ರಸಿಕರ ರಸಿಕಾ
Team Udayavani, May 18, 2018, 6:00 AM IST
ಬಹಳ ವರ್ಷ ಬಾಲಿವುಡ್ನಲ್ಲಿ ಎಲೆಮರೆಯಕಾಯಿಯಂತಿದ್ದ ನಟಿ ರಸಿಕಾ ದುಗಲ್. 2007ರಲ್ಲೇ ನಟಿಸಲು ತೊಡಗಿದ್ದರೂ ರಸಿಕಾ ಇನ್ನೂ ಅಪರಿಚಿತಳಾಗಿಯೇ ಉಳಿದಿದ್ದಾಳೆ. ಜಾರ್ಖಂಡ್ನ ಈ ನಟಿ ಕಲಿತದ್ದು ದಿಲ್ಲಿಯಲ್ಲಿ.
ಪದವಿಯ ಬಳಿಕ ಮುಂಬಯಿಯ ರೈಲು ಹತ್ತಿದವಳಿಗೆ ಮೊದಲು ಅವಕಾಶ ಸಿಕ್ಕಿದ್ದು ಚಿಕ್ಕಪುಟ್ಟ ಜಾಹೀರಾತುಗಳಲ್ಲಿ. ಅಲ್ಲಿಂದ ಕಿರುತೆರೆಗೆ ಬಂದ ರಸಿಕಾ ಉಪನಿಷದ್ ಗಂಗಾ, ಪೌಡರ್, ಕಿಸ್ಮತ್, ದರಿಬಾ ಡೈರೀಸ್ನಂತಹ ಸೀರಿಯಲ್ ಮತ್ತು ಪರ್ಮನೆಂಟ್ ರೂಮ್ಮೇಟ್ಸ್, ಹ್ಯುಮರಸ್ಲಿ ಯುವರ್ನಂತಹ ವೆಬ್ ಸರಣಿಗಳಲ್ಲಿ ಅಭಿನಯಿಸಿ ಗಮನ ಸೆಳೆದಳು. ಅನ್ವರ್ ರಸಿಕಾ ನಟಿಸಿದ ಮೊದಲ ಬಾಲಿವುಡ್ ಚಿತ್ರ. ಅದೇ ವರ್ಷ ನೋ ಸ್ಮೋಕಿಂಗ್ ಚಿತ್ರದಲ್ಲೂ ನಟಿಸಿದಳು. ಅನಂತರ ಹೈಜಾಕ್, ಥ್ಯಾಂಕ್ಸ್ ಮಾ, ಖೀಸ್ಸಾ , ಕ್ಷಯ್, ಮಂಟೊ, ತು ಹೈ ಮೇರಾ ಸಂಡೇಯಂತಹ ಭಿನ್ನ ಜಾಡಿನ ಚಿತ್ರಗಳಲ್ಲಿ ನಟಿಸಿ ಸೈ ಎನಿಸಿಕೊಂಡಿದ್ದಾಳೆ. ಈ ಪೈಕಿ ಮಂಟೊ ಕಾನ್ಸ್ ಚಿತ್ರೋತ್ಸವದ ತನಕ ಹೋಗಿ ಬಂದಿದೆ.
ಮಲಯಾಳವೂ ಸೇರಿದಂತೆ ಹತ್ತಕ್ಕೂ ಹೆಚ್ಚು ಚಿತ್ರಗಳಲ್ಲಿ ನಟಿಸಿದ್ದರೂ ಖ್ಯಾತಿಯಾಗಲಿ, ಅವಕಾಶವಾಗಲಿ ಅವಳನ್ನು ಹುಡುಕಿಕೊಂಡು ಬರಲಿಲ್ಲ. ಹೀಗಾಗಿ, ಅವಳು ಇನ್ನೂ ಅನಾಮಧೇಯಳಾಗಿಯೇ ಉಳಿದಿದ್ದಾಳೆ. ಇದೀಗ ಪ್ರಸಿದ್ಧ ಕತೆಗಾರ ಸಾದತ್ ಹಸನ್ ಮಂಟೋನ ಹೆಂಡತಿ ಸಫಿಯಾ ಆಗಿ ಚಾರಿತ್ರಿಕ ಪಾತ್ರವೊಂದರಲ್ಲಿ ಕಾಣಿಸಿಕೊಳ್ಳಲಿದ್ದಾಳೆ. ನಂದಿತಾ ದಾಸ್ ಈ ಚಿತ್ರದ ನಿರ್ದೇಶಕಿ. ನಂದಿತಾ ಸಾಕಷ್ಟು ರೀಸರ್ಚ್ ಮಾಡಿ ಪಕ್ಕಾ ಸ್ಕ್ರಿಪ್ಟ್ ರೆಡಿ ಮಾಡಿಕೊಂಡೇ ಚಿತ್ರ ಮಾಡುವ ನಿರ್ದೇಶಕಿ. ಅವಳ ಚಿತ್ರದಲ್ಲಿ ನಟಿಸುವುದೇ ಒಂದು ಸವಾಲು. ಈ ಸವಾಲನ್ನು ರಸಿಕಾ ದಿಟ್ಟವಾಗಿ ಸ್ವೀಕರಿಸಿದ್ದಾಳೆ. ಹೇಳಿಕೇಳಿ ಜೀವನಚರಿತ್ರೆ ಆಧಾರಿತ ಚಿತ್ರ. ಇಂಥ ಚಿತ್ರ ಬಾಕ್ಸಾಫೀಸಿನಲ್ಲಿ ಯಶಸ್ವಿಯಾಗುವುದಿಲ್ಲ ಎನ್ನುವುದು ರಸಿಕಾಳಿಗೆ ತಿಳಿದಿದೆ. ಆದರೆ ಈ ರೀತಿಯ ಪಾತ್ರಗಳಲ್ಲಿ ಅಭಿನಯಿಸುವುದೇ ಒಂದು ರೀತಿಯ ಥ್ರಿಲ್ ಎಂಬ ಕಾರಣಕ್ಕೆ ರಸಿಕಾ ಒಪ್ಪಿಕೊಂಡಿದ್ದಾಳಂತೆ.