ಬಗೆ ಬಗೆ ಬಸಳೆ

Team Udayavani, Nov 30, 2018, 6:00 AM IST

ಕಬ್ಬಿಣಾಂಶ ಹೊಂದಿರುವ ಹಲವಾರು ಸೊಪ್ಪುಗಳಲ್ಲಿ ಬಸಳೆಯೂ ಒಂದು. ರುಚಿಕರ ಖಾದ್ಯ ತಯಾರಿಕೆ ಮಾತ್ರವಲ್ಲ, ಔಷಧಿಯಾಗಿಯೂ ಇದು ಬಹಳ ಉಪಯೋಗಿ.

ಬಸಳೆ ಪತ್ರೊಡೆ 
ಕೆಸುವಿನೆಲೆ ಪತ್ರೊಡೆ ಅರಿಯದವರಿಲ್ಲ. ಆದರೆ, ಬಸಳೆ ಸೊಪ್ಪಿನೊಂದಿಗಿನ ಪತ್ರೊಡೆಯೂ ಅಷ್ಟೇ ರುಚಿಕರ.
ಬೇಕಾಗುವ ಸಾಮಗ್ರಿ: ಬಸಳೆಸೊಪ್ಪು 10-12, ಅಕ್ಕಿ – 3/4 ಕಪ್‌, ಒಣಮೆಣಸು- 6, ಕಡಲೆಬೇಳೆ- 1 ದೊಡ್ಡ ಚಮಚ, ಒಣ ಕೊತ್ತಂಬರಿ- 2 ಚಮಚ, ಮೆಂತ್ಯ- 1/4 ಚಮಚ, ಉಪ್ಪು ರುಚಿಗೆ ತಕ್ಕಷ್ಟು, ಹುಣಸೆಹಣ್ಣು ಗೋಲಿಗಾತ್ರ.

ತಯಾರಿಸುವ ವಿಧಾನ: ಕಡಲೆಬೇಳೆ, ಅಕ್ಕಿ ಒಂದು ಗಂಟೆ ನೆನೆಸಿ ಒಣಮೆಣಸು, ಹುಣಸೆ, ಉಪ್ಪು ಸೇರಿಸಿ ರುಬ್ಬಿ. ನಯವಾಗಿ ರುಬ್ಬಬೇಕಾಗಿಲ್ಲ. ಕಡಲೆಬೇಳೆ, ಕೊತ್ತಂಬರಿ, ಮೆಂತ್ಯ ಹುರಿದು ಪುಡಿ ಮಾಡಿ ರುಬ್ಬಿದ ಮಿಶ್ರಣಕ್ಕೆ ಬೆರೆಸಿ. ಈ ಹಿಟ್ಟನ್ನು ಬಸಳೆಸೊಪ್ಪಿಗೆ ಪತ್ರೊಡೆಯಂತೆ ಸವರಿ, ಮಡಚಿ ಆವಿಯಲ್ಲಿ ಬೇಯಿಸಿ. ಬಿಸಿಬಿಸಿ ಬಸಳೆ ಪತ್ರೊಡೆ ಅತ್ಯಂತ ರುಚಿಕರ.

ಬಸಳೆ ವಡೆ 
ಬೇಕಾಗುವ ಸಾಮಗ್ರಿ: ಬಸಳೆ ಸೊಪ್ಪು – 10, ಅಕ್ಕಿಹಿಟ್ಟು- 1/4 ಕಪ್‌, ಉಪ್ಪು ರುಚಿಗೆ ತಕ್ಕಷ್ಟು , ಕಡಲೆಬೇಳೆ- 1/2 ಕಪ್‌, ಹುರಿದ ಕೆಂಪು ಮೆಣಸು- 4.

ತಯಾರಿಸುವ ವಿಧಾನ: ಕಡಲೆಬೇಳೆ ಒಂದು ಗಂಟೆ ನೆನೆಸಿ. ನಂತರ ಉಪ್ಪು , ಮೆಣಸಿನೊಂದಿಗೆ ತರಿತರಿಯಾಗಿ ರುಬ್ಬಿ . ಬಸಳೆ ಸಣ್ಣದಾಗಿ ಕತ್ತರಿಸಿ ಇದಕ್ಕೆ ಅಕ್ಕಿಹಿಟ್ಟು ಬೆರೆಸಿ, ವಡೆಯಂತೆ ತಟ್ಟಿ ಕರಿಯಿರಿ.

ಬಸಳೆ ತಂಬುಳಿ
ಬೇಕಾಗುವ ಸಾಮಗ್ರಿ: ಬಸಳೆಸೊಪ್ಪು- 8, ಜೀರಿಗೆ- 1/2 ಚಮಚ, ಮೊಸರು- 1/2 ಕಪ್‌, ಕಾಯಿತುರಿ- 2 ಚಮಚ, ಬೆಣ್ಣೆ – 1 ಚಮಚ, ಉಪ್ಪು ರುಚಿಗೆ ತಕ್ಕಷ್ಟು , ಮೆಣಸು-1.

ತಯಾರಿಸುವ ವಿಧಾನ: ಬಸಳೆಸೊಪ್ಪನ್ನು ತೊಳೆದುಕೊಂಡು ಸಣ್ಣಗೆ ಹೆಚ್ಚಿ. ನಂತರ ಬೆಣ್ಣೆ , ಜೀರಿಗೆಯೊಂದಿಗೆ ಹುರಿಯಿರಿ. ನಂತರ ಕಾಯಿತುರಿ, ಮೆಣಸಿನೊಂದಿಗೆ ನಯವಾಗಿ ರುಬ್ಬಿ. ಮೊಸರು, ಉಪ್ಪು ಸೇರಿಸಿ ಒಗ್ಗರಿಸಿ. ಬಾಯಿಹುಣ್ಣಿರುವವರಿಗೆ ಇದರ ಸೇವನೆ ಉತ್ತಮ.

ಬಸಳೆ ಕಷಾಯ 
ಬೇಕಾಗುವ ಸಾಮಗ್ರಿ: ಬಸಳೆ ಸೊಪ್ಪು – 6, ಬೆಲ್ಲ- ಒಂದು ದೊಡ್ಡ ತುಂಡು, ಹಾಲು- 1/2 ಕಪ್‌.

ತಯಾರಿಸುವ ವಿಧಾನ: ಬಸಳೆ ಎಲೆಗಳನ್ನು ಚೆನ್ನಾಗಿ ತೊಳೆದು ಒಂದು ಕಪ್‌ ನೀರಿನಲ್ಲಿ ಕುದಿಸಿ, ಅರ್ಧಕ್ಕೆ ಇಳಿಸಿ, ಸೋಸಿಕೊಳ್ಳಿ. ಇದಕ್ಕೆ ಬೆಲ್ಲ, ಬಿಸಿ ಹಾಲು ಸೇರಿಸಿ ಸೇವಿಸಿ. ಉಷ್ಣ ಪ್ರಕೃತಿಯವರಿಗೆ, ಬಾಯಿಹುಣ್ಣಿನ ತೊಂದರೆ ಅನುಭವಿಸುವವರಿಗೆ ಇದರ ಸೇವನೆ ಉತ್ತಮ.

ದೀಪಾ ಡಿ ಹೆಗಡೆ