ಮನದೊಳಗೆ ಬರೆದಿರುವ ಹೆಸರು ನಿನ್ನದೇ…
Team Udayavani, Oct 1, 2019, 5:00 AM IST
ನನ್ನೊಲವೇ,
ನನ್ನ ನಿನ್ನ ಪರಿಚಯಕ್ಕೆ ಇಂದಿಗೆ ಬರೋಬ್ಬರಿ ಮೂರು ವರ್ಷ, ಮೂರು ತಿಂಗಳು ತುಂಬಿದವು. ಅಂದು ಕಾಲೇಜಿಗೆ ನನ್ನ ಮೊದಲ ಆಗಮನ. ನಿನ್ನದು ಗೊತ್ತಿಲ್ಲ. ತಡಮಾಡಿ ಅವಸವಸರವಾಗಿ ಹಳೆಯ ಹಾಡಿನ ಮಾಧುರ್ಯದಂತೆ ನಡೆದು ಬಂದು ನನ್ನಿಂದ ಅನತಿ ದೂರದ ಬೆಂಚ್ ಮೇಲೆ ಕುಳಿತು ನಿಟ್ಟುಸಿರುಬಿಟ್ಟೆ.
ಆ ದಿನ ಇನ್ನೂ ನೆನಪಿದೆ. ಅಕಸ್ಮಾತಾಗಿ ಒಬ್ಬರಿಗೊಬ್ಬರು ನೋಡಿ ನಕ್ಕಾಗಿನಿಂದ, ಎದೆಯ ಗೋಡೆಯ ಮೇಲೆ ಹೃದಯ ಪ್ರೇಮ ಲಹರಿ ಗೀಚಲು ಆರಂಭವಾಯಿತು. ಮನಸ್ಸು ಬಿಡದೇ ನಿನ್ನ ನೆನಪಿನೊಳಗೆ ಚಡಪಡಿಸುತ್ತಿತ್ತು. ನೀನು ದೂರದಿ ಅಲ್ಲೆಲ್ಲೋ ಕಾಣುವ ಅನಾಮಿಕ ಪುಟ್ಟ ದ್ವೀಪ. ನಾನು ಅದನ್ನೇ ತದೇಕಚಿತ್ತದಿಂದ ನೋಡುತ್ತ ನಿಂತಿರುವ ಪ್ರೀತಿಯ ಫಕೀರ. ಭೋರ್ಗರೆವ ಸಾಗರದ ಎದುರು ಈಜಿ ನಿನ್ನ ಸೇರೋದು, ಬೆಂಕಿಯೊಂದಿಗೆ ಸರಸವಾಡುವುದು ಎರಡೂ ಒಂದೇ ಅಂತ ಗೊತ್ತಾಗಿದ್ದೇ ಆವಾಗ.
ನೋಡಿದಷ್ಟೂ ನೋಡುತ್ತಲೇ ಇರಬೇಕು ಎನ್ನುವ ಸರಳ ಚೆಲುವು ನಿನ್ನದು. ನಿರಭ್ರ ಆಕಾಶದಲ್ಲಿ ತೇಲುವ ಬೆಳದಿಂಗಳಂಥ ನಿನಗೆ ಹೇಳದೆ ಕೇಳದೆ ಶುದ್ಧ ಬಿಳಿ ಹಾಳೆಯಂಥ ನನ್ನ ಒಲವಿನಲ್ಲಿ ನಿನ್ನದೇ ಹೆಸರು ಬರೆದಿರುವೆ. ಅಲ್ಲಿ ಬರೀ ನಿನ್ನದೇ ಕನಸು, ನಿನ್ನದೇ ಕಲ್ಪನೆ, ನಿನ್ನದೇ ತುಂಬು ನಿರೀಕ್ಷೆ.
ನಿನ್ನ ಪ್ರೀತಿಯ ಬಲೆಯೊಳಗೆ ಬಿದ್ದಾಗಿನಿಂದ ಊಟ, ನಿದ್ರೆ, ನೀರಡಿಕೆ ಎಲ್ಲವೂ ಮರೆತು ಹೋಗಿದೆ. ನನ್ನೊಳಗಿನ ಬಹುದಿನಗಳ ಪ್ರೀತಿಯೆಂಬ ಸಿಹಿ ಸಂಕಟಕ್ಕೆ ಪೂರ್ಣರಾಮ ಹಾಕಬೇಕೆಂದರೆ ನಮ್ಮ ಪ್ರೀತಿಗೆ ಆದಷ್ಟು ಬೇಗ ನಿನ್ನ ಒಪ್ಪಿಗೆಯ ಮುದ್ರೆಯೊತ್ತಬೇಕು.
ರಂಗನಾಥ್ ಗುಡಿಮನಿ