಕುಸಿತಕ್ಕೆ ಗುರಿಯಾಯಿತು. 

ಇಂದು ಕುಸಿತಕ್ಕೆ ಗುರಿಯಾದ ಇತರ ಕಂಪೆನಿಗಳೆಂದರೆ ಐಟಿಸಿ,  ಐಸಿಐಸಿಐ ಬ್ಯಾಂಕ್‌, ಎಸ್‌ಬಿಐ, ಮಾರುತಿ ಸುಜುಕಿ, ಮಹೀಂದ್ರ, ಭಾರ್ತಿ ಏರ್‌ಟೆಲ್‌ ಮತ್ತು ಟಿಸಿಎಸ್‌.

ಇದೇ ವೇಳೆ ರಿಲಯನ್ಸ್‌ ಶೇರು 2008ರ ಮೇ ತಿಂಗಳ ಬಳಿಕ ಇದೇ ಮೊದಲ ಬಾರಿಗೆಂಬಂತೆ ಶೇ.2.04ರ ಜಿಗಿತವನ್ನು ಕಂಡಿತು.