ಏರ್ಟೆಲ್ ನೆಟ್ವರ್ಕ್ ಸಮಸ್ಯೆ
Team Udayavani, Jan 4, 2017, 3:25 AM IST
ಮಂಗಳೂರು: ಮಂಗಳೂರು ನಗರದಾದ್ಯಂತ ಕಳೆದ ಕೆಲವು ದಿನಗಳಿಂದ ಏರ್ಟೆಲ್ ನೆಟ್ವರ್ಕ್ ಸಮಸ್ಯೆ ಉಂಟಾಗುತ್ತಿದ್ದು, ಗ್ರಾಹಕರು ಪರದಾಡುವಂತಾಗಿದೆ. ಏರ್ ಟೆಲ್ ಮೊಬೈಲ್ ಸಂಖ್ಯೆಯಿಂದ ಇತರ ಯಾವುದೇ ಸಂಖ್ಯೆಧಿಗಳಿಗೆ ಕರೆ ಹೋಗುತ್ತಿಲ್ಲ. ಒಂದು ವೇಳೆ ಕರೆ ಹೋದರೂ ಮಾತನಾಡುತ್ತಿರುವಾಗಲೇ ಅರ್ಧದಲ್ಲಿ ಕರೆ ಕಟ್ ಆಗುತ್ತದೆ. ಇಲ್ಲವೇ ಮಾತನಾಡುವಾಗ ಧ್ವನಿ ಸರಿಯಾಗಿ ಕೇಳಿಸುತ್ತಿಲ್ಲ. ಬೇರೆ ಸಂಖ್ಯೆಗಳಿಂದ ಏರ್ಟೆಲ್ ಸಂಖ್ಯೆಗೆ ಕರೆ ಮಾಡಿದರೆ ಸ್ವಿಚ್ ಆಫ್ ಇಲ್ಲವೇ ವ್ಯಾಪ್ತಿ ಪ್ರದೇಶದಿಂದ ಹೊರಗಿದ್ದಾರೆ ಎಂಬುದಾಗಿ ಪ್ರತಿಕ್ರಿಯೆ ಬರುತ್ತಿದೆ. ಏರ್ಟೆಲ್ ನಂಬರ್ನಿಂದ ಸಂದೇಶಗಳು ಕೂಡ ಹೋಗುತ್ತಿಲ್ಲ ಎಂದು ಗ್ರಾಹಕರು ದೂರಿದ್ದಾರೆ.
ರೇಂಜ್ ಇಲ್ಲದಿರುವುದರಿಂದ ಇಂಟರ್ನೆಟ್ ಸಮಸ್ಯೆ ಕೂಡ ತಲೆದೋರಿದ್ದು, ಕಳೆದ ಕೆಲವು ದಿನಗಳಿಂದ ವಾಟ್ಸ್ಆ್ಯಪ್, ಫೇಸ್ಬುಕ್ ಮುಂತಾದ ಸಾಮಾಜಿಕ ತಾಣಗಳ ವೀಕ್ಷಣೆಗೂ ಸಮಸ್ಯೆ ಉಂಟಾಗುತ್ತಿದೆ. ಈ ಬಗ್ಗೆ ಏರ್ಟೆಲ್ ಕಸ್ಟಮರ್ ಕೇರ್ ಸಿಬಂದಿಯಲ್ಲಿ ವಿಚಾರಿಸಿದಾಗ, ಚೆಕ್ ಮಾಡಲಾಗಿದ್ದು, ಏರ್ಟೆಲ್ನಲ್ಲಿ ಅಂತಹ ಯಾವುದೇ ಸಮಸ್ಯೆ ಇಲ್ಲ ಎಂಬುದಾಗಿ ತಿಳಿಸಿದ್ದಾರೆ.