ರಾಧೇಯ: ಒಂದೆರಡು ಅನಿಸಿಕೆಗಳು

Team Udayavani, Jul 28, 2017, 8:04 AM IST

ಉಡುಪಿಯ ಯಕ್ಷಗಾನ ಕಲಾರಂಗ ಆಯೋಜಿಸಿದ “ರಾಧೇಯ’ ಬಡಗು ತಿಟ್ಟು ಯಕ್ಷಗಾನ ಪ್ರಸ್ತುತಿಯನ್ನು ವೀಕ್ಷಿಸಿದ ಬಳಿಕ ನನಗನಿಸಿದ್ದು ಹೀಗೆ:

ಕುಂತೀಭೋಜನಿಂದ ತೊಡಗಿ ಕುರುಕ್ಷೇತ್ರದಲ್ಲಿ ಕರ್ಣನ ಕಾಯಕ ಆರಂಭಗೊಳ್ಳುವವರೆಗೆ ಸಂಯೋಜಕರು ಕಥಾಭಾಗವನ್ನು ಉತ್ತಮವಾಗಿ ಪೋಣಿಸಿದ್ದಾರೆ. ನಿಗದಿತ ಸಮಯದೊಳಗೆ ಆಖ್ಯಾನವನ್ನು ಮುಗಿಸಬೇಕೆಂದಿದ್ದರೆ ಕೆಲವು ಕಡೆಗಳಲ್ಲಿ “ಕತ್ತರಿ ಪ್ರಯೋಗ’ ಆವಶ್ಯಕ. ಕೆಲವು ಭಾಗಗಳನ್ನು ತ್ಯಜಿಸಬಹುದು ಅಥವಾ ಮೊಟಕುಗೊಳಿಸಬಹುದು. ಅನುಭವವಿರುವ ಹಿರಿಯರ ಸಲಹೆಯಂತೆ ಆ ಕಾರ್ಯವನ್ನು ಮಾಡಬಹುದು.

ಉಡುಪಿ, ಕುಂದಾಪುರ ತಾಲೂಕುಗಳಲ್ಲಿ ನೆಲೆನಿಂತ ನಡುತಿಟ್ಟಿನ ಪ್ರಾತಿನಿಧಿಕ ಪ್ರಸಂಗ “ಕರ್ಣಾರ್ಜುನ’. ಹಾರಾಡಿ ರಾಮ ಗಾಣಿಗರಿಗೆ ರಾಷ್ಟ್ರ ಪ್ರಶಸ್ತಿ ಸಿಗುವಲ್ಲಿ ಕುರುಕ್ಷೇತ್ರದ ಈ “ಅತುಳಬಲ’ ಕರ್ಣ ಮಹತ್ತರ ಪಾತ್ರ ವಹಿಸಿದ್ದಾನೆ ಎಂಬುದು ಆ ಪಾತ್ರ ಪರಿಚಯವಿರುವ ಕಲಾಭಿಮಾನಿಗಳೆಲ್ಲರೂ ಒಪ್ಪತಕ್ಕ ಮಾತು. ರಾಧೇಯ ಕಥಾನಕ ರಂಜನೀಯವಾಗಬೇಕಾದರೆ ಕುರುಕ್ಷೇತ್ರದ ಪೂರ್ವ ಭಾಗದಲ್ಲಿ , ಮೇಲೆ ಹೇಳಿದಂತೆ ಸಂಸ್ಕರಿಸಿದ ಕಥಾಭಾಗದೊಂದಿಗೆ ಉತ್ತರಾರ್ಧದಲ್ಲಿ ನಮ್ಮ ಬಡಗುತಿಟ್ಟಿನ ಕರ್ಣಾರ್ಜುನ ಪ್ರಸಂಗವನ್ನು ಹಾಗೆಯೇ ಉಳಿಸಬೇಕು. ಈ “ಅತುಳಬಲ ಕರ್ಣ’ನನ್ನು ಮೂರ್ತರೂಪಕ್ಕಿಳಿಸಲು ಆಗಿ ಹೋದ ಕಲಾವಿದರ ಮಟ್ಟಕ್ಕೆ ನಿಲ್ಲತಕ್ಕ ಕಲಾವಿದರು ಇಂದು ನಮ್ಮಲ್ಲಿ ಇಲ್ಲವೆಂಬ ಅಭಿಪ್ರಾಯವಿರಬಹುದು (ಈ ಮಾತು ಎಲ್ಲ ತಿಟ್ಟುಗಳಿಗೂ ಅನ್ವಯಿಸುವಂಥದ್ದು). ಆದರೂ ಅವರ ಪಳೆಯುಳಿಕೆಗಳಂತೆ ಈ ಭಾಗವನ್ನು ಅಭಿನಯಿಸಬಲ್ಲ ಕಲಾವಿದರು ಈಗಲೂ ಇದ್ದಾರೆ. “ಕರ್ಣಾವಸಾನ’ದ ಕರ್ಣನ ಪಾತ್ರವನ್ನು ತಮ್ಮ ವೃತ್ತಿ ಜೀವನದಲ್ಲಿ ಕಡಿಮೆ ಪಕ್ಷ ಹತ್ತು -ಹದಿನೈದು ಬಾರಿ ಅಭಿನಯಿಸಿದವರು ಈಗಲೂ ಇದ್ದಾರೆ. ಈ ಕಥಾಭಾಗದ ಕರ್ಣ, ಶಲ್ಯ, ಅರ್ಜುನ, ಶ್ರೀಕೃಷ್ಣ – ಪಾತ್ರಗಳನ್ನು ನಡುತಿಟ್ಟಿನ ಕಲಾವಿದರಿಂದಲೇ ಮಾಡಿಸಿದರೆ “ರಾಧೇಯ’ ಪ್ರಸಂಗ ಇನ್ನಷ್ಟು ಕಳೆಗಟ್ಟುತ್ತದೆ ಎಂಬುದರಲ್ಲಿ ಎರಡು ಮಾತಿಲ್ಲ.

ಜುಲೈ 10ರಂದು ಕಲಾರಂಗದ ಕಚೇರಿಯಲ್ಲಿ ಜರಗಿದ ತೆಂಕು-ಬಡಗು ಪ್ರದರ್ಶನಗಳ ಅವಲೋಕನ ಕಾರ್ಯಕ್ರಮದಲ್ಲಿ ಅನೇಕ ಯಕ್ಷಗಾನ ಕಲಾಭಿಮಾನಿಗಳು ತಮ್ಮ ಅಭಿಮತವನ್ನು ಮಂಡಿಸಿದ್ದಾರೆ. ಅಂದು ತೀವ್ರ ಚರ್ಚೆಗೆ ಒಳಪಟ್ಟಿದ್ದು ಬಡಗುತಿಟ್ಟಿನ “ರಾಧೇಯ’. ಕಟ್ಟು ಮೀಸೆಯ ವೇಷವನ್ನು ಧರಿಸಿ ತೆಂಕುತಿಟ್ಟಿನ ಕಲಾವಿದರು “ಮಹಾಪ್ರಸ್ಥಾನ’ ಆಖ್ಯಾನದಲ್ಲಿ ವಿಜೃಂಭಿಸಿದ್ದಾರೆ; ಬಡಗುತಿಟ್ಟಿನ ಕಲಾವಿದರು ಈ ವಿಷಯದಲ್ಲಿ ಅಸಡ್ಡೆ ತೋರಿರುವುದು ಏಕೆಂದು ಅರ್ಥವಾಗುವುದಿಲ್ಲ. ಕಟ್ಟುಮೀಸೆಯ ಬಗ್ಗೆ “ಅವಲೋಕನ’ ಕಾರ್ಯಕ್ರಮದಲ್ಲಿ ಸಾಕಷ್ಟು ಅನಿಸಿಕೆಗಳು ಮುಂಬಂದಿವೆ. 

ಎ. ಜೆ. ಡಿ’ಸೋಜಾ, ಉಡುಪಿ